فـلـسـفــة الـحـجـــاب

من فترة كبيرة وانا شايف ان موضوع الحجاب واخد اكبر من حجمه , وإن المعارضين والمؤيدين للحجاب مكبرين الموضوع , ومن وقت ازمة النقاب الاخيرة والمفتعلة من شيخ الازهر حفظه الله !!! وانا بفكر فى الموضوع ده بشكل مستمر , واكتشفت انى كنت غلطان فى التقليل من مسألة الحجاب وان الموضوع اكبر من كده , وحبيت اعرض الحجاب من زاوية تانية غير اللى بيتقال عنه , وانا دلوقتى مش هتكلم من منطلق دينى , انا هتكلم بمنطق عقلى وكأنى بفكر بصوت عالى , الاول لازم نعرف ان الموضوع اصلا يتعلق بالمرأة , يعنى الغرض الاساسى من الحجاب هو اخفاء جسد المرأة , طب نخفى جسمها ليه ؟ هل لأن المرأة عورة !!! ودى الكلمة اللى بيزعلوا منها بتوع حقوق المراة , ببساطة الست ربنا خلقها بجسم اجمل بكتير من الرجل , ومجرد رؤية الرجل لجسد امرأة ده فى حد ذاته متعه , وده مش عندنا بس كمجتمع شرقى , عشان انا بسمع كلام كتير بيقول ان الرجاله الشرقيين عندهم كبت وتفكيرهم منحصر فى الجنس , ودليلى ان الكلام ده مش مظبوط , ان فى اوروبا والغرب عموما وبالرغم من التمتع الكامل بالحرية فى العلاقات وغيره , إلا ان فى اماكن مخصوصه لرقص التعرى !!! وده بنشوفه فى السينيما بتاعتهم , وده مكان الرجاله بتروحه وتدفع فلوس لمجرد رؤية بنات بترقص تقريبا عرايا , وده بيأكد ان الموضوع ملوش دعوة بطبيعة المجتمع او طريقة تفكيره , لكن بيتعلق بالرجل والمرأة والشهوة التى زرعها الخالق فى الانسان , طيب دلوقتى احنا عرفنا ان الرجل بيحس بمتعه بمجرد انه يشوف جسم الست , وطبعا الست عارفة ده كويس !!! هنا بقى لازم نقف ونتكلم بصراحة حتى مع نفسنا على الاقل , ياترى ايه اللى يخلى بنت او ست فى اى سن تلبس قصير او مكشوف او ضيق ؟ طبعا الوحشة مش عايزة تبين حاجة , لكن الست اللى شايفة انها حلوة عايزة تبين ده , وممكن نلاقى كذا اجابة عن السؤال ده , مثلا ممكن تكون البنت او الست ترغب فى الحصول على رجل , سواء بعلاقة شرعية كالزواج او علاقة غير شرعية , وممكن تكون البنت بتحس بمتعه او بسعاده لما بتشوف نظرات الاعجاب من الرجال المحيطين بيها , وممكن تكون البنت عايزة تكون احلى واحدة بالمقارنة بالبنات اللى حواليها , بعد ما عرفنا الاسباب اللى بتخلى الست تبين جسمها , لازم نقول ان فى ستات تانية بترفض الكلام ده وبتلبس هدوم بتغطى اغلب جسمها سواء باقتناع منها او كعاده , طيب ياترى رد فعل الرجل لده ايه ؟ الرجاله برضو انواع , يعنى فى رجل بمجرد ما يشوف الست بتبين جسمها فده بالنسبه ليه الضوء الاخضر , وده ممكن يوصله لعلاقة مباشرة معها بالاسلوب اللى هى عايزاه , وساعات غصب عنها زى حالات الاغتصاب !!! وفى رجل بيكتفى بالتعليق سواء بتحرش او بمعاكسة شفهية , وفى رجل تكفيه النظرة دون حتى التعليق , وفى رجل اخر بيمنع نفسه من النظر !!! ولو عملنا مقارنة بين مجتمع المرأة فيه جسمها مكشوف , تحت اى مسمى حرية او مساواة او اى حاجة , وبين مجتمع تغطى فية المرأة جسمها , ياترى المقارنة هتبقى فى صالح مين , طبعا المجتمع الغربى دلوقتى اغنى واقوى واكثر تقدم مننا فى شتى المجالات , لكن مشاكله الاجتماعية كبيرة جدا لدرجة تهدد ببقاءه , واللى بيقرأ فى التاريخ يعرف ان الحضارات العريقة على مر الزمن كانت فيها الست مصانه وعفيفة , وده هيوصلنا فى الاخر لأكتشاف عظمة الاسلام لما نشوف النظام اللى موجود فى تعاليمه واللى بأتباعها تنصلح احوال البشر , والمشكلة عندنا دلوقتى ان بالرغم من انتشار الحجاب إلا ان الاخلاق من سىء الى اسوء , وده بسبب الجهل اللى عندنا , يعنى الحجاب اللى منتشر حولينا فى كل حته ملوش لازمة لانه تحول الى زى طبيعى او عقد اجتماعى كما يطلق عليه علماء الاجتماع , يعنى ببساطة البنت بقى طبيعى انها تلبس ايشارب يغطى شعرها عشان تعرف تعيش بطريقة احسن وسط المجتمع وبدون انتقادات من احد , لكن ده ميمنعش انها تلبس ضيق شوية او تمشى بطريقة ملفتة المهم انها تظهر نفسها جميلة برضو وهى محجبة , وهنا بقى المشكلة , لانها كده مش بتفرق عن البنت الغير محجبة وده بيفقد الحجاب مفعوله , لان من اهم شروط الحجاب ان لا يكون زينه فى نفسه , ودى جملة كانت محيرانى ومكنتش عارف ايه المغزى منها , لكن الفكرة ان الموضوع كله هنا بيبقى فى نية البنت نفسها , يعنى لازم تكون وهى لابسه الحجاب عارفه ان الغرض منه انها لا تلفت الانتباه , ولا انها تبان الاجمل ولا الاحلى !!! وان لبسها ده بيدى رساله واضحة وصريحة لأى رجل انها مش مستنية منه نظرة اعجاب ولا معاكسة , وصدقونى مهما كانت اخلاق الراجل سيئة ومتدنية إلا انه بيفهم الرساله دى كويس جدا

إنا لله وإنا اليه راجعون

نــتــيــجــــة الــفــســـــاد

الفساد هو اكتر حاجة منتشرة الايام دى فى مصر , وبقي شىء عادى جدا وطبيعى !!! وموجود فى الجرايد والمجلات والبرامج الحوارية , بختصار بقى عايش معانا بشكل يومى , المشكلة اللى انا بحسها دلوقتى وانا شايف انها اخطر نتيجة للفساد , هى هز قناعات الشباب والسبب الرئيسى فى تلوث مفهومهم وادراكهم للحياه !!! بمعنى ان الشاب وهو لسه عقله بينمو ويتفتح , بيبدأ يستوعب ويدرك قيمه الاشياء , وبيبدأ يتعلم كيفية الحياه نفسها , ونظريا ده المفروض يتم فى البيت من الاب والام ثم فى المدرسة ثم ممارسة الحياه العملية الفعليه , اما فى الواقع اللى بيحصل ان اغلب الاباء والامهات اليومين دول فى صراع حقيقى ويومى لمحاولة الحفاظ على حياه شبه كريمة لأبنائهم , وده بيقلل كتير من القيم والمبادىء اللى المفروض يزرعوها فى اولادهم , اما المدرسة والتعليم عموما , فانا مش محتاج اتكلم عن المستوى المتدنى اللى وصلناله اكيد انتم عارفين !!! يبقى مش فاضل غير الممارسة الفعلية للحياه وهنا بقى المشكلة , لما الشاب يفكر بينه وبين نفسه ويحاول يعرف مثلا المعنى الحقيقى للنجاح , يا ترى الانسان الناجح هو اللى بيعمل مجهود اكبر ولا الفهلوى اللى بيعرف يمشى اموره , وعشان تنجح فى شغلك وتترقى , هل المفروض تشتغل بزمه اكبر ولا تنافق المدير بتاعك ولا تدور على واسطه , وياترى مين اللى يستاهل فينا يعيش عيشة كريمة ومحترمة فى البلد , هل هو المتعلم اللى معاه شهاده ولا الصنايعى اللى معاه حرفه ولا الصايع اللى بياخد كل حاجة بالعافية !!!! كل دى اسئلة الشباب بتكتشف اجابتها كل يوم من اللى بتشوفه قدامها , وفى ظل عدم وجود نماذج او قدوه الشباب تحبها وتحترمها وتقدر كلمتها وتحاول تقلدها , بتكون النتيجة ان القناعات اللى بتتكون عندهم بتبقى غلط وده بيخليها مع الوقت ثوابت صعب تغيرها , وهيعيشوا بيها بعد كده من غير ما يحسوا ولو للحظة انهم بيعملوا حاجة غلط , وده بينبأ بأجيال اكثر سوء !!! انا عارف ان كلامى ممكن يكون سودوى شوية , بس حقيقى الموضوع خطير وعواقبه اخطر

اللهم لا شماته

لا انكر فرحتى العارمة بخسارة فاروق حسنى معركة اليونسكو !!!! لانه وبكل بساطه قدم كل التنازلات اللى ممكن تتقدم عشان يكسب وبرضو خسر , وياريت التنازلات دى على حسابه هو , لكن للأسف كل التنازلات دى على حسابنا احنا , من اول جائزة سيد القمنى والمايسترو الاسرائيلى والاعتراف بالمحرقة اليهودية واعتزاره لحرق الكتب الاسرائيلية , ده غير كلامه عن الحجاب , يعنى هو كان بيبعت رسايل للعالم كله وبيقول انا بتاعكم انا هكون زى ما انتم عايزين !!!! الحجاب مش عجبكم ههاجمه , شايفين العلمانية كويسه هخلى القمنى ياخد الجايزة , عمل كل حاجة اسرائيل عايزاها وبرضو خانوه فى الاخر وكانوا ضدده , واللعب على نغمه ان مصر هى اللى خسرت وان المصريين كانوا وراه , كل ده كلام فارغ وضحك على الناس !!!! لانه لو كان يستاهل كان كسب لوحده من غير كل الهيسه والدوشة اللى كان عاملهم , لكن كل الكلام بعد الخسارة على ان حصل مؤامرة او ضغط لسقوط المرشح المصرى , طب محدش فكر ان ممكن يكون السبب ان فاروق حسنى فعلا لا يستحق الفوز !!!! وحد فكر اصلا هل كان فارق حسنى هو مرشح مصر الوحيد , يعنى كان ممكن شخص تانى مصر ترشحه يكون فرصته فى الفوز اكبر , لكن النظام اتعامل مع الانتخابات هناك على انها ذى انتخابات مجلس الشعب هنا , وان الدخليه بتاعتنا هى اللى هتراقب الانتخابات , ومدام الوزير من الحزب الوطنى يبقى اكيد هيكسب , لكن فى النهاية الوزير خسر يا حرام , ورجع ايد ورى وايد قدام !!!!! احنا مش هنتكلم عن مصاريف الحمله الانتخابية اللى اندفعت من جيوبنا على الفاضى , بس المهم يخليه قد كلمته ويستقيل من الوزارة وكفايه اوى لحد كده , عشرين سنة من الجهد والعرق والمجهود الخرافى , واللى كان السبب والحمد لله انه خلى المواطن المصرى من اكثر المواطنين ثقافة ووعى , شكرا يا سياده الوزير وكفايه عشان تستريح , وتريحنا احنا كمان

الـنـفـــس الـبـشـريــــة

كل سنة وانتم طيبين وعيد سعيد علينا وعلى الامة الاسلامية كلها , رمضان خلص بسرعة كالعاده , والشياطين طلعوا من الحبس ورجعوا تانى يشوفوا شغلهم , بس رمضان ظهرلنا الحقيقة وكشفنا قدام نفسنا , عشان الشيطان كان الحجة بتاعتنا والمبرر الجاهز لكل المصايب اللى بنعملها , عشان كده ربنا خلى رمضان اختبار عشان الانسان يعرف حقيقة نفسه , يعنى رمضان اهو جيه شهر كامل وخلص , وكل واحد فينا ادرى باللى عمله , طبعا اغلبنا بيحاول يتغير فى رمضان ويقرب لربنا ويبعد عن كل الذنوب اللى بيعملها , لكن اكيد غلطنا خلال الشهر وعملنا ذنوب برضو , وطبعا الذنوب دى مش من عمل الشيطان ولا من تدبيره ولا من وسوسته لينا , امال كل المصايب اللى بنشوفها خلال رمضان دى من تدبير مين ؟ هى من تدبير النفس البشرية !!!!! والنفس دى ساعات كتير بتبقى اقوى من الشيطان نفسه وهى اللى بتحرضنا على كل الذنوب اللى بنعملها , وعشان نحاول نحل المشكلة دى لازم الاول نتعرف بيها , يعنى لازم الواحد يبقى عارف نقط ضعفه زى ما بيعرف نقط قوته , بمعنى ان الانسان لما يقعد مع نفسه ويفكر بصوت عالى ويقول انا مشكلتى مثلا فى الكذب , يعنى متعود انى اخرج من اى موقف بأنى اكذب , او ان مشكلتى النميمة وبحب اتكلم طول الوقت مع صحابى على فلان وعلان , وهكذا المهم نعرف مشكلتنا ايه ونحددها ونفكر فيها علطول , بعد كده اول ما نيجى نكذب هنفتكر وهنبقى فى حاله اختيار ما بين الكذب وبين اننا نقول الحقيقة حتى لو الكذب كان هيحل المشكلة , ومرحلة الاختيار دى هى اهم حاجة فى الموضوع , لان فى كتير مننا بيعمل الذنب من غير ما يحس او يحاول يفكر فى اذا كان اللى عمله ده صح ولا غلط , لانه بيتحول لعاده يومية !!!! لكن لما بتبقى عارف نقطة ضعفك فين ومشكلة نفسك الحقيقية , هتستفاد حاجتين , اولا ممكن تبعد عن المكان او الزمان او الاشخاص اللى هيتسببوا فى حدوث الذنب اصلا , بمعنى لو واحدة مشكلتها النميمة وكل كلامها مع صحبتها بتنم فى الناس , لو البنت دى عرفت ان مشكلتها النميمة هتلاقى انها بتنم مع بنات معينة وفى بنات تانية مش بتحب تتكلم على حد , او فى اماكن بيبقى سهل انها تتكلم فيها او اوقات معينة بتبقى فاضية ومش لاقيه حاجة تعملها غير الكلام , وده هيخليها تختار تتكلم مع مين او تقلل الكلام من البنات اللى بتنم معاهم على قد ما تقدر او تروح معادها معاهم فى اخر وقت عشان متخليش فى وقت للنميمة , ثانيا لو مش هنقدر نبعد عن المكان او الزمان او الاشخاص اللى بيساعدونا على الذنب , هنبقى عارفين اننا بنعمل حاجة غلط , وبنختار نكمل ولا نقف , والحكاية دى بتيجى بالتدريب يعنى مش كلنا هنقدر من اول مرة نسيطر على نفسنا , لكن مره مع مره هنقدر نروضها , وساعتها هنحس بأحساس رائع , ياريت كل واحد فينا يدعى ويقول اللهم اكفنى شر نفسى على نفسى واكفنى شر غيرى واكفى غيرى شر نفسى

وقفة مع النفس

كل سنه وانتم طيبين , ورمضان كريم علينا وعلى الامه الاسلامية , الواحد مننا محتاج فى الايام دى لحاجات كتير , اعتقد ان اهمها الوقفة مع النفس , يعنى رمضان فرصة من ربنا لينا عشان كل واحد يقف مع نفسه , ويحاول يقيم حياته ويشوف هو كان ماشى صح ولا غلط , لان الواحد لو ركز شوية هيكتشف انه عايش وبيعمل حاجات كتير هو مش واخد باله منها , وده بسبب سرعة الحياه وانشغال معظمنا بالمعيشة اليومية , لكن رمضان هو وقت التأمل فى الكون والهدوء والطمأنينه الداخليه , استغل الفرصة واوعى تضيعها فى المسلسلات والنوم والاكل !!!! اقف مع نفسك وشوف لو ظلمت حد او دايقت حد او زعلت حد وكنت شايف انك مش غلطان , فكر فى الموضوع من زاويه تانية وحط نفسك مكانه وشوف كنت هتعمل ايه , امسك التليفون واسأل على قرايبك اللى بقالك زمان ناسى تكلمهم , بص على حياتك من فوق بنظره عامة وحاول تتخيل الناس اللى حواليك شايفينك ازاى , هتعرف كل واحد بيعاملك كده ليه , صلح علاقتك بربنا وقرب على قد ما تقدر وهو هيساعدك , اقرأ القرأن كأنك بتقرأه لاول مره وحاول تكتشف معانيه , ولو فى ايه لقيت نفسك عايز تفهمها كويس , روح لكتاب تفسير , ولو مش جمبك كتاب هات تفسير الايه من على النت , ومتكسلش وتحس ان الموضوع تقيل عليك , لو فى ايه واحده كنت بتقراها طول عمرك من غير ما تقف عندها , ودلوقتى قريتها بتمعن وبتركيز ودورت على تفسيرها , الايه دى ممكن تغير حياتك كلها !!!! مش هلاقى احسن من كلام ربنا انهى بيه كلامى واشوفكم بعد رمضان إنشاء الله ... ولو يؤاخذ الله الناس بما كسبوا ما ترك على ظهرها من دابة ولكن يؤخرهم إلى أجل مسمى فإذا جاء أجلهم فإن الله كان بعباده بصيرا ... صدق الله العظيم

حـامـــد الـهـجـــان

بالرغم من انى شوفت مسلسل رأفت الهجان حوالى 100 مرة قبل كده , إلا انه لما يتعاد على اى قناه بشوفه تانى , ولحد دلوقتى بتابع حلقاته باهتمام بالغ , المهم كنت بتفرج على حلقة من كام يوم وجت فى دماغى فكرة غريبة جدا , قولت لنفسى تخيل لو المخابرات المصرية راحولى على القهوة وقالولى يا محمد احنا اخترناك من وسط الـ 80 مليون عشان تروح اسرائيل وتبقى زى رأفت الهجان , وده طبعا نظرا لمواهبك الخارقة وحسك الوطنى العالى , المهم لبسونى العمه ووهمونى انى انفع اشتغل جاسوس !!! بس لما قعدت مع نفسى وفكرت , لقيت العملية مش هتنفع لكذا سبب , اول سبب انا مش هستحمل المغريات اللى هناك يعنى مينفعش كل ما اقابل واحدة من هناك زى (ايستر بولنسكى ولا يهوديت موردخاى) ولسه هظبط معاها , وده طبعا عشان مصلحة البلد مش لأى غرض تانى , يقولولى ابعد عنها عشان سلامتك وامنك هناك !!! اما السبب التانى فهو ان لما كان رأفت بيضعف او بيحس بتعب من اللى بيشوفه هناك وكان بيسأل على مصر , كان السيد نديم قلب الاسد بيقوله , مصر بخير يا رأفت , بنبنى مصانع ومدارس ومشروعات قومية , وبنعمر الصحرا , وبنتقدم يوم بعد يوم , وكل ده انت سبب فيه , طبعا بعد الكلمتين دول رأفت عنيه بتدمع وبيقوله خد بالك من مصر يا سيد نديم , المهم انا تخيلت انى سفرت اسرائيل وعمال ابعت اخبار من هناك واقولهم اسرائيل بتخطط لتدمير الزراعة المصرية والاقى فى الاخر ان اغلب مستشارين وزارة الزراعة من هناك !!! اقولهم اسرائيل عايزة تنهى على مخزون الطاقة اللى عندنا والاقى فى الاخر ان مصر بتصدرلهم الغاز بأرخص سعر فى العالم !!! اقولهم اسرائيل عايزة تبعت رساله لأيران انها ممكن تضربها فى اى وقت وان العرب كلهم معاها الاقى فى الاخر مصر بتسمح بعبور غواصتهم النووية من قناة السويس !!! بس بالرغم من كل ده قولت لنفسى يا واد الكلام ده كبير عليك واكيد القياده السياسية الحكيمة بتاعتنا عارفة مصلحة البلد اكتر منك !!!!! المهم حطيت نفسى مكان رأفت الهجان وقولت انا هسأل السيد نديم اخبار مصر ايه من يوم ما سبتها , لقيته هيقولى متخفش على مصر يا محمد , احنا بنبيع القطاع العام , والفساد بقى للركب , والشعب بيشحت ومش لاقى ياكل , ومصر بتتأخر يوم بعد يوم , وجمال هيمسك بعد ابوه !!!!! ولما لقيت الرد فى الاخر هيبقى كده , قولتلهم انا اسف مش هقدر اسافر وانا ممكن اخدم البلد من موقعى هنا على القهوة اكتر بكتير من موقعى هناك , وحتى لو قالولى مصر دى امك , هقولهم سامحونى انا ابن عاق !!!!! شالووووووووم قصدى سلالالالالالالالالالالالام

كرة القدم ..... لماذا ؟

طول عمرى مليش فى الكورة !!! وانا تقريبا الوحيد فى اصحابى اللى مش متابع المتشات , وبعرف اخبار الدورى واللاعبين منهم بالصدفة , حتى صفحة الرياضة اللى فى الجرايد هى الصفحة الوحيدة اللى مش بقراها , ولما بكون فاضى ومعنديش شغل وبكلم حد من اصحابى عشان نخرج , بتفاجىء ان فى ماتش مهم , وان كلهم هيشوفوه على القهوة , فبضطر اسفا اروح اتفرج معاهم لمجرد وجودنا مع بعض , وده بغض النظر عن مين اللى هيلعب وبطولة ايه اللى شغاله , لان الموضوع كله بعيد عنى اساسا , وانا لما ببقى على القهوة فى وقت الماتش ببقى متابع الناس اللى بتتفرج اكتر من متابعتى للماتش نفسه !!! وبدأت افكر هو ايه السحر اللى فى الكورة واللى مخلى الناس متبعاها بالاهتمام ده , ومخليها الرياضة الاكثر شعبيه فى العالم كله , وبدأ تفكيرى فى الموضوع ده يزيد بعد متشات المنتخب فى كأس القارات , طبعا كلنا شوفنا وحسينا الناس وفرحتها بعد ماتش البرازيل , ونشوة النصر العارمة اللى الشعب كله كان فيها بعد ماتش ايطاليا , وتانى يوم بعد الماتش ده , كان فى حاله سعادة غريبة على وجوه الناس كلها , وكنت شايف كل واحد ماشى ونافخ صدره ومحدش عارف يكلمه , صحيح مفيش فى جيبه عشرين جنيه على بعض , بس مش مهم هو حاسس انه حاجة كبيرة اوى !!!! انا حسيت ساعتها ان كورة القدم عبارة عن معركة او حرب بين فريقين , واحنا عادتنا كبشر ان لو فى دوشة او خناقة فى الشارع , بنحب نتفرج عليها ونتابعها لحد الاخر ولما نشوف مين اللى هيكسب , تخيلوا معايا بقى ان فى خناقة او حرب بين بلدين , وكل بلد مختارة لاعبين يحاربه بأسمها , ده غير ان مسموحلنا نشوف الحرب دى من اولها لاخرها مع معلق على احداث الحرب ومع وجود محلل لتحليل نقاط القوة والضعف لدى كل جيش قصدى لكل فريق !!! ده غير انى شايف ان اكتر ما يميز هذة الحرب ويجعلها محل اهتمام واسع من الناس هو وجود هامش كبير من العداله بين الفريقين , يعنى مثلا امريكا بالرغم من انها اكبر ترسانة اسلحة فى العالم , وتعتبر القوة العسكرية الاولى فى عصرنا الحالى , إلا انها لا تملك فريق كورة قدم على نفس الدرجة بالرغم من محاولتها الكبيرة , وده لان المنتخب الامريكى لا يستطيع ان يلعب المباراه بفريق من جنود المارينز , او ان يضرب الملعب بالطائرات الحربيه قبل المباراه , ولا تستطيع المخابرات الامريكية تجنيد مدرب الفريق الاخر او احد اللاعبين المنافسين لإنهاء المباراه قبل ان تبدأ !!!! كل ده صعب ولازم عشان تكسب ان تكسب بمجهودها وبمجهود لاعبيها فى وجود طاقم تحكيم على قدر كبير من العداله , هنا بقى تبدأ شعبية اللعبه اللى تخلى فريق لبلد فقير يكسب فريق لأغنى دوله فى العالم , ده غير ان طريقة تفكير الناس واحاسيسهم بتبان فى كل ثانيه بيتلعب فيه الماتش , يعنى فى ناس بتحب اللاعب المغامر والمتسرع وفى ناس بتحب اللاعب الهادى والمؤدب وفى ناس بتحب اللاعب الشقى والمشاكس وفى ناس بتحب اللاعب اللى بيعرف يمثل على الحكم , كل مجموعة بتحب لاعب معين انت ممكن تعرف من خلال الحب ده حاجات كتير عن الناس دى , حاجة اخيره لاحظتها على المشجعين المصريين خصوصا , انا اعتقد ان فرحة الناس الكبيرة اوى بأى انتصار بيعمله المنتخب , راجع الى ان المصريين فى الوقت الحالى عندهم شعور دائم بالهزيمة !!! فالواحد مننا حاسس انه مهزوم فى البيت ومهزوم فى الشارع ومهزوم فى الشغل , يعنى شعور بالهزيمة متواصل على مدار اليوم , والشعور ده بيتنسى ساعة انتصار المنتخب فى اى بطوله , وان حلم الوصول لكأس العالم هو حلم شعب فقد هويته وفقد حاجات كتيرة اوى معاها , ولو شاف نفسه بيلعب فى مكان واحد مع فرق تانيه ومستوى معيشة تانى , هيخليه يعيش ولو لحظات زى بقيت الناس اللى عايشة

انا موظف إذا فانا جثة

بقالى فترة بتكلم مع ناس كتير فى موضوع الشغل والوظايف , ولفت نظرى ان فى شباب كتير لسه دماغهم متعلقة فى الشغل الحكومى , ولسه عايشين فى المثل بتاع إن فاتك الميرى اتمرمغ فى ترابه , وبغض النظر عن المرتبات التعبانة بتاعت الحكومة إلا ان حلم الوظيفة الحكومية الثابتة لا يزال يشغل الكثيرين , مع ان الحكومة خلاص بطلت تعين حد تقريبا إلا عدد قليل جدا بوسايط كبيرة , وده هيفتح قدامنا كذا موضوع المفروض نفكر فيه ونحلله كويس , اولا هل طريقة التفكير اللى احنا وصلنلها دى غلطة الحكومة ولا احنا اتربينا كده ولا ايه ؟ وبعدين مهما كانت غلطة مين فأحنا ايه دورنا بالظبط , يعنى مش المفروض الواحد يفكر ويعرف ايه الصح وايه الغلط !!!! ثانيا حتى الشباب اللى مش بيحلم بالشغل الحكومى وبيحاول فى القطاع الخاص , تخيلوا ان كتير منهم مش بيفكر يا ترى الجهة اللى بيشتغل فيها بتعمل ايه , بمعنى ان معظمنا بيهتم هو شغال ايه داخل الشركة وبياخد كام منها , لكن هل حد بيسأل هى الشركة دى اساسا بتعمل ايه ؟ وايه نشاطها ؟ وهل نشطها ده مفيد ولا لأ ؟ والاسئلة دى كلها هتوصلنا لنقطة تانيه , وهى اننا لما نسأل عن نشاط الشركة ومدى اهميته هنسأل عن دور الشركة فى انتاجية البلد كلها ؟ بمعنى ان الشركة او جهة العمل اللى انا شغال فيها هل بتفيد البلد ولا لأ ؟ يعنى بننتج حاجة ولا بنصنع حاجة ولا بنعمل ايه بالظبط ؟ انا عارف ان يمكن كتير يقوله ان الموضوع بايخ او محدش بيفكر كده !!!! بس اللى خلانى اتكلم فى الموضوع ده انى لاحظت ان ناس كتير جدا شغاله فى هيئات ومصالح وشركات كبيرة , لكن لو الواحد فكر شوية وبص على الشركات دى من فوق وسأل نفسه هى بتشتغل ايه اصلا هيلاقى الاجابه انها مبتعملش حاجة مفيده !!! وانا قصدى بالحاجة المفيدة الانتاج , ودى الكلمة اللى احنا تقريبا نسيناها من زمان . من مشكلتنا الكبيرة فى مصر ان شغلتنا الاساسية اننا بنشتغل بعض او بنشتغل على بعض !!!! يعنى تخيلوا معايا اننا عايشين فى مصر ومبنى حولينا سور ومنعزلين عن البلاد اللى جمبنا , هل هنعرف نعيش يعنى الاكل اللى بنزرعه هيكفينا واللبس اللى بنصنعه هيكفينا ولا هيبقى وضعنا ايه ؟ لان ربنا سبحانه وتعالى خلقنا ونزلنا فى الارض عشان نعمرها , لكن احنا بقينا كلنا موظفين فى ايه مش مهم عند مين مش مهم بنعمل ايه مش مهم !!!! المهم اننا موظفين بنروح الشغل الصبح وبنرجع بعد الظهر وبنقبض اخر الشهر , كلنا بقينا مندوبين مبيعات واداريين ومستخلصين وفهلويه !!! وحتى فى المصانع او الشركات المنتجة هتلاقى ان الاداريين او الموظفين اللى المفروض بيخدموا على الناس اللى بتنتج اكتر من الناس دى اصلا !!! وده من الاسباب الاساسية اللى وصلتنا للحاله السوده اللى البلد فيها , انا عايز كل واحد منكم يسأل نفسه انا شغال ايه والمكان اللى شغال فيه بيعمل ايه لاننا لو مش عاجبنا دور الحكومة وبنقول السياسة بتاعتها هى اللى غلط يبقى لازم على الاقل نعرف سياستنا احنا وعيشتنا صح ولا غلط, معلش الموضوع يمكن غريب او مش مهم بس هو شاغلنى من فترة وقولت اشغلكم معايا

احلام المصريين

مجلس الوزراء بتاعنا اطال الله فى عمره عمل بحث او استفتاء بيسأل فيه عن احلام المصريين , وبصراحة انا بقالى فترة بفكر فى الموضوع ده وشاغل دماغى . الجميل فى البحث انه اكتشف ان معظم احلام المصريين انحسرت على الصحة والستر ورغيف العيش وتحسين التعليم !!!!!! وطبعا ده مؤشر خطير للحاله اللى وصلنا ليها فى بلدنا , عشان المفروض الحاجات دى كلها حقوق مش احلام , واعتقد ان الفرق بينهم كبير !!! يعنى المفروض ان حق كل مواطن فينا انه يلاقى رغيف عيش ادمى ومسكن فى متناول الجميع وحد ادنى من التعليم والرعاية الصحية , لكن لما يوصل بينا الحال ان كل الحاجات دى تبقى احلام يبقى احنا قدام مشكله كبيرة . ولما شوفت صور عن مصر والمصريين من 100 سنة وركزت فى وجوه الناس سألت نفسى , المصريين فى الوقت ده كانوا بيحلموا بأيه ؟ يعنى اى حد فينا يشوف الصور دى يقول اكيد كانت الحياه ساعتها اصعب بكتير من دلوقتى , واحنا عايشين النهارده بناكل وبنشرب وبنلبس وبنتحرك بطريقة اكثر تطور من زمان , بس من ناحية تانية هما مدقوش اكل فيه كيماوى ولا سماد مسرطن ولا شربوا ميه ملوثة ولا اتنفسوا من السحابة السوده !!!! يعنى يمكن حياتهم كانت افضل بكتير من حياتنا . وده يرجعنا تانى لحلم كل واحد فينا , هل فعلا بقى الحلم صعب وبقى مجرد القدرة على الحلم شىء متعب , وهل بقينا بنخاف نحلم ولا عارفين ان احلامنا مش هتتحقق فبقينا بنكسل نحلم , ولا ايه اللى حصل بالظبط !!!! المهم لو حد لسه بيحلم بحاجة يبقى يقولى ومش عايز الكلام بتاع الجرايد , انا عايز الحلم بتاعك الحقيقى اللى قبل ما بتنام او لما بتسرح بتفكر فيه

الـنـصـــر للـحـكـومـــة

استطاعت الحكومة بنجاح ساحق ان تزرع الخوف والشك فى قلوبنا كلنا , فالشعب لازم يعرف ان كل الدول اللى حولينا بتكرهنا وبتحسدنا على النعيم وعلى الجنة اللى احنا عايشين فيها وانهم طمعانين فى ارض مصر الغالية , وطبعا على رأس الدول الطمعانة فى مصرنا الحبيبة ايران !!!!!! وبصراحة الواحد زهق من موضوع ايران ده وانا لا ازعم انى بفهم فى السياسة لكن على الاقل متابع اللى بيحصل وبحاول اربط الخيوط ببعضها , ولو سألنا نفسنا كام سؤال هنشوف الصورة اوضح من غير ما كلام الجرايد يأثر على تفكيرنا , واول سؤال مثلا هو مين اللى فى مصلحته ان علاقة ايران بالدول العربية تسوء ؟ وهل من مصلحة ايران فى ظل عدائها بامريكا والدول الاوروبية انها تعادى كمان مصر ودول الخايج ؟ وهل مطلوب مننا نخاف من اى دولة بدأ يبقى ليها دور هى تستهله فعلا ؟ وهل محاولة امتلاك ايران لسلاح نووى اخطر علينا من امتلاك اسرائيل الفعلى للسلاح النووى ؟ والناس الحلوة اللى بتقول ان لو حصلت حرب بين امريكا وايران دول الخليج كلها هتتأثر بشدة وهتخسر خسائر كبيرة برغم انها مش طرف في الحرب ديه , وطبعا كلامهم مظبوط بس ناقص , وعشان الكلام يكمل لازم نعرف ان امريكا لو ضربت ايران هتضربها من القواعد العسكرية الامريكية اللى فى دول الخليج وطبيعى ساعتها ان ايران ترد على الضرب , وده هيبقى موقف اى دولة غير ايران , يعنى لو امريكا ضربت صواريخ من القواعد دى على الصين او روسيا هل الدول دى هتسكت ولا هترد وتضرب القواعد الامريكية دى بغض النظر عن البلد اللى فيها !!!! وهل من حق دول الخليج انها تسمح بوجود قواعد عسكرية لأمريكا داخل اراضيها ومش من حق ايران الدفاع عن مصلحتها , كل دى مجرد اسئلة الواحد بيحاول يفكر فيها بعيد عن الاعلام الحكومى اللى كله ماشى فى اتجاه واحد بيحدده النظام الحاكم !!!! وقبل ما نخلص من ايران نلاقى حزب الله فى سكتنا وده الحزب اللى بيلاقى شعبية كبيرة فى مصر وزعيم الحزب السيد حسن نصر الله بيحتل لقب الزعيم والمناضل والمقاوم الاكثر شعبية وقبول واحترام فى الشارع العربى والمصرى بالتحديد , طبعا كل الحاجات دى متنفعش ولازم تتغير , فجأه نلاقى السيد حسن نصر الله بيهرب سلاح لغزة عشان حماس تضرب بيه ومصر عرفت الموضوع ده من الاستخبارات الاسرائيلية او الامريكية او من امن الدولة متفرقش المهم انها عرفت , بس دلوقتى فى مشكلة وهى ان الناس لو عرفت ان الموضوع سلاح هيروح لحماس ممكن تتعاطف معاهم , طب الحكومة تعمل ايه ؟ هنا فكرت الحكومة الذكية فى الطريقة الاكثر شيوعا فى العالم وهى طريقة الخوف !!!!! يعنى الناس لازم تخاف على نفسها وعلى حياتها وعلى لقمة عيشها , يبقى الموضوع يتحول من تهريب سلاح لغزة الى عمليات ارهابية فى مصر !!! ايوة كده الموضوع شكله احلى يبقى احنا قبضنا على خلية لحزب الله بأوامر من حسن نصر الله لتنفيذ عمليات من شأنها ترويع المواطنين والاضرار بالأمن العام , واستكمال للمخطط الحكومى تبدأ جميع الجرائد والمجلات الحكومية والبرامج المسموعة والمرئية فى حملة مستمرة لتشويه حزب الله وكل من يسانده , وطبعا الحكاية تلف تلف وترجع لأيران تانى وممكن الحكومة تذيد على الشعر بيت وتقول كمان ان ايران عرضت مكافأة لأغتيال الرئيس مبارك !!!! وسبحان الله الخبر ده مصدرة صحيفة اسرائيلية ومع ذلك مش مهم , اسرائيل برضو دولة صديقة واكيد عايزة مصلحتنا ومش هتقولنا خبر مش مظبوط , طبعا اللى عمله حزب الله ده بالرغم من فكرة مسانده المقاومة فى غزة يعتبر خطأ !!! لاننا وبالرغم من معارضتنا لكثير من افكار وقرارات النظام المصرى إلا ان لمصر سيادة على اراضيها وحتى اشعار اخر فإن الرئيس المصرى هو محمد حسنى مبارك سواء برضانا او غصب عننا فهو الرئيس ولا يجوز ان يتم تهريب سلاح او صواريخ او اى شيء داخل الاراضى المصرية إلا من خلاله , بس فى نفس الوقت لازم يبقى رد فعلنا على قد الحدث يعنى مينفعش حد يطلع على الشاشة المصرية ويقول السيد حسن نصر الله رجل سافل او منافق او خائن !!! لا يصح اننا نعامل حتى اعدائنا بالاسلوب ده , ودلوقتى كل الموجه الاعلامية فى نفس الاتجاه وهى تصفية حسن نصر الله معنويا وتقليل شعبيته فى قلوب المصريين , انا معنديش مانع نختلف معاه بس باحترام وبأدب مش بالشتيمة !!!! وبعدين اللعب على موضوع الشيعة والخطر الشيعى بقى دمه تقيل اوى لانه بقى باين ومكشوف , واكبر مثال على كده ان الاخوان المسلمين لما يتكلموا عن الشريعة والاسلام تلاقى الحكومة ترد وتقول احنا دوله مدنية ومش عايزين خلط بين الدين والسياسة , لكن مع ايران وحزب الله الكلام بيتغير وتلاقى الحكومة يا عينى خايفة علينا وبتحزرنا من المد الشيعى وخطر الشيعة على السنة !!!!! والمشكلة ان الناس بتصدق اللى بتشوفه وتسمعه من غير ما تفكر فيه , وانا مش بتكلم فى الشيعة كعقيدة او مذهب ومش بقول انها صح او غلط انا بس نفسى كل واحد فينا قبل ما يكره حد او ياخد منه موقف يفكر وميصدقش كلام الحكومة فى كل حاجة عشان اللى اتلسع من الشربة مرة واتنين وتلاتة المفروض ياخد باله بعد كده ويفضل ينفخ طول عمره

البحث عن السعادة

تخيلوا ان فى ناس بتقضى عمرها كله بتحاول تلاقى السعادة وبتفشل , وكل النظريات والتوجهات اللى حصلت وبتحصل لحد دلوقتى هدفها الاساسى الوصول الى السعادة , والواحد لما بيفكر فى سبب ارسال الرسل والكتب السماوية ؟ بيلاقى الاجابة هى تنظيم حياة البشر اللى بيوصل فى النهاية الى الوصول للسعادة , احنا بما اننا مسلمين فعندنا من القرأن والسنة اللى ينظم حياتنا الى يوم القيامة مع اختلاف الزمان واختلاف اسلوب الحياة , لكن مع الاسف فى مسلمين كتير مش حاسيين بكده !!!!! مع انهم ممكن يكونوا بيصلوا وبيصوموا وبيعملوا كل الفرائض , بس انا بتكلم على الايمان اللى جوة القلب واللى محدش يقدر يعرفه غير الانسان نفسه وربنا سبحانه وتعالى . حد يقدر يقولى كام واحد مننا مؤمن بجد وحاسس انه صح وانه على حق وان الاسلام هو خاتم الاديان , انا بشوف ناس كتير مسلمين فى البطاقة وبس , محدش يعرف عن دينه حاجة واللى عارف مش بيتعب نفسه ويدور ويقرا ويقارن عشان يبقى عنده يقين انه صح , مع ان الاسلام بيخاطب العقول وبيخليك تقتنع بيه من غير ضغط من حد , وربنا سبحانه وتعالى كل فترة بيأكد لنا ده عشان الناس اللى ايمانها ضعيف تبقى متأكده انها على حق , ومن امثلة كده الازمة العالمية اللى احنا فيها دلوقت واللى اثبتت فشل النظام الرأسمالى , وانا هنا مش بتكلم بشماته بس انا بتكلم عن نظام اوهمونا انه النظام الوحيد القادر على استيعاب المتغيرات , وكان اى حد يتكلم عن الربا والحرام والحلال الف واحد يردوا عليه ويقولوا الدين حاجة والحياة حاجة تانية والكلام ده من 1400 سنة ومينفعش يتطبق دلوقتى !!! فتحصل الازمة ويفشل العالم فى المواجهة ويندهش علماء الاقتصاد عندما يجدوا ان المؤسسات الوحيدة التى لم تتأثر بالازمة هى المؤسسات التى تعمل بالنظام الاقتصادى الاسلامى !!!! وتكتب المقالات فى الغرب التى تدعوا الى العمل بالنظام الاقتصادى الاسلامى لانه الحل الوحيد للخروج من الازمة , واكبر بنوك العالم تنشأ فروع خاصة تعمل بالشريعة الاسلامية , ومن الامثله الاخرى انه وبالرغم من التقدم الهائل اللى حققه الغرب فى مجالات كثيرة إلا انه فشل فى المجال الاجتماعى يعنى المجتمع الغربى مجتمع مفكك , وانا ساعات مثلا لما اشوف الحال عندنا واقف وسن الجواز عدى الـ 30 وبدأت تكتر حوادث التحرش والاغتصاب ساعات اقول بينى وبين نفسى ياسلام لو احنا عندنا العلاقات زى برة وكل واحد يبقى مظبط مع اتنين تلاتة والحياه سهلة لا حد يقولك شبكة ولا مهر ولا انت عليك ايه واحنا علينا ايه والكلام الفارغ ده !!!!!! ويبقى مفيش مشكله انك تعمل اى حاجة مع اى حد فى اى وقت يعنى العملية تبقى ظيطة , بس لما الواحد يركز شوية ويشيل البلاوى اللى فى دماغه ويبص للموضوع كله من فوق هيلاقى ان الغرب بقاله فى الحاله دى اللى هما بيسموها الحرية واللى وصلت للدرجة انهم بيسمحوا بجواز رسمى للمثليين يعنى يبقى الوضوع موثق وقانونى وبيعملوا فرح وزفة كمان !!!!!! الحرية بتاعتهم دى وصلت بيهم لحد فين يعنى لو شيلنا الدين من الموضوع وبصينا على الحياة الغربية دى كتجربة , يا ترى نتيجة التجربة دى ايه ؟ هل هما وصلوا للسعاده ؟ هل هما استريحوا وكل مشاكلهم اتحلت ؟ اكيد الاجابة لأ !!! والدراسات اللى اتعملت عندهم بتأكد وجود مشاكل نفسية كبيرة فى المجتمع الغربى , وحتى الناس اللى متابعين السينيما الغربية هيلحظوا ان فى افلام كتيرة ابطال الفيلم بيروحوا لدكتور نفسى وان الشاب هناك بتلاقيه وصل لسن 40 سنة وهو لسة يعرف واحدة ويقعد معاها شوية ويسبها والست تفضل لسن كبير خايفة تجيب اولاد عشان مش مستقرة مع حد معين فتعمل عمليه وتخلف طفل متعرفش مين ابوه , وتكبر السلسلة لحد ما المجتمع يبقى زى الغابة , اما فى الاسلام فالطهارة والعفاف بيخلى المجتمع متماسك قادر على مواجهة اقسى الظروف , بس مع الاسف مظاهر غربية كتير بدأت تظهر وتنتشر فى مجتمعتنا بسبب الاعلام المغيب والقدوة المفقودة وخوف الحكام من كل ما هو اسلامى !!!! الغرض من الموضوع ده كله ان كل واحد فينا يبقى على يقين انه صح ويشعر بالسعاده انه مسلم

ماذا ننتظر بعد هذة الحياة ؟

المعايير المزدوجة الكلمة دى الواحد بيسمعها كل ما تحصل حاجة , يعنى قرار فى مجلس الامن ضددنا او سكوت من دول العالم عن اللى بيحصل فى فلسطين , المهم اننا ديما بنحط نفسنا فى موقف المظلوم اللى مش عارف ياخد حقه !!! او احنا متصورين كده , ولما الواحد يقعد مع نفسه شوية ويفكر ويشوف المجتمع الغربى عايش ازاى ويلاقى الواحد هناك ممكن يخش السجن عشان ضرب كلب ولا قطة وقلبهم حنين اوى على الحيوانات !!! اقول لنفسى يعنى الكلاب بتاعتهم دى اهم مننا ولا اغلى مننا , بس عشان الواحد يبقى موضوعى لازم يحط نفسه مكان الطرف الاخر ويحاول يفكر زيه عشان يعرف هو بيتصرف كده ليه , انا اخدت بالى من حاجات مهمة جدا لما شوفت برنامج الاستاذ / هيكل على قناة الجزيرة الاسبوع اللى فات وكان بيتكلم عن بدايات تكوين وكاله الاستخبارات الامريكيه , ووقتها بعتوا مندوبين لكافة المناطق الهامة فى العالم لتكوين شبكات هناك واعداد تقارير مفصلة لمعرفة طريقة التعامل مع كل منطقة على حده , المهم فى الموضوع ده التقرير اللى اتكتب عن المنطقة العربية وده كان من اكتر من 50 سنة تقريبا , اللى اتكتب عننا ساعتها مش يفرق كتير عن وضعنا الحالى !!! وخلاصة التقرير اننا شعب فوضوى كسول لا يحب العمل ولا يهتم بالسياسة ويسهل حكمه وهو شعب غير قادر ولا مؤهل للديمقراطية . ياريت كل واحد فيكم يقرأ الكلمتين دول تانى عشان نعرف هما شايفينا ازاى , وعلى فكرة الصورة لحد دلوقتى متغيرتش كتير , بدليل اننا لو عرفنا حجم الانتاج العلمى والبحوث العلمية اللى بيقدمها العرب كلهم على بعض كل سنة هنلاقيه اقل مما تقدمه اسرائيل مثلا فى الشهر , ده غير صورتنا فى الافلام بتاعتهم اللى بتظهر العربى ديما فى السينيما جاهل وغبى وشرير وارهابى يعنى احنا تقريبا ملناش لازمة ونعتبر عاله على العالم , يعنى هما بيشفوا عندنا اثار لا نستفيد منها وارض بها بترول لا نستحقه ولا نستطيع ان نستخرجه بنفسنا !!!!! يعنى ظفر اى كلب عندهم برقبة عشرة مننا , طيب بعد ما عرفنا كل الكلام ده الواحد بقى ميزعلش انه بياخد على قفاه من طوب الارض !!! وحتى لما دولة او حركة عندنا يظهر عليها بعض القوة او الصمود مثل حزب الله فى لبنان او ايران احنا نفسنا ننقسم وكتير يقولوا دول خطر علينا , وده لاننا مش مستعدين نكون اقوياء او حتى حلفاء لفريق قوى بل تعودنا على الاستسلام والتسليم بالأمر الواقع وبدأنا نتعلم بل ونتعود ايضا على ان الثائر عندنا ارهابى وان العار بديلا للعزة والخزى نهاية الكبرياء والخضوع مرادف للكرامة والخيانه اسهل من الصمود !!!! بالله عليكم ماذا ننتظر بعد هذة الحياة

ولــــى الامــــــــــر

انا اسف لكل الناس اللى بتدخل المدونة من فترة ومبتلاقيش حاجة جديدة , بس صدقونى انا مليش نفس اكتب , كل حاجة حوالينا بقت محبطة , وانا شخصيا بقى عندى احباط شديد واحساس بالعجز ادى الى حاله من اللامبالاه , ومن يوم بدايه الحرب على غزة وانا عايز اكتب بس مش عارف اكتب ايه , لقيت نفسى متلغبط ومش فاهم ايه اللى بيحصل , ناس تقول حماس هى اللى غلطانه وناس تقول حماس اتباعت من كل اللى حوليها !!! ناس تقول مصر خاينة عشان قفله معبر رفح وناس تقول لو فتحنا المعبر الناس اللى فى غزة هيهربوا منها ويقعدوا فى سيناء ومش هيطلعوا منها وهو ده اللى عايزاه اسرائيل , ناس تقول حماس والمقاومة انتصروا على اسرائيل وناس تقول اسرائيل عملت اللى هى عايزاه ودمرت كل الانفاق ودمرت اكتر من نصف قوة حماس !!!! ناس تقول احنا مسؤلين عن اللى بيحصل هناك وربنا هيحاسبنا عليه وناس تقول احنا ملناش دعوة واحنا مش قد اسرائيل ولا اللى وراها , الحقيقة الوحيده اللى كلنا عارفينها ان فى اكتر من 1000 فلسطينى مات واكتر من 3000 واحد مصاب , المهم وانا وسط كل ده فتحت كذا موضوع من ناس مختلفة وكانت النهاية ديما بتبقى عند ولى الامر او بمعنى اوضح طاعة ولى الامر !!! يعنى مثلا لو انا قابلت واحد اسرائيلى فى الشارع هل من حقى اقتله او اخده اسير ؟ وده على اساس اننا فى حرب مباشرة مع اسرائيل , وهنا فى ناس هتقول لا مينفعش عشان الاسرائيلى ده واخد الامان من ولى الامر!!!! وبما انى شغال فى مكتب محاسبة فبشوف بعض التعاملات مع الضرائب وجيه فى بالى سؤال وهو هل التهرب من الضرائب حرام ؟ على فكرة الضرائب دى مش امر من ربنا واول حد فرض الضرائب كان سيدنا عمر بن الخطاب , وده معناه انه يجوز لولى الامر ان يفرض الضرائب لاصلاح حال المسلمين , كل ده كلام جميل اوى بس حد يقدر يقولى مين هو ولى الامر وايه الشروط اللى تخليه ولى امر المسلمين ؟ بمعنى لو واحد كسب الانتخابات بالتزوير او عمل انقلاب ومسك الحكم هل ده يخليه ولى امر فعلا ؟ وهل يجوز اطاعته ؟ انا عارف ان يمكن يكون سؤال فقهى اكتر منه جدلى بس انا بفكر بصوت عالى معاكم يمكن نوصل لإجابه