على قد ما الكلمة صغيرة على قد ماهى قالبة الدنيا ... ايه هو الحب ؟ كل واحد ممكن يفهمه من وجهة نظره !! هل الحب اللى احنا نعرفه صح ولا غلط ؟ وانا قصدى من اللى نعرفه يعنى اللى اتربينا واتعودنا عليه ... انتوا عارفين المشكلة ان احنا كل اللى نعرفة عن الحب هو القصص اللى فى الافلام والكلام اللى فى الاغانى والرويات اللى فى الكتب فتخيلوا ان فى اجيال كاملة عرفت الحب من الافلام والاغانى اللى مالية حياتنا يعنى لو الافلام والاغانى دى كدب أو غلط يبقى احنا كل اللى نعرفة عن الحب غلط !!! اوضحلكم انا عايز اقول اية ... لوسألت اى حد اشهر قصة حب نفسك تعيش ذيها هيكون الرد غالبا روميو وجوليت أو قيس وليلى مثلا !!! تصوروا بقى ان الاتنين منتهوش بالجواز واغلب قصص الحب المشهورة اللى نعرفها انتهت بالفشل وده المفروض يخلينا نفكر لو ابطال القصص ديه كملوا مع بعض كانوا هيستمروا !!! اعتقد انتوا بدأتوا تفهموا انا عايز اوصل لأيه ... عارفين فى احصائية ان فى حالة طلاق كل ست دقايق ومعظم الحالات من المتزوجين حديثا وكتير منهم متجوز عن حب !!! الحب اللى عارفينه من الافلام ... كل ده لو ربطناه ببعض هيوصلنا لنتايج مهمة وهى اولا ان الحب اللى فى الافلام والاغانى اغلبه مبيحصلش وإن حصل مبيستمرش ... تانى حاجة إن الارتباط السليم الناجح مبنى على حاجات مهمة ومش منها الحب بتاع الافلام ... تالت حاجة إن اختيار شريك الحياة لازم يبقى على اسس اهمها الدين والاخلاق وده الامل فى تكوين اسرة صحيحة ... اخر حاجة انا نفسى نفكر فى كل حاجة فى حياتنا من أول وجديد ونحاول نفهم كل حاجة حوالينا حتى لو قالولنا انها هى كده ونغير أى حاجة شايفين انها عايزة تتغير ومنقولش هى طول عمرها كده ... يمكن ساعتها الحياة تتغير للأحسن
الأربعاء، ٢٦ ديسمبر ٢٠٠٧
الـــحـــــــب
الاشتراك في:
تعليقات الرسالة (Atom)
هناك ٢٦ تعليقًا:
انا أعرف ان إلى يحب حد مبيشوفش اى حاجة غلط فيه بيخده على عيبه يعني لان اكيد بجانب العيوب ديه فى مميزات تانيه كتير جذبتهم لبعض ولو هما بجد بيحبوا بعض هيستحملوا وكملوا يواصلوا مع بعض الحياه للنهايه بحلوها ورمها ده إلى انا شيفاه من وجهة نظرى ممكن يكون فى حد ليه وجهه نظر اخرى بس زى ما قلنا قبل كده فى موضوع سابق الحب ليه انواع واشكال كتيرة وصعب اننا نشرح ازاى نحب ونعرف اذا كان الحب صادق ولا لا >>>>>>>>>>>> رحاب
الموضوع ده عايز سنين نتكلم فيه لان كل واحد فى الدينا له وجهة نظر مختلفة عن التاني حسب تربيتة المجتمع العايش فيه الثقافات المختلفة وحتى الافلام والاغانى على رأيك .
بس انا اعتقد وجود تشابة في بعض الخصائص في كل الدنيا مع اختلاف الثقافات منها انك عايز تشوف التحبه على طول ديما شيفة اجمل البشر احلى عيون اعزب صوت واكيد لازم يبقى في تضحية من الطرفين علشان محدش كامل (الارسول الله ع ص س )يعني لازم تضحي ببعض الي كنت بتحم بيه في شريك حياتك مش لازم تكون ملكة جمال لبنان مثلا المهم انك تكون متأكد انها بتحبك اكتر منك ومستعدة تضحي من اجلك عايز اذود حاجة انا عارف اني طولت عليكم استحملونى , 1- تاكد ان كل واحد واد 24 قراط موزعين على صفاته البشرية اي الناس كلها متساوية ومتباينة فى الصفات 2- مقولة قالتها ست عجوزة محدش بيتجوز غير مراته
عندك حق فى كل كلمه بتقولها
وللاسف مش الحب بس اللى فيه حاجة غلط
كل حاجة فى حياتنا حلوة
بنخربهاوبنفقد مذاقها
حتى الحب اللى بيحلى حياتنا مش عارفين نحافظ عليه ولا نصونه
ويوم ما نلاقيه بيتدى التمرد بين الطرفين
تحياتى ليك
اعتقد انه من الخطا ان الاعتقاد ان استمرار الحياه بين طرفين لازم يكون اساسه الحب
اه الحب لازم يكون موجود لكن في موده في رحمه في تواصل في حاجات تانيه كتيييير اوي
اما ما نسمعه من اغاني وبنشوفه في الافلام وبنقراه في قصص الحب قديما وحديثا هذا ليس بحب
الحب الحقيقي لما يدخل دوامه الحياه ومعترك العيشه
ونشوف حيصمد ولا لا
واديكي قلتي ان اشهر قصص الحب اللي اتكتبت لم تنتهي بالزواج
ايوه كده حلوه نوعيه البوستات دي
KEEP IT UP
انا اعرف لك الكلمة من وجهة نظرى
هى احساس وشعور بين قلبين
تشعر اليدان باللهفة عند اللقاء والرجفة عند الفراق
مودتى
حضرتك تقصدى الحب مجردا
ام ارتباطه بالزواج واستمراره
الحب ان لم يتواجد بين الزوجين ستتعرض حياتهم لهزات وهانت من اخف الصدمات
ممكن القول ان الحب لي هو الشىء الوحيد الذى تسير به الحياه الزوجية
هناك اشياء اذا تجمعت وفرت للحياه استقرارها
اهمها المودة والرحمة
التكافؤ هو ميزانها
تحياتى
ما اعتقدتش ان الحب كلة افلام واغانى عشان دة مش حقيقي والحب الحقيقى هو احساسيس ومشاعر صعب تتوصف وصعب يكون حد شبة حد كل واحد بيحب على طريقتة ولازم اللى يحب ينتازل شوية عشان عمرة ما ح يلاقى كل اللى بيحلم بية فى شخص واحد بالرغم من اللى بيحب مش بيشوف عيوب اللى بيحبة وربنا يوفق كل اتنين بيحبوا بعض وتنتهى العلاقة بالجواز ان شاء الله
الرسول عليه الصلاة والسلام فضل يحب السيدة خديجة بعد ما توفاها الله ولم يكن يحب ان يتكلم عنها احد بشئ
يعنى الحب له معايير اخرى بخلاف اللى بتتسمع فى الاغانى واللى بتتشاف فى الافلام
الحب اللى بيتولد بعد الجواز بيدوم العمر كله
انا بشكر كل الناس اللى علقت على الموضوع بس المشكلة انه يظهر انا مقدرتش اوضح انا عايز اقول ايه كويس
اللى كنت عايز اوضحه ان الزن على الودان امر من السحر فمن كتر سماع الاغانى ومشاهدة الافلام اللى كلها بتتكلم عن الحب بطريقة واحدة خلتنا نفترض شكل معين للحب وده من وجهة نظرى سبب فى مشاكل كتير اخرها انتشار ظاهرة الطلاق فانا كنت عايز اعرف هل حد مشاركنى فى الرأى ده ولا مختلفين معايا
بص انا هقولك ياحدوته0هو الحب بتاع الافلام ده ممكن يكون موجود بس نادر أوى0أما الاغلب هو الحب العادى 0يعنى لوسابو بعض هيشغلو اغنية أعتبرو قلب وراح على دمعتين وخلاص0بس أنك تتجوز صالونات وتحس كده انك شواله بطاطا جايين يعينوه0أظن ده الى بجد حرام0
فى جواز صالونات بينجح وبيكون أحسن كتير من الجواز عن حب لأختيار الصح
حدوته عندها حق ان اغلب زيجات هذه الايام لا تستمر طويلا وده علشان الناس فكره الحب ذي ما بتشوفه فى التلفزيون فى الاغاني والافلام الجبتنا ورا عشان الحب الي في الاغاني غير صحيح ولا صادق علشان هوه بيعتمد علي المظهر فقط يعني البنت تكون جميله جدا بغض النظر عن التربية ولبسها الهي مش لبسها اصلا وديما الحب بتشوفه حب من اول نظره وده مش صحيح ديما لانه بيعتمد عل المظهر ودلع البنت وقصر الجيب او ضيق البادي وكوافير الشعر الي قعد ساعة يكوي فيه علشان تطلع شبه اي مغانيه جديده وديه فكره غلط وغداها البنات اليومين دول من الاغاني طيب ليه ميجبوش قصه شاب حب بنت علشان هيه محترمة وهيه حبته علشان هو راجل يعتمد عليه مش علشان حلو شبه الاجانب وراكب عربيه ومعلى الكاست ليه؟؟؟؟؟؟؟؟
حد يقولي ليه واذي نصحح الفكرة الغلط ؟؟؟
فى ناس كتير بتعتقد ان الحب عبارة عن كلمه حلوة او لحظه جميله بين اتنين شوق ولهفه للقاء وعذاب والم عند الفراق ودة اكيد الاغانى والمفهوم السائد عن الحب هو سببه
بس اظن ان الحب اكيد اعمق بكتير من كده
ممكن من تصرف يبان معنى الحب
ومن تصرف تانى يبان حاجه فيها شبه من الحب
الحب شئ اعمق واكبر من ان حد يقدر يلاقى كلام يوصفه بيه
حاجه مش بتموت مع الوقت
ممكن تقل اه وترجع تزيد اه وتقل تانى وهكذا
لكن عمر الحب الحقيقى مابيموت
وطبعا دى وجهات نظر
بوست جميل وبيناقش فكرة ممكن كل واحد يكون فاهمها بمعنى مختلف
كلامك سليم والله
عارف
انا اليومين دول متابعة مسلسل كورى تاريخى بيتكلم عن قصة واقعية لاول طبيبة فى التاريخ الكورى
اسمه جوهرة فى القصر
المهم ان المسلسل ده بيتكلم عن قصة حب بتقع بين البطلة والبطل الى هوا من طبقة النبلاء قديما
عايزة اقولك انها تعتبر احلى واجمل قصة حب بريئة اتصورت على التليفزيون
حب مليان تضحية واحترام للمبادئ والاخلاق
مين يقدر يضحى بسعادته عشان اى حد اليومين دول؟
مين يقبل انه يتعرض لخطر الموت او النفى عشان حد بيحبه اليومين دول؟
الحب مش بس اهواء وشهوات بتروح بعد اول يوم زواج
الحب احساس ابعد من كونه ساعة بين الزوج والزوجة
الحب احساس قوى زى حب الام والاب مينمحيش مليان احترام للطرف التانى وبالتالى متقدرش تغلط فيه زى ماهو ميقدرش يغلط فيك ومادام مفيش اى غلط بين الطرفين ميحصلش كره ومينتهيش
انا مجربتش الحب عشان ملقتش حد يفكر فيا ككيان محترم برئ ..اكتر الشباب بيفكر هياخد ايه من البنت دى سواء شئ مادى او شهوانى
كمان فى بنات تفكيرها مقارب للمصلحة اكتر من الاحساس فى الزواج
انا واحدة من الناس مستنية الشخص الى يستاهل اضحى عشانه
بوست اكتر من رائع
ضى القمر
كلام جميل بس مين اللى يفهم ويحس
البنت الشلبية
منورانا وياريت يكون البلوج عجبك ومتكنش اخر زيارة
وانشاء الله هتلاقى الشخص اللى بتتكلمى عنه لان الطيبين للطيبات
سورى يا حامد بس والله أنا مشفتش الموضوع دة غير دلوأتى والله وكتبت الموضوع اللى فى السايت التانى من غير ماعرف أى فكرة عن موضوعك بس والله الموضوع جامد أوى ويستحق المناقشة
نور الله
الحمد لله على سلامتك
انا قلت انتى نسيتي المدونة بس ولا يهمك ويا رب يكون الموضوع عجبك وعايز اعرف رأيك فيه ايه
عزيزي صاحب المدونة
عزيزتي صاحبة المدونة
========================
نتشرف بدعوتك لافتتاح
دار الكتب
هي حلم صاحب البوابة الذي تحقق
طريقة مبتكرة لتوثيق الكتب العربية و نشرها بين الناس بكل سهولة و يسر والدمج بين دور النشر المختلفة لسهولة البحث لاي قارىءوالنشر لاي كاتب
الافتتاح يوم الخميس 10-1-2008
في مكتبة البلد 31 شارع محمد محمود امام الجامعة الامريكية
الساعة السادسة مساءا
يلا نشارك مصطفى فرحته بتحقيق الحلم
ازيكو يا جماعة عاملين ايه؟ الموضوع ده جامد أوى وأنا كنت لسة بفكر في نفس الموضوع
عجبتنى أوى جملة قالتها اليسا فى أغنية أواخر الشتا
على سهوة ليه الدنيا بعد ما عشمتنا وعيشتنا شوية رجعت موتتنا والدنيا من يوميها يا قلبى عودتنا لما بتدى حاجات أوام تاخد حاجات
بس عندى تعليق صغير
الناس المتشائمة بس هى الى بتقول كدة وغير كدة كمان ان فى ناس كتير انا كنت واحدة منهم هما الى بيحطو نفسهم فى المود ده
بس الصراحة أنا شايفة ان الدنيا مش هى الى بتاخد وبتدى لان ربنا هو الى بياخد وبيدى وربنا لما بياخد حاجة مننا لازم بيدينا حاجة أحسن منها أو بيشيلهالنا للآخرة.
ايه الجمال ده ربنا يكملك بعقلك لو كل الشباب بتفكر كدة كان الحال اتغير يا ريت متنسيناش ونشوفك فى المدونة علطول
ايه الجمال ده ربنا يكملك بعقلك لو كل الشباب بتفكر كدة كان الحال اتغير يا ريت متنسيناش ونشوفك فى المدونة علطول
انا حابب اكوووووووووون حلو معاكو ومش هأذيكو المره دي بس المره الجاية مش هاسيبكوا ....... يارجاله اوي
ياراجل صلي ع النبي وتف من بقك , ازاي تقول الكلام ده . داحنا من غير الريس ماينفعش نعيش ده احنا حتي مانعرفش نعمل لنفسنا بيضتيييييين , ربنا يخلي الريس وينجحله عياله ويستره من فوق ومن تحت وربنا يستر .
فع
للاسف انته بتتكلموا فى موضوع يسمى بمرحلة تانية للحب المفروض نتكلم الاول عن الطرق اللى جاء بسببها الحب ...
للاسف المنتشر دلوقتى هو حب الtake awayدلوقتى مصدر الحب عند اى اتنين وخاصة من سن 13الى 19 سنة طبعا هتستغربوا من سن 13 بس والله ده منتشر جدا دلوقت واللى يحير ان الحب دلوقتى بقى مصدره حاجات هايفة من الاتنين اما عاجبها تسريحة شعره ولون عنيه واما عاجبه مشيتها ولما يحصل ده يعتبروا نفسهم وجدوا الحب الصحيح كل ده يقع تحت تعبير اختروعوه الشباب كحجة لغلطهم وهو (اهنا زمايل ودى زى اختى )ويتصرفوا مع بعض على انهم خلاص مخطوبين!!!!!!!!! وهما بيعملوا كل حاجة فى واللى اعرفه ان اللى يخاف يعمل حاجة قدام الناس يبقى بيعمل حاجة غلطاأكيد..عارفين لو كل واحد فكر مع نفسه شوية هيوصل للصح يعنى لو البنت اقتنعت ان بمصاحبتها لشاب ده بيقلل من قيمتها قدام نفسها وكل الناس طبعا لما تبان حقيقتها وهتكتشف انها كانت سلعة خلت الشباب يبيعوا ويشتروا فيها ان كانت تنفع ولا لا لتكون زوجة وفى الاخر بتبقى هى بواقى السلعة دى الفاسدة وطبعا مفيش حد يرضى انه يشترى سلعة فاسدة الناس عمالة تقلب فيها وتركت البواقى الفاسدة ............اتمنى ان كل واحد يفكر بعقله,,,,,,,,,,,
بعد كده بقى نقدر نتكلم عن الحب ظروفه
إرسال تعليق