اولا احنا أسفين على التأخير وعلى فكرة ده مش اهمال او كسل بس فعلا الايام اللى فاتت كنا كلنا مشغولين جدا وبجد البلوج وحشنا وان شاء الله مش هنتأخر تانى .
ثانيا يمكن انا كنت بحاول وانا بكتب المواضيع اللى فاتت انها تكون مواضيع عامة بس اسمحولى اكتب المره دى عن تجربة شخصية انا عيشها بقالى فترة ولسة مكمل فيها.
يمكن اللى متابع البلوج معايا من زمان يعرف انى دخلت مكان معين غصب عنى وهقضى فية سنة كاملة انا مش هقدر اكتبه بوضوح عشان المشاكل وعشان الموضوع ده حساس جدا بس انا واثق فى ذكاء اصدقاء حدوتة وعارف انهم هيفهمونى.
انا لما عرفت انى داخل زعلت جدا بس قلت تجربة وأكيد هتعلم منها بس مكنتش متخيل اللى بيحصل جوة !!! انا مش هحكى تفاصيل بس الاجمالى ان المكان ده عبارة عن منظومة من
(التهريج المنظم) الكلمة دية انا سمعتها اول ما دخلت . الاول مكنتش فاهمها بس بعد كده فهمت . عارفين انا حاسس انى عايش فى فيلم وكل اللى فية بيمثلوا على بعض وكلهم عارفين ان ده تمثيل وانه كدب بس مجبرين انهم يكملوا وبما انى اصغر واحد فى المنظومة ديه ذى الكومبرس يعنى مالوش اى قيمة فالكل ( بيحط عليه ) مهو الحيطة المايلة .
يمكن لو بتعلم حاجة او بستفاد حاجة او هما بيستفادوا منى بحاجة مكنتش زعلت بس اهو وقت وبيضيع من العمر اكتر ما هو ضايع !!! بس الواحد لازم يقول اللى ليه واللى عليه انا برضه اتعلمت شوية حاجات ذى الكدب – الجبن – انك تعامل اللى قدامك بحترام مع انك مش بتحترمة وهو عارف كده بس عادى هو عارف انه مش محترم وعارف انك عارف كده بس مش قادر تتكلم والعملية ماشية وكل ما تكلم حد يقولك حاول تخلص السنة بتاعتك من غير مشاكل .
انا سمعت كذا تفسير للى بيحصل هناك بس اكتر تفسير عجبنى ان الغرض من الموضوع كله احتواء طاقة الشباب يعنى الواحد بيبقى طالع من الكلية كله احلام وطاقة عامل ذى القنبلة يخش جوة يا باشا يادوب شهرين تلاتة يكون اتظبط هناك بيعملولك فسسسسسس
فتطلع من جوة مالكش نفس تعمل اى حاجة . بس هنعمل اية اهى برضه تخليص ذنوب
ملحوظة : لو سمحتوا وانتوا بتكتبوا التعليقات بلاش تقولوا احنا بنتكلم على اية
وذى ما فهمتونى انا هفهمكم .
الأحد، ١١ نوفمبر ٢٠٠٧
التهريج المنظم
الاشتراك في:
تعليقات الرسالة (Atom)
هناك ٢٤ تعليقًا:
يا سيدى حمداً لله على سلامه المدونه وسلامتك احنا كنا خلاص فقدنا الأمل فى أنكط هتكتب موضوع تاني أو حتى نعرف أنك عايش وربنا يعدى الـ 293 يوم إلى باقين على خير اما بقي بالنسبه للسبب إلى بيخلي ايام المكان ده طويله هو التجربه الجديده إلى انت بتمر بيها يعني من بعد ما تكون وسط أهلك وبيتك واخواتك تلاقي نفسك فى عالم تاني خالص مفهوش تفاهم يعني مفيش ياما ارحميني اوامر ولازم تتنفذ يعني كنت الأول تعترض وتقول الأكل ده لا واللبس ده لا وتتأمر اهو بقي جرب علشان تعرف الحياه مشيا اذاه وعلى فكره في ناس كتير خارج هذا المكان عايشه كده يعني عيشتهم سوووووووووووووواد واديك جربت وشفت بعنيك يمكن تتعلم وتعرف تتحمل المسئولية شوية وتبطل استهتار وتعرف ان الله حق ومره تانيه حمداً لله على سلامتك وسلامه المدونه
امممممممممممممم
كان الله في العون
الف حمد الله علي سلمتك يا حمادة على فكرة التجربة كويسة في حاجات ووحشة قوي في حاجات تانية .
كويسة انك بتعتمد على نفسك في حاجات جديدة عليك وبتخليك تنظر للدنيا بشكل تاني ممكن شكلها يبقى وحش وممكن شكها يبقى حلو بس فى النهاية هي تجربة لازم اغلب الشباب يشفوها ويجربوها .
ملحوظة : انا مجربتش ومدخلتش فى الموضوع دة الحمد لله اخوك الحاج
يا سيدى الفاضل الضربة اللى مش بتقسم الضهر بتقويه وانت دلوقتى عمال تاكل ضرب فاما تصبر وتقوى نفسك على كدة وتكون عارف انك فعلا فعلا استفدت حاجات كتير جدا مش هاتحس بيها دلوقتى او هايتقسم ضهرك وتخلص
وبعدين اسال اى واحد قبلك ومر بالمرحلة دى وشوف تعليقه على الموضوع ده ايه
وبعدين حط فى دماغك حاجة مهمة جدا ان ربنا قال ( ولقد خلقنا الانسان فى كبد ( فاحمد ربنا ان الكبد جالك وانت عندك القدرة على الصبر والتحمل
يا الف حمد لله على السلامة .... ويا رب متغيبش عنا تاني
بالنسبة للموضوع اللي انت طارحه انا مش شايفة انه حاجة شخصية ولا حاجة بالعكس انت كويس انك اتكلمت فيه علشان الشباب هما كمان لما يمروا بالمرحلة ديه يعرفوا ازاي يتصرفوا..
شوف يا عزيزي الدنيا هتلاقي فيها حاجات كتير و مسئوليات كتير و احتمال برضه تواجه مشاكل فصدقني التجربة اللي انت بتمر بيها دلوقتي هتفيدك في حياتك جدا
بمجرد من انك هيكون عندك الاصرار و العزيمة انك تتخطى المرحلة ديه هتبقى قوة تحملك تضاعفت و بالتالي بعد ما هتخلص السنة يوم ما هتواجهة اي مشكلة هتحس انها جنب المعاناه اللي انت عشتها مشكلة بسيطة و بالتالي مش هتلاقي مشكلة تعجزك او مسئولية تهرب منها لانك اخدت مناعة
ان شاء الله الموضوع هيعدي و هتطلع منه بأكبر استفادة ممكنه بس المهم الاصرار و الهزيمة ميضعفوش .... و ربنا يقويك
يااااااااااااه اخيرا ظهرت
لا بجد وحشتنا مواضيعك
بس المرة دى الموضوع نار
انا طول عمرى اسمع ان اللى بيدخل المكان ده بيطلعوا رجاله على حق
وبجد شكل الرجاله الى طالعه جميل جدا
فهى خلطه من الجبن والكدب والله اعلم اية تانى
بجد ربنا يستر على الجيل بتاعنا
واحمد ربنا انك طلعت حيطه مايله يعنى انت المظلوم مش الريس وتبقى انت الظالم
يلا هنقول ايه
حمد على سلامتك ومتغبش عنا تانى
مع تفهمى للتغيير الحاد فى وتيرة حياتك ونمط معيشتك قد يكون الشىء الوحيد الذى اتعاطف معك فيه ان يكون الانسان محترما ومعتزا بنفسه وبعد خوضه للتجربة التى تتحدث عنها قد يشعر ببعض او بكثير من المهانة التى يعلم تماما انه لا يستحقها ولكن دعنى انبهك لشىء مهم جدا وهو ان اى تجربة شبيهة بذلك لابد ان يكون لها وجه ايجابى ولابد ان نتعلم منها اشياء مهمة قد لا تشعر بذلك الان ولكن صدقنى ستحصل على خبرات تراكميه تثقل شخصيتك وتذيد من دوائر معرفتك بالحياه ويوم تتاكد من ذلك وتحس به ارجوك ساعتها افتكرنى
خليك دايما ذي الخادم الي دايما بيقول لعله خير ....... فاكر القصة دية لو مش عارفها ابقى قولي وانا احكيها
لعله خير
أولا انا بشكر كل الناس اللى علقت على الموضوع ومبسوط جدا بالكلام اللى سمعتة وعايزكم تدعولى
ثانيا انا بتأسف على التأخير فى كتابة الموضوعات الجديدة بس انشاء الله مش هنتأخر تانى على البلوج
انا عارف إن فى ناس زهقت وبطلت تخش بس انا متأكد انهم هيرجعوا تانى بأذن الله
اكيد الناس اللي اعتقدوا انك مش هترجع تكتب تاني بطلوا يدخلوا بس متقلقش اكيد هيدخلوا تاني علشان انت فعلا مواضيعك منستغناش عنها
المــهـــم حمد لله على سلامتك و متتأخرش عنا تاني
منور المدونة يا اسكندراني
السلام عليكم بجد يا حاج انا مش عارفه قصه الخادم ده ممكن تحكيها لو سمحت ومبروك التغيير الجديد للمدونه
may be i know what we are talking about but their a tuny proplem we talking about something in the system if we trying become agnest that may be become we in history that all .... el masry
> عشان أنت مصرى لازم تعانى
> وتفقد كرامتك بكل المعاني
> وتحرق فى دمك سنين مش ثواني
> وأوعى تصدق كلام الاغانى
> بتاع الحضارة وكانى ومانى
> ده كله هجايص ما يدخل ودانى
> عشان أنت مصرى العذاب بيناديك
> بتبداء فى يومك حاجات بترا زيك
> فى نومك فى قومك تعكنن عليك
> تضايقك ولسه العماص فى عينيك
> مافيش ميه تشطف صابونه فى أيديك
> وجسمك ملزق وريحتك عاديك
> فتلبس وتنزل وفيك اللى فيك
> ورايح لشغلك حتحتاج مواصله
> أدى المترو واقف وكهربته فاصله
> وفى الميكروباص فى خناقه وحاصله
> أوتوبيس فرامله عايزالها وصله
> وتوك توك ده تايه ومحتاج لبوصلة
> بتوصل لشغلك بدم أتحرق
> فى زحمه وكتمه وحر وعرق
> رئيسك سايبلك كومه ورق
> ده غير دمغه ضايعه وملف أتسرق
> وفى كام مواطن عاملك قلق
> بيشكى تقول له روح اند عق
> وعركه وهوجه وشاي اندلق
> ومخك خلاص من الصداع أتفلق
> هترجع لبيتك ده لو كان فى بيت
> هتوصل هتندم ياريتك ما جيت
> مرآتك بتصرخ خلاص استويت
> عيالك بتطلب وهات كيت وكيت
> تزعق تهاتي يا ناس اتهريت
> ولاحد سامعك مهما هاتيت
> عشان أنت مصرى وده للأسف
> فلازم تاسى تعيش تتقرف
> وكل الاساسى فى حياتك ترف
> فتنسى الكرامة وتنسى الشرف
> وتسرق وتنصب أو تنحرف
> ودمعك بيجرى وجرحك نزف
> مش أنت اللى مصرى؟؟؟ جتك القرف
على فكره ده مش كلامي بس على قد مازعلت من الكلام على قد ما حسيت قد ايه إلى كتبه بيعاني قولولي رأيكم أيه فيه
الله ينور عليكى انتى عارفة انا كان نفسى مين يسمع الكلام دة مصطفى كامل كان قال بعد كدة ( لو لم اكن مصريا لوددت ان اكون من الامارات او الكويت او قطر او البحرين ) بس الله يرحمة مات ايام الرخص قبل الخصخصة والحزب الوطنى واللى بالى بالك
مش عارفه ليه يا حامد انا مش شايفه نفس غير مصرية بكل العيوب إلى فى مصر بس اكيد مش مصر بس إلى فيها عيوب بلاد تانيه كتير فيها بلاوى مش عيوب بس مش ظاهرة يعني بمعني اصح إلى يشوف بلاوى الناس تهون عليه بلوته وادى احنا عايشين فيها بحلوها ومرها بخيرها وشرها يمكن يجي يوم ونلاقي فيه تغيير يرضينا بس أكيد أكيد هيجي اليوم ده .
حدوتة 0طبعا انت دخلت السيكو السيكو بس يابنى معملتش تاجيل ليه ده ناس كثير اوى عملت 0ياعنى حظك وحش0يله علقة تفوت ولا حد يموت0واسمع كلام زميلك عدى الليلة على خير0يعنى لو الباشا بعتك تجيب خضار للمدام مفيش مانع تقشره0وهو كله فى الاخر عشان مصر0ولا ايه0
مساء الخير عليكم جميعا ... أحب أهني زميلي في (التهريج المنظم) محمد حامد على مجهوده الرائع ده و أتمنى أكون صديق دائم ليكم
(زميل الكفاح ...عمرو)
الى بينى وبينى شكرا على زيارتك البلوج ويا رب نشوف تعليقاتك ديما
بما انك عارفة السيكو سيكو فياريت تشوفيلى واحد من اللى عملوا التأجيل يعملى اتنين معاه يا يقولى بيتعمل فين وانا اعمله بس انا اذاى فاتنى موضوع التاجيل دة كان لازم اعمله بس معلش الدنيا تلاهى
بس هانت ناقصلى 278 يوم بس
الى صديقى الجديد فى البلوج
وحكمدارى فى السيكو سيكو عمرو
أهلا بيك فى المدونة ويا ريت منشوفكش كتير عشان متبقاش فى وشى صبح وليل وكل نباطشية وانت طيب حول
ان لأحد الملوك وزير حكيم وكان الملك يقربه منه ويصطحبه معه في كل مكان. وكان كلما أصاب الملك ما يكدره قال له الوزير “لعله خيراً” فيهدأ الملك. وفي إحدى المرات قطع إصبع الملك فقال الوزير “لعله خيراً” فغضب الملك غضباً شديداً وقال ما الخير في ذلك؟! وأمر بحبس الوزير …
فقال الوزير الحكيم “لعله خيراً”
ومكث الوزير فترة طويلة في السجن.
وفي يوم خرج الملك للصيد وابتعد عن الحراس ليتعقب فريسته، فمر على قوم يعبدون صنم فقبضوا عليه ليقدموه قرباناً للصنم ولكنهم تركوه بعد أن اكتشفوا أن قربانهم إصبعه مقطوع..
فانطلق الملك فرحاً بعد أن أنقذه الله من الذبح تحت قدم تمثال لا ينفع ولا يضر وأول ما أمر به فور وصوله القصر أن أمر الحراس أن يأتوا بوزيره من السجن واعتذر له عما صنعه معه وقال أنه أدرك الآن الخير في قطع إصبعه، وحمد الله تعالى على ذلك.
ولكنه سأله عندما أمرت بسجنك قلت “لعله خيراً” فما الخير في ذلك؟
فأجابه الوزير أنه لو لم يسجنه.. لَصاحَبَه فى الصيد فكان سيقدم قرباناً بدلاً من الملك… فكان في صنع الله كل الخير.
ارجو انت تكون اعجبتك وتأمل في ان الله يكن لك كل خير
������ ���� ������� ����� ����������
������� ���� ������ ����� ������
طبعا زى مانت عارف وكمان زى ما كلنا عارفين
it`s afree country and we are allowed to say what we want and to have afree speech,any way
لازم تحط فى دماغك (ان الله لا يضيع أجر من أحسن عملا)وربنا يهون علينا يا رب
وحمدلله على سلامتك وان شاء الله نسمع عنكم أخبار حلوة على طول يا رب
Gostei muito desse post e seu blog é muito interessante, vou passar por aqui sempre =) Depois dá uma passadinha lá no meu, que é sobre frases e poesias, espero que goste. O endereço dele é http://mil-frases.blogspot.com. Um abraço.
إرسال تعليق