الأربعاء، ١٩ سبتمبر ٢٠٠٧

خمسة ايمان

كل سنة وانتم طيبين ورمضان كريم ...............وبمناسبة رمضان والجو الايمانى اللى بنعيشه قلت اتكلم فى موضوع يناسب الوقت ده ونريح شوية بقة من الاختلاط والارتباط والمشاكل اللى انتم عارفينها انا هتكلم عن القرءآن على فكرة انا مش هخطب بس هدردش شوية . قريت مرة ان كل دين ليه معجزة اتعملت والناس شافوها فى وقتها اما الاسلام فمعجزته باقية لحد يوم القيامة لان معجزته هى القرأن . طبعا احنا عارفين ان القرأن كلام ربنا وانة كتاب عظيم وكل يوم العلماء بيكتشفوا فيه حاجات جديدة بس هل احنا حاسيين بده بجد؟ يعنى مثلا اغلبنا فى رمضان بيختم القرءان مرة على الاقل بس كام واحد فينا بيقرا بتمعن وبيحاول يفهم ويحس بالكلام ؟ يعنى فى بداية الاسلام كانت الناس بتسلم عشان سمعت اية واحدة وحست ان الكلام دة قوى قد ايه وانه مستحيل يطلع كلام بشر عادى وكان الكفار بيحاولوا يقلدوه ومش عارفين ولحد دلوقتى ناس كتير فى الغرب بيدخلو الاسلام عشان سمعوا اية وحاسوا انه كلام عظيم !!!! احنا فين بقة من كل دة هقولكم حاجة ناس كتير مننا لو سمعوا كلام اغنية او قروا بيت شعر حلو يتأثروا اوى وممكن ناس تدمع من الكلام طب اشمعنة!!!!!!!!!!!! طبعا انا مبقارنش بس انا بدى مثال عشان اسهل الموضوع عارفين المشكلة فى اية ؟ فى اللغة العربية بتاعتنا احنا لغتنا رايحة فى داهية من العامية الى عامية العامية لحد مانسينا اللغة الاصلية اللى احنا المفروض نعيش بيها ودة سببه حاجات كتيرة ذى الاعلام والتعليم وتاثير الغرب المهم ان احنا وصلنا لدرجة ان اللغة العربية بقت تقيلة علينا اوى اوى......... فنيجى نقرأ منفهمش وتعودنا على كدة خلاص وبنقول لنفسنا دة كلام كبير واحنا بنقراه عشان الثواب وكل حرف بحسنة وكدة يعنى مع ان فهم الكلام ده مهم جدا عشان كدة عايزين نعمل حاجة سوى فى رمضان دة كل واحد بعد ما يخلص الموضوع دة ينوى على انه كل يوم على الاقل ربع ساعة يفتح المصحف ويحاول يفهم المعانى ويستطعم الكلام وصدقونى هتحسوا انكم بتشفوه لاول مرة وبقد ايه ان الكلام ده حلو وان لو جمعوا كل شعراء العالم مش هيعرفوا يكتبوا ولو اية بالجمال ده جربوا وقولولى النتيجة وادعولى............

هناك ١٣ تعليقًا:

غير معرف يقول...

اكيد ان القران حاجة عظيمة اوى بس المشكلة مش فى الغة العربية بس المشكلة ان الشباب بقت عايشة مجرد انها عايشة وخلاص ما فيش حد بيعمل حاجة ل اخرتة مع ان القران دة بيشفع للانسان فى الاخرة وكمان الشباب دلوقتى مابقاش عندهم وعى دينى كفاية و بتكسل حتى تقرا قران ولو حتى حد فكر يقرا قران او يصلى لازم تلاقى عندة مشكلة او حاجة واول ماتتحل خلاص ينسي ربنا والصلاة والقران لازم كلنا نفكر فى الاخرة شوية على اد ما بنفكر فى الدنيا ومشاكلها

غير معرف يقول...

الموضوع فعلا جميل يا جماعةويا رب يتحقق فينا فهم معانى القران العظيم
بس فى حاجة مهمة جدا
بلاش تبقى خمسة ايمان وبس
خليها عشرة
او حتى مائة عام
طول ما احنا عايشين ان شاء الله
اللهم يا مقلب القلوب والابصار ثبت قلوبنا جمعيا على الايمان

Unknown يقول...

والله عندك حق الواحد بدا ينسى اصل الكلام واصبح حاليا فى مصطلحات غريبه بتفرض نفسها علينا وللاسف احنا بنسمحلها بده
والمفروض فعلا كل واحد يبدا يتعلم ازاى قراءه القران وتجويده بشكل صحيح
عن تجربتى اختلف الامر معايا كتير بعد تعلم جزء من التجويد ومحاولة تطبيقه بشكل صحيح قدر الامكان
حقيقى بتفرق كتير
جزاك الله خير على الموضوع الجميل ده
تستحقى التحيه

غير معرف يقول...

الموضوع ده محتاج مننا وقفة ...
ساعات كتير بفكر في الناس اللي أسلمت علشان سمعت اية. الناس دي ما كانتش تفهم حاجة عن القران و مع ذللك فهمته أحسن من كتير مننا. علشان القران قبا ما يخاطب مشاعرهم خاطب عقلهم , ففكروا , و اقتنعوا و حسوا انه ما ينفعش يكون غير كلام ربنا فامنوا بيه.
المشكلة مش بس اللغة العربية الفصحى , المشكلة أن فيه مسلمين كتير بالبطاقة بس , اتولدوا في بيت مسلم و أهلهم قالولهم أنتو مسلمين و خلاص كده , كان الله بالسر عليم .
الفكرة اللي أتعرضت رائعة و أنا عملتها قبل كده و حسيت اني مبسوطة قوي .
جرب كدة تمسك القران كأنك واحد أجنبي .مش فاهم حاجة فيه و عايز تعرف الكتاب ده عبارة عن ايه . ما تهتمش في الأول أنك تقرا كمية , بس اهنم بأنك تفهم اللي تقراه حتى لو كان ايه أو ايتين . حتى لو كان فيها معاني صعبة , مش مهم , كل ما كانت صعبة و حاولت تفهمها ثوابك حيزيد , أسال ناس , دور في النت , المهم انك فعلا تكون فاهم كل اللي فريته. و لما توصل للمعنى حاول تحلل و تستنتج و تحس بالمعنى قوي , ساعتها بجد حتحس باحساس رائع .

غير معرف يقول...

و فعلا للأسف ممكن ناس تتأثر بكلام أغنية و متتأثرش بالقران. بس علشان هم ميعرفوش ايه هو القران .
ربنا انزل القران مش بس علشان يكون اعجاز , ولكن طمان علشان يكون رسالة من ربنا لينا . عارف لما تحس ان اللي خلقك و يعرف كل حاجة حصلت و حتحصل في حياتك باعتلك رسالة و انت متعلمتش تقرا, حتحس ان فيه حاجة ناقصة في حباتك , في حاجة مش مظبوطة .
ممكن أه تبكي و تتأثر قوي لما تسمع أغنية . عارف ليه؟ مش بس علشان لغتها ساهلة , و علشان انت مستعد نفسيا أنك تسمعها و تتأثر بيها بشكل معين .
اللغة ممكن تكون صعبة على ناس كتير بس لها حل , اللي ناقص بقى هوالاحساس .
ربنا يوفقنا جميعا و يجعلنا من الخاشعين المتدبرين لمعاني القران .

غير معرف يقول...

اولا كل سنة و انتوا طيبين و بالصحة و السلامة
الموضوع فعلا حيوي جدا و مهم جدا بس يا اسكندراني انا كنت عايزة اقولك حاجة ... حكاية ان فهم القران صعبة مش بس علشان اللغة العربية لأ علشان افكار الناس دلوقتي و تأثير الشيطان عليهم و لو حد عرف يفتح المصحف من الشيطان هيقرأ بسرعة و يمر مرور الكرام
يا جماعة انا عايزة اقول مش عيب لما نسأل مش عيب لما نحاول نعرف انا واجهت المشكلة ديه في رمضان اللي قبل اللي فات و بعد اول ختمة للمصحف وانا ببدأ التانية قلت لأ كفاية مش هينفع اقرا كلام مش فهماه و فعلا جبت مجموعة كتيبات صغيره لعمر خالد و اللي بتقول معاني السور و مجمل المواضيع اللي بتدور في السور و ابتديت أقرأ السورة و انا فهماها لحد الحمد لله ربنا الهمني للمصحف المفسر اللي هوه موجود فيه معاني الكلمات و فعلا كان مفيد جدا بجد حاولوا تيجبوه و هتحسوا فعلا معنى كل كلمة في الكتاب العظيم ده
أسال الله ان يتقبل منا الصيام و القيام و يبلغنا ليله القدر

اسكندراني اوي يقول...

التدبر في معاني الفران هو الهدف
ايه المعنى اني اقلراه كله ومش فاهم منه حاجه
اكيد الفهم والتدبر والعمل فبما جاء في الايات هو الهدف
بوست قوي جدا
لكي كل التحيه

الطائر الحزين يقول...

وانا فى بداية قراءة التدوينة قلت ساقوم بالرد أن الحل هو الرجوع لأصل اللغة العربية
فوجدتك قلتى الحل فى التدوينة نفسها

ولأن اللغة العربية كانت فطرة عندهم
تعرفى حضرتك أن الكلام كان غير منقوط يعنى ليس عليهانقط والقرآن كذلك وكان الناس يقرأونة هكذا
تخيلى حضرتك النعمة التى نحن بها

دعوة للتمسك بلغتنا
الله المستعان

بارك الله فيك

الفراشة الصغيرة يقول...

جزاك الله خيرا
البوست حلو قوى
حاسه فيه حلاوة الايمان والشعور بالقران
وجمال رمضان
يااااااااااااااه مفيش احلى من الايام دى

غير معرف يقول...

كل سنه وانتم طيبين الموضوع جامد مووت ويارب يجعل ايامنا كلها رمضان ويجمعنا علي الخير دايما وان شاء الله ربنا يهدينا ونعمل بالقران عشان نحس بجمال الاسلام ويارب نهتدي برسولنا اللهم اجعل القران حجه لنا وليس علينا جزالكم الله خير

غير معرف يقول...

اللهم اجعل القران حجه لنا وليس علينا

Love & Friendship,this is my life يقول...

جزاكى الله كل خير على الموضوع المهم ده
دى اول زيارة ليا فى مدونتك لكن اكيد مش هتكون الاخيرة ان شاء الله
مدونتك جميلة واسلوبك رائع :)

حنين يقول...

جزاكم الله خير البوست جامد جدا وياريت تبقوا في تغير مستمر