حدوتة 2029

كل سنه وانتم طيبين والسنه الجاية بإذن الله كل واحد فينا يكون حقق كل اللى بيحلم بي انا فضلت افكر اكتب عن ايه فى راس السنة لحد ما جاتلى فكرة حلوة اوى ياترى لو ربنا كتب ليا العمر وفضلت اكتب فى المدونة دى كمان 20 سنة يعنى سنه 2029 ياترى هاكتب عن ايه ساعتها وايه المواضيع اللى هتكلم فيها انا جبت شويه نماذج لمواضيع وعناوين انا متخيل انها هتبقى موجوده فى 31/12/2029 تم انتخاب الرئيس محمد حسنى مبارك للفترة العاشرة على التوالى ليصبح اطول رئيس دوله فى العالم جمال مبارك فى الاهرام ليس لدى النيه ولا الرغبه فى منصب اكبر من منصب نائب الرئيس احمد فتحى سرور يعلن بدأ الفترة البرلمانية الجديدة فى مجلس الشعب من غرفة الانعاش الاهلى يفوز على الزمالك سبعة صفر واصابه بعض جماهير الزمالك بأزمات قلبيه نظرا للفاجعه مرتضى منصور فى مؤتمر صحفى بعد الهزيمة سوف اقوم برفع قضية على الحكام والجمهور وارض الملعب المنتخب الوطنى لكرة القدم يفشل فى الصعود لكأس العالم للمرة العشرين على التوالى استمرار حبس ايمن نور بتهمه تجارة وتوزيع المخدرات داخل السجن فوز كل من ابن كمال الشاذلى وابن صفوت الشريف وابن زكريا عزمى بمقاعد فى مجلس الشعب بالتزكيه بوليس الاداب يقبض على 100 عضو من جماعة الاخوان المسلمين بتهمه الفعل الفاضح فى الطريق العام احمد عز فى البيت بيتك ليس معنى امتلاكى لكل مصانع الحديد والاسمنت والبلاط والسيراميك والادوات الكهربائية والصحية فى مصر انى محتكر ولكنى رجل اعمال ناجح اعمل بكل شفافية ومصداقية احتراق قطار متجه من اسوان الى القاهرة ووفاه 480 راكب وتصريح حكومى بأن السبب هو حرارة الجو غرق عبارة اكتشف انها مملوكة لابن ممدوح اسماعيل ووفاه جميع الركاب واتهم القبطان بالسبب فى الحادث مصر تحصل على المركز الاخير فى جميع المسابقات الدوليه ووزير الشباب يتهم الحكام بالرشوة وزير الثقافة فاروق حسنى رغم اصابته بالزهيمر من خمس سنوات إلا انه يحكم الوزارة من بيته جمعيات المرأة تطالب بعمل قانون يعطى الحق للزوجة فى اخد مرتب الزوج واعطائه مصروف محدد شهريا وزير التربية والتعليم يعلن بمد الثانوية العامة لتصبح اربع سنوات لخدمة المذيد من الطلاب فى احد المستشفيات العامة دكتور ينسى جونتى ومشرط ومقص وبعض الشاش والقطن فى بطن مريض ثم يحصل على ترقية ليصبح مدير المستشفى سقوط احد الاطفال فى بلاعة بدون غطاء فى منطقة شبرا ليصبح عدد الموتى فى هذة البلاعة فقط 42 شخص وتصريح لرئيس الحى بأحتمال ان هذة البلاعة قد تكون مسكونة والعياذ بالله تذايد الشروخ فى هرم خفرع لكن وزير الاسكان يطمئن الشعب بأن هذة الشروخ ليست إلا ترييح حيطان اغتيال كل من عمرو اديب ومنى الشاذلى فى يوم واحد والداخلية تقبض على الجانى فى خلال عده ساعات واتضح انه احد المختلين عقليا تسمم اكثر من 1000 مواطن نظرا لوجود الكثير من الصدأ فى ماسورة مياه عموميه والمسؤليين يصرحوا بأن الصدأ ده من زمان وموجود فى كل المواسير واكيد فى سبب تانى حجاج القرعة المصرية يجلسون على الارض منذ اكثر من شهر فى الموانى السعودية والحكومة تصرح بأنها ودتهم ونسيت تجيبهم سقوط اكثر من 500 شهيد فى قطاع غزة بينهم 200 طفل وجميع الدول العربية ترسل بأدانه وشجب لأسرائيل مبارك فى حوار صحفى نرجو اسرائيل ضبط النفس ونجدد على ان السلام هو الخيار الاستراتيجى الذى نتمسك به دائما ايران فى السى ان ان امتلاكنا للسلاح النووى هو دفاع عن الاراضى الاسلامية فى العلام كله وزير الدفاع الامريكى خروجنا من العراق وشيك الحزب الوطنى يعلن الفوز الكاسح فى انتخابات مجلس الشعب بالرغم من حصوله على نسبة 12 % من الاصوات تمت الانتخابات البرلمانية تحت شعار الدهن فى العتاقى القبض على مواطن قام بتهريب 20 رغيف من الفرن ليلا ضابط شرطة يقتل موطن فى الشارع لان المواطن سأل الظابط الساعة كام سأل صحفى وزير الداخليه عن عدد المعتقلين فى مصر فرد الوزير مبتسما بأن العدد فى اللمون وزير الاعلام مسأله غلق المدونات مسأله وقت مسؤل فى وزارة البيئة يصرح بأن السحابة السودة ليست ضمن اختصاصات الوزارة اسرائيل تشكر الجهات المصرية بعد انتهاء اخر شحنة من الغاز المصرى المصدر لها وتصرح بأنها والنظام المصرى اصدقاء وحلفاء بالرغم من انتهاء الغاز من الاراضى المصرية تحويل مشروع توشكى الى مقلب زباله كبير يسع زباله مصر والامم العربية جميعا مسؤل فى الجامعة العربية يصرح بأن مشروع السوق العربية المشتركة حلم قريب المنال عمرو دياب يضع اللمسات الاخيرة فى البومه الجديد ويصور احدث كلباته فى دار المسنين السعودية تقرر ان اول ايام رمضان كان امس وليبيا تبدأ رمضان اول امس اما مفتى الديار المصرية فقد قرر ان اول ايام رمضان هو غدا بإذن الله احتفالات راس السنة تتم فى حضور لفيف من رجال الحزب الوطنى والحكومة والذين احتفل اغلبهم فى المستشفيات نظرا لسوء حالتهم الصحية

اعــــرف نـفـســـــك

• بما اننا فى ايام مفترجة وكل سنة وانتم طيبين انا كان فى سؤال بقاله فترة فى دماغى
• وسألت كذا واحد من صحابى وكل واحد قالى إجابه مختلفة
• زمان فى حصة الجغرافيا فى المدرسة كان لما المدرس يتكلم عن بلد معينة كان بيبدأ كلامه بأن البلد دى بلد زراعية او صناعية وتتميز بكذا واهم صادرتها كذا والكلام ده
• حد يعرف يا ولاد بلادنا الحبيبة مصر تصنيفها ايه بالظبط ؟
• يعنى احنا بلد زراعى ولا صناعى ولا تجارى ولا ايه ؟
• والسؤال ده مهم جدا عشان نعرف احنا عايشين ازاى ورايحين على فين ؟
• يعنى لو احنا بلد زراعية كان المفروض تبقى كليه الزراعة من كليات القمة وكانت تبقى وزارة الزراعة من الوزارات السيادية فى البلد وكان يبقى عندنا علماء فى مجال الزراعة واساليب الرى والحوارات دى
• وطبعا بما اننا معندناش الحاجات دى يبقى احنا مش بلد زراعية
• ولو احنا بلد صناعية كان المفروض يبقى عندنا ماركة عالمية مصرية معروفة فى صناعة معينة زى السيارات او الاجهزة الكهربائية او الالكترونية
• وطبعا احنا معندناش الحاجات دى يبقى احنا كمان مش بلد صناعية
• يبقى مفيش غير اننا بلد تجارية والتجارة هى الاعتماد الاساسى اللى قائم عليه اقتصاد البلد
• وطبعا لو شوفنا حال البلد هنعرف ان اغلب الشعب المصرى لا يهوى التجارة ولا يمارسها واغلب رجال الاعمال يا امه حرامية يا امه حواليهم شبوهات كتير
• امال احنا يا ولاد بلدنا الغاليه دى بلد ايه بالظبط
• انا سامع واحد فيكم بيقول بلد حرامية !!! يمكن انا مقدرش اقولك لأ
• بس انا مش عايز اتكلم فى السياسة ولا على الحزب الوطنى
• انا عايز اتكلم فى مشكله الشباب الاساسية اللى هى من وجهه نظرى اهم من مشكلة الحزب والحكومة
• احنا مشكلتنا تنقسم الى قسمين التربية والقدوه
• انا شايف ان اغلبنا اتربى غلط او بطريقة مش صح وده عشان اهلنا من الاصل اتربوا على حاجات زمنها خلص وانتهى
• اول الحاجات دى اعتقاد الاب والام ان مستقبل الابن فى احدى كليات القمة اللى انا مش عارف اساسا مين اللى خلاها قمة
• زى كليه الطب او الهندسة او الشرطة وده حلم اغلب الامهات انها تشوف ابنها مهندس او دكتور او ظابط
• وكأن مفيش وظايف محترمة فى الدنيا غير الوظايف دى وبدون ادنى محاولة فى معرفة ميول الابن او اتجاهه
• وده طبعا بيخلى العيال فى ثانوية عامة بتموت نفسها عشان تلحق كليه من الكليات دى ويا سلام بقى لو مجبتش مجموع يدخلك طب ولا هندسة او معندكش واسطة تدخلك شرطة
• يبقى خلاص كده حياتك انتهت وتصاب بحاله اكتأب من حاله الصدمة اللى عند ابوك او حسرة القلب اللى عند امك
• وبعدين تحس ان كل الكليات شبه بعض يعنى تجارة زى حقوق زى اداب زى علوم مفيش فرق بينهم
• وتبدأ حاله اللامبالاه وتبقى بتدرس عشان يبقى معاك شهادة وخلاص
• تانى حاجة اغلب الطلبه مبتشتغلش اثناء الدراسه او فى فترة الصيف ودى مشكلة تانية لان الشاب بيتعود على الانتخة والقاعدة على القهاوى النهار كله
• ده بعكس الطالب اللى بيشتغل لان الشغل بيعلم حاجات كتير
• تالت حاجة انتظار الوظيفة الحكومية والسعى المستميت للحصول على اى فرصة فى الحكومة حتى لو فراش
• على اساس إن فاتك الميرى
• كل الحاجات الى فاتت دى الواحد اتربى عليها من وهو صغير
• القسم التانى من المشكله هو القدوة وانا مش قاصدى ان واحد يقولى انا بابا هو قدوتى والحوارات دى
• انا قصدى مين فينا شاف اى حد سواء اخوه او قريبه او جاره حتى
• خلص دراسته بعدين اشتغل من غير واسطة بعدين جهز نفسه واتجوز من غير مساعدة اهله
• يعنى التسلسل ده ينطبق على كام واحد شوفتوه انا اعتقد ان العدد قليل قوى
• عشان كده الحماس اثناء الدراسة تقريبا معدوم عشان مفيش حد قدامك ذاكر ونجح واتجوز وانت عايز تبقى زيه
• ده حتى الافلام اللى الواحد بيشوفها تلاقى البطل يا امه اساسا هو غنى ومش محتاج
• يا امه فقير بس اتعرف على بنت راجل غنى وابوها كان رافض جوازهم بس فى الاخر انقذ البنت واتجوزها
• نادرا لما تلاقى قصة واحد بدأ عادى واشتغل واتجوز من غير معجزة فى الفيلم
• الخلاصة عشان انا عارف انى طولت عليكم
• كل واحد فينا عنده موهبة بس يا مش عارف يكتشفها يا مش عارف يستغلها
• اعرف موهبتك واعرف تنميها وتسوقها ازاى واعرف مين اللى محتاجها
• لو انت لسة بتدرس حاول تحب اللى انت بتدرسه وتتميز فيه عشان توصل فى الاخر
• لو مش قادر يا امه تحول كليه تانية يا امه تكمل الكام سنة اللى نقصاك
• بس فى خلال الفترة دى لازم تعرف انت بتحب ايه وتحاول تتعلم اللى ناقصك فيه
• اشتغل اى حاجة ومتستناش شغل الحكومة واى حاجة هتشتغلها هتفيدك
• لو مش فلوس هيبقى علاقات وخبرات حياتية واحتكاك مباشر مع الحياة العملية اللى بتختلف كليا عن الحياة الدراسية
• قبل ما تقول البلد مافيهاش شغل اعرف انت عندك ايه بالظبط . شوف ايه اللى مطلوب وشوف ايه اللى انت تقدر تقدمه
• شهادة الكليه مش نهايه تعليمك , خد كورسات , قوى الانجليزى بتاعك , اتعلم كمبيوتر
• محامى متميز احسن من مهندس عادى, ومحاسب شاطر احسن من دكتور خايب
• غير من نفسك ومن نمط حياتك وشوف الدنيا من كذا زاوية
• قرب من ربنا وقوى علاقتك به عشان كلنا مليانين بلاوى محدش يعرفها
• على فكرة دى مش حكم ومواعظ والله دى افكار لتجارب منها شخصية ومنها حياتيه
• وكل سنه وانتم طيبين

الـمـوظــــف والـزعــــيــــــــــم

والله انا مش عارف ابدأ منين , بس انتم عارفين الجماعة بتوع لجنة السياسات دول بيفكرونى بواحد واخد محل بوضع اليد ومش عارف يعمل فيه ايه يعنى لا عارف يشغله ولا عايز يسيبه لحد يعرف يشغله , مره يفتحه ملابس بعدين المحل يخسر يروح فاتحه مطعم برضو يخسر يروح قلبه قهوة برضو يخسر !!! كل ده واصحاب المحل الاصليين لا قادرين يخدوا المحل من الراجل ده ولا عارفين يعملوا حاجة . يعنى الساده ولى العهد جمال مبارك وسمو الشيخ بطرس غالى وصاحب المعالى محمود محى الدين الثلاثى المرعب اللى بيسهر ليل نهار فى سبيل إسعاد الشعب المصرى واللى قايد صوابعه السبعة شمع عشان ينورلنا حياتنا اكتر ماهى منورة !!! فضلوا من كام سنة يتكلموا عن السوق الحر والاقتصاد الرأسمالى واللامركزية والكلام اللى بالكم منه ده . وطبعا حبايبنا الحلويين بيسقفوا ويهللوا على الفكر الجديد اللى هيوصل مصر الى بر الامان وهيطلعنا من عنق الزجاجة اللى بقالنا عشرين سنة جواها !!! وبعد الازمة الاقتصادية العالمية التى اثبتت فشل النظام الرأسمالى عالميا واثبتت ايضا ان لجنة السياسات رضى الله عنها وارضاها لا تعلم عن الاقتصاد اكثر مما يعلم اغلب المصريين البسطاء !!! ثم جائت الفكرة اللولبية الجهنمية ببيع ما تبقى من القطاع العام من شركات خاسرة ( ولازم برضو نعرف ان الخسارة دى نتيجة الادارة الفاسدة اللى الحكومة هى اللى حطاها مش احنا ) المهم قرروا يا ولاد يبيعوا الشركات دى ويوزعوا صكوك على الشعب اللى هو اساسا صاحب الشركات دى يعنى هيبعولنا شركات بتاعتنا فى الاساس !!! وكل واحد ياخد الصك بتاعه ويعمل فيه اللى هو عايزه ويقال ان الصك هيبقى بـ 400 جنيه عموما انا مخبيش عليكم انا داخل جمعية بصكين قصدى بنفرين وهقبضها على العيد اهو الواحد برضو يجيب طقم ولا حاجة تنفع !!! يا جماعة الناس دى بتهرج كل يومين يطلعوا بتقليعه جديدة انا كنت كتبت قبل كدة انى شايف مصر بتتحكم يوم بيوم يعنى مفيش تخطيط ولا رؤية لمستقبل البلد وهنا المشكله ان اى حاجة من غير تخطيط بتبقى نهايتها الفشل وطبعا كل المظاهر اللى حوالينا بتدل على الفشل ده وربنا يستر . مصر دلوقتى محتاجة زعيم وقائد الناس تتلف حواليه لان مع كل الاحترام والتقدير للرئيس مبارك انا بحس انه دايما بيتعامل بعقليه موظف حكومى بس البلد مبقتش محتاجة موظف دى محتاجة واحد عنده فكر بيحلم ويثور وعلى فكرة ده مش شىء مستحيل ولا حاجة , كل اللى محتاجينة واحد يطبق العدل والحرية بس مش اكتر من كده والله العدل والحرية كافيين انهم يغييروا البلد كلها

الـقــاهــــرة والـنـــــاس

كنت فى القاهرة من كام يوم , وانا مضحكش عليكم مش من عشاق القاهرة !!! بالعكس ده انا بروح ديما مجبر او مضطر عشان اخلص اوراق فى مصلحة حكومية او زيارة لصديق وببقى رايح غصب عنى يمكن لأنى متعصب لاسكندرية او مش متعود على زحمة ودوشة القاهرة او مش متعود على السحابة السودة بصراحة فى اسكندرية السحاب عندنا ابيض !!!!! عموما مش هو ده موضوعنا اكتر حاجة باخد بالى منها لما بروح هناك وشوش الناس بحس قد ايه الناس حزينة او على الاقل مش مبسوطة انا عارف ان اغلب المصريين شقيانين ومطحونين فى الشغل عشان يادوب يعرفوا يعيشوا بس بجد الناس بقى شكلها وحش كل واحد ماشى سرحان ومكشر وشايل هم الدنيا كلها والشباب برضو نفس التكشيرة ونفس السرحان وتحس ان عنده خمسين سنة مفهوش روح ولا طعم الشباب وده يخلينا نسأل نفسنا هل احنا بقينا خلاص شعب حزين ويائس ؟ يعنى لو عملنا استفتاء وسألنا الناس اللى فى الشارع سؤال بسيط قوى وهو انت مبسوط ولا لأ ؟ تتوقعوا النتيجة هتبقى ايه !!! والسؤال ده جاى فى وقت الحزب الوطنى ببيعمل المؤتمر بتاعه وعمال يتكلم عن انجازات اتحققت واحلام هتتحقق !!! والمشكلة ان احنا عمالين نتكلم فى تفاصيل ونسينا الحقيقة الاساسية وهى شرعية الحكم بمعنى اوضح انت بتحكمنى على اساس ايه ؟ وبأى شرعية ؟ يعنى عبد الناصر كان بيحكمنا بشرعية الثورة والشرعية دى انتهت فى نكسة 67 , والسادات حكمنا بشرعية حرب اكتوبر والشرعية دى انتهت بمعاهدة السلام , اما مبارك فبدأ حكمه بفكرة إعادة البناء واسترجاع طابا ومن ساعتها كل سنة يفكرونا بالضربة الجوية اللى حققت النصر !!!! وكأن الحرب كلها انحصرت فى الضربة الجوية عشان كده شرعية حكم مبارك انتهت من زمان والبلد فى تراجع يوم بعد يوم . وبعدين ايه فايدة الارقام اللى بنسمعها عن معدل النمو وزيادة التجارة الخارجية والاستثمار اذا كانت النتيجة فى الاخر ان الناس ماشية فى الشارع بالشكل ده يعنى انت بتحكم شعب مش قادر توصله انجازاتك اللى بتتكلم عنها ده لو فى انجازات اصلا . دى امريكا بكل ما تتمتع به من ديمقراطية وتطور شافوا ان لازم يحصل تغيير فى شخصية وتفكير الرئيس !!!! شوفوا كام رئيس امريكى اتغير فى عهد الرئيس مبارك , الحكام عماله تتغير فى العالم كله واحنا لسه بنقول اللى نعرفه احسن من اللى منعرفوش . وقيادات الحزب الوطنى فى اغلب البرامج الاعلامية بتقول مين فى مصر اللى يقدر يمسك الرئاسه غير مبارك بحكمته وخبرته وكأن الثمانين مليون مصرى خلاص مفيهمش غير مبارك وده كلام يدعوا الى السخرية لما تحاول تختزل بلد عمره اكتر من 5000 سنة فى شخص واحد مهما كان هذا الشخص ومهما كان يتمتع بخبرات ومميزات يبقى انت بتقضى على البلد دى . والسؤال اللى بيدور فى بالنا كلنا دلوقتى ايه الحل ؟ او نبتدى منين ؟ او احنا فى ادينا ايه ؟ انا مش هضحك عليكم واقول انى اعرف الاجابة بس على الاقل لازم نحس ان احنا نستاهل نعيش احسن من كده وكل واحد يتقى ربنا فى اى حاجة بيعملها لان الحاكم الظالم ده عقاب من ربنا , وكيفما تكونوا يولَى عليكم يعنى احنا برضو بينا وبين بعضنا بنظلم بعض فطبيعى ان الظلم يبقى علينا كلنا . اخيرا اللى يقدر يقول لأ فى الزمن ده يبقى انتصر على حاجات كتير قوى جواه

بين الرضا والطموح

الموضوع ده بقاله فترة شاغلنى وبعدين اتكلمت فيه مع واحد صاحبى قال كلامى فيه زى الافلام العربى القديمة وانى بقول حكم ومواعظ لا وجود لها على ارض الواقع . الموضوع بكل بساطة انى كنت بشوف حلقة من حلقات تفسير القران للشيخ الشعراوى وكان بيفسر ايه من الايات وراح حكى حكاية اثرت فيا اوى

قال ان كان فى واحد مؤمن قاعد بيصطاد على البحر

جالو واحد وقاله انت عمال تصطاد من بدرى والسمك اللى طلعته يادوب ما تجيب شبكة احسن عشان تصطاد سمك كتير

المؤمن قاله وبعد ما اصطاد سمك كتير

الراجل قاله هتكسب كتير وممكن تشترى قارب

المؤمن قاله وبعد ما اشترى قارب

الراجل قاله القارب هيخليك تصطاد اكتر وممكن تشترى مركب كبيرة

المؤمن قاله وبعد ما اشترى مركب كبيرة

الراجل قاله ساعتها هتكسب اكتر وممكن يبقى عندك اسطول مراكب صيد

المؤمن قاله وبعد ما يبقى عندى اسطول مراكب

الراجل قاله ممكن ساعتها تبقى اغنى راجل فى العالم

المؤمن قاله وبعد ما ابقى اغنى راجل فى العالم

الراجل قاله هتبقى سعيد ومبسوط

المؤمن قاله وهو بيبتسم ما انا سعيد ومبسوط دلوقتى

الحكاية بسيطة بس عميقة فى نفس الوقت وفيها افكار كتيرة بس اللى يركز فيها كويس

الفكرة الاولى ان غاية اى انسان فى الدنيا هى البحث عن السعادة يعنى كل الحاجات اللى انت بتحاول تعملها المفروض انك بتعملها عشان تبقى مبسوط يعنى لو نفسك تبقى غنى مثلا ومعاك فلوس كتير يبقى انت عايز الفلوس عشان تجيب كل اللى نفسك فيه فتبقى مبسوط

طب ممكن الواحد يبقى مبسوط وهو مش غنى يعنى معاه اللى يادوب مكافيه بالعافية

ولو فرضنا ان ده ممكن !!! وكان فى واحد كده ومبسوط يبقى ايه الفرق بينه وبين اغنى راجل فى العالم مدام الاتنين مبسوطين

مش عايز حد يتحمق ويقولى انت عبيط !!! ازاى الاتنين زى بعض والغنى بياكل احسن اكل وبيشرب احسن شرب وبيلبس احسن لبس وبينام على حرير والتانى الفول والفلافل هريين باطنه ومبيشربش غير الشاى وعنده طقم صيفى وطقم شتوى

معلش خدنى على قد عقلى وحاول تتخيل معايا لو الغنى ده عنده كل الحاجات اللى قولنا عليها دى وعايش مبسوط والفقير يا دوب عايش بالعافية وبرضو مبسوط يبقى ايه الفرق بينهم !!!

الفكرة التانية ازاى نعيش ويبقى عندنا طموح وفى نفس الوقت عندنا رضا باللى ربنا قاسمه

يعنى تبقى بتشتغل وانت راضى بحالك بس فى نفس الوقت عايز تعلى وتكبر فى شغلك ويكون نيتك فى ده انك مش عايز حد يهز ايمانك ويغريك بحاجة مش معاك فيلهيك عن طاعة الله

انا عارف ان الموضوع كبير وعايز الواحد يقعد مع نفسه ويتأمل ويفكر

خدوا بالكم التأمل ده نوع من العبادة يعنى انك تفصل نفسك عن الناس شوية وتقعد لوحدك تبص للسما وتفكر وتحس قد ايه انت صغير وضعيف وقد ايه ربنا كبير وشايفك بتعمل ايه وصابر عليك ده شىء مهم جدا ويا ريت كلنا نحاول على قد ما نقدر حتى كل يوم خمس دقايق بس نقعد لوحدينا ونفكر والله حاجات كتير قوى فينا هتتغير

اسف لو طولت عليكوا بس يا رب تكون الفكرة وصلت

بحبك قاااااااااااااااااااااااااد كده

الاول كل سنة وانتم طيبين اكيد بمناسبة العيد يعنى

معلش انا اتأخرت شوية بس الصراحة امى عمله كحك تحس ان فيه بنج موضعى

يا دوب تاكل اتنين تلاتة ويجيلك غيبوبة علطول

كتير قوى بنسمع وبنقول الجملة دى لما حد بيسألك بتحبنى قد ايه ؟

تقوله بحبك قاااااااااااااااااااااااااااااااااااااااااااااااااااااااااااااااااااااااااااد كده

طب كده دى قد ايه يعنى محدش يعرف !!!! انا بقه قريت موضوع عن درجات الحب

يعنى بعد ما تشوف البوست ده اعرف نفسك فى اى مرحلة بالظبط

او لو حضرتك زى حالاتى كده وعلى دكة الاحتياطى برضو خد فكرة

ومفيش حاجة بتخسر الايام دى ويمكن تستخدمه فى يوم من الايام

1- الـــهــــــــوى

الهوى اول درجات الحب يعنى الشرارة الاولى

2- الـــعــــــلاقــــــــــة

اذا سيطر الهوى عليك اصبح علاقة ومش عايز دماغكم تروح لبعيد المقصود هنا الحب اللازم للقلب

3- الــــكـــــلــــــــــف

اذا اشتدت لوعة العلاقة اصبحت كلف وهو شدة الحب

4- الــــعــــــشـــــــــق

اذا زاد الكلف عن ذلك اصبح عشق وهو شده الالتصاق بالحبيب ومحدش يفهم الالتصاق ده غلط اصل انا عارف دماغكم

5- الـــــشــــعــــــــف

اذا بدأ القلب فى الاحتراق من لوعة الحب مع الشعور بلذة يبقى حضرتك فى مرحلة الشعف يا باشا

6- الـــلــــــــوعـــــــــــة

وهى الهوى المحرق وبمعنى اخر ان يستولى الحبيب على قلبك يعنى من الاخر جابك سكة ومش هتعرف تخلع منه خلاص

7- الـــــــشـــــــغــــــــف

الشغف هو ان يبلغ الحب شغاف القلب اى جلده الداخلى يعنى يبقى دخل جوة قلبك واتربع كمان

8- الـــــــجـــــــــــــــوى

الجوى هو الابتلاء بمرض الحب بمعنى انك لو بصيت فى اى حتة هتشوف حبيبك قدامك برضو يعنى مفيش فايدة خلاص

9- الــــــتـــــيـــــــــــــــــم

وهو استعباد الحب ويكفينا الله شر الاستعباد

10- الــــــــتـــــــــــبــــــــــــــــل

وهو ان يمرضك الهوى فتصبح شخص متبول اى مقبل على فقدان عقلك !!!! شوف انا عمال احزرك وانت برضو مصمم

11- الـــــتــــــدلــــــيـــــــــــــه

وهى ذهاب العقل من شدة الهوى وهى دى النتيجة خلى بقة حبيبك ينفعك ساعتها وابقى قابلنى لو كمل معاك اساسا

12- الــــهـــــيــــــــام

وهو ان تذهب على وجهك لغلبة الهوى عليك وتصبح شخص هائم او هيمان وطبعا ساعتها مش هتلاقى حد جمبك عشان هتلاقى نفسك زى يحيى الفخرانى فى اخر لقطة من مسلسل شرف فتح الباب

نداء هام الى كل الحبيبة اللى معانا فى المدونة

من هنا ورايح لما حد يسألك بتحبنى قد ايه ؟ فكر كويس وافتكر الـــ 12 درجة

وقوله وانت واثق من نفسك ونافش ريشك على الاخر

حبك خلانى فى مرحلة الشغف او اللوعة او الجوى او التيم

ومش عايز استعباط وواحد يقولى ده انا فى مرحلة الهيام بقالى سنين انا عارف الحركات دى كويس

والنبى لو حد جرب الطريقة دى ونفعت معاه يقولى

اخوكم غلبان برضو ويستاهل النصيحة

قطايف رمضان

الاول كل سنة وانتوا طيبين ورمضان كريم

انا عارف انى اتأخرت بس معلش من اول رمضان وانا مأنتخ على الاخر

وعموما انا قولت لنفسى انزل تاج واهو حاجة خفيفة برضو

بس المشكلة انى مجاليش تاج من حد بقالى فترة

لكن بما انى واحد من كبار كبار المدونين قولت فى بالى يا واد يا استاذ محمد

متعمل انت التاج وانشره وخلى الناس تاكل عيش برضو

والعملية مش عويصة هما عشر اسئلة زى شكة الدبوس

اول خمس اسئلة بيكشفوا على الحاله المزاجية للانسان

يعنى لو الخمس حاجات دول انت مظبوط فيهم هتلاقى نفسك مبسوط

ولو فى حاجة فيهم مش مظبوطة هتحس بأن فى حاجة نقصاك

نبتدى على طول ونبطل رغى عشان انا اساسا زهقت

ســ 1 : الحالة الجسمانية بمعنى هل سيادتك تتمتع بصحة جيدة ولا الاخ صاحب مرض ؟

جــ 1 : الحمد لله انا خرجت من الجيش بدون اى خساير

وبغض النظر انى خسيت 13 كيلو ولونى تحول من القمحى الى البنى المحروق

انا بخير وبصحة جيدة

ســ 2 : الحاله العقلية بمعنى هل تشعر ان عقلك يعمل ولا حضرتك مفسى دماغك ؟

جــ 2 : والله انا بحس ان دماغى شغالة اكتر من اللازم وانا ساعات بعمل حاجات عشان اخليها تبطل شغل

ســ 3 : الحاله الاجتماعية بمعنى هل علاقتك بمن حولك جيدة ولا عامل مشاكل مع طوب الارض ؟

جــ 3 : فى دى بالذات انا فلة شمعة منورة يعنى علاقتى بأهلى كويسة جدا والحمد لله

وعلاقتى بأصحابى كويسة برضو والجيران والمعارف تمام

ســ 4 : الحاله العاطفية مش محتاجة تفسير ومش عايز استعباط

جــ 4 : من غير لف ولا دوران انا حاليا خارج نطلق الخدمة !!!!

ســ 5 : الحاله الروحية بمعنى هل علاقتك بربنا كويسة ولا الكلام على ابو لهب ؟

جــ 5 : انا والحمد لله علاقتى بربنا اتحسنت كتير من ساعة ما دخلت الجيش

بس الواحد برضو مقصر ومش عامل اللى عليه

الخمس اسئلة اللى جاية دى اسئلة متنوعة من اختيار العبد لله

الاول : اكتر عيب فيك ونفسك تتخلص منه

انا قلبى اسود يعنى مبنساش حاجة لحد وعشان كده مبزعلش من حد بسرعة

عشان اللى بزعل منه بلغيه من دماغى خالص

فنفسى يكون قلبى اكثر بياضا يمكن احاول اشرب كلور كتير ولا حاجة

الثانى : ايه الحاجة اللى عملتها وندمت انك عملتها قوى

انا مبحبش الندم عموما واي حاجة حصلت مهما كانت بقول الحمد لله عليها

الثالث : اية الحاجة اللى لسة معملتهاش وهتموت وتعملها

انا نفسى أتيييييييييييييييييييييييييت اسف الرقابه حذفتها

الرابع : اكتر دعاء بتقوله وبتردده دائما

اللهم لا تذهب قلبى الى ما صرفته عنى

خامسا : لو عرفت انك هتموت دلوقتى وقالولك اخر حاجة نفسك فيها ايه

اموت وانا صايم وبصلى

خلصت الاسئلة ودلوقتى انا هضحى بتاجى الاول فى سبيل خمس اشخاص وهم

الرفيقة الدادة ام عطيات قصدى ماء تشرين

الصديقة الغالية فى حب الله

الرقيقة سنووايت

ابن الجيهة اسير الجراح

اجدع بنات دموع صاحبة الجلالة

جاءنا البيان التالى

قامت القوات البحرية المصرية بتسريح الجندى محمد حامد يوسف الشهير بحدوتة

وذلك بعد منحه وسام الشرف من الدرجة العشرين

وذلك لأنجازاته وبطولاته التى ستشهد لها القوات المسلحة

وسيذكر التاريخ دائما السنة التى قضاها فى شرف خدمة الوطن

واى حد بعد كده هسمع صوته هيبقى يومه اسود

وقد استقبل افراد الشعب الخبر بكثير من السعادة وقاموا بمظاهرات

وزينت الشوارع باللافتات المؤيدة للحزب الوطنى قصدى لحدوتة

والدعاء له بقضاء حياة حافله بالحرية والصياعة بعيدا عن الحياة العسكرية

وعلى صعيد اخر نتمنى لأسرة المدونين كل خير وسعادة

بمناسبة حلول الشهر الكريم وكل عام وانتم بخير

انا بقيت حر يا منطقة مفكيش راجل غيرى ههههههههههههههههههههههههههههههه

كانت هذة اخر الاخبار

تــلـــت عــمــــرى

اليومين دول عقبال ما تشوفوا ولادكم عيد ميلادى . هكمل 25 سنة

احنا فى البيت مش متعودين نعمل اعياد ميلاد مش لسبب معين بس مسألة تعود

السنه دى انا دماغى وخدانى فى سكك بعيده اوى عشان اليوم ده

لو حسبنا حسبة صغيرة اوى وهى ان متوسط العمر عندنا 70 سنة

طبعا الاعمار بيد الله بس الرسول (صلى) قال اعمار امتى بين الستين والثمانين

يبقى الواحد على كده قضى تقريبا اكتر من تلت عمره

يا نهار اسود !!!! تلت عمرى فات

تلت عمرى فات ولسه بقول بسم الله الرحمن الرحيم

انا خلصت الكلية ودخلت الجيش وهطلع منه كمان اسبوعين , صحيح انا بعمل كذا حاجة تانية

بس برضو لسة بدرى اوى على إن الواحد يبقى مستقر فى حاجة

الواحد كل ما يكبر كام سنة يشوف الدنيا بشكل تانى وبنظرة تانية

انا بتخيل العمر ده زى العمارة !!! الواحد بيتولد فى الدور الاول

وكل كام سنة يطلع دور اعلى فيشوف الدنيا بصورة اوضح وابعد

انا دلوقتى بسأل نفسى كذا سؤال

هل كان المفروض اعمل حاجات فى الفترة اللى فاتت ومعملتهاش ؟

وهل كان المفروض اكتشف واجرب حاجات ومجربتهاش ؟

وهل كان المفروض اشوف واحس حاجات ومحستهاش ؟

وهل كان المفروض احقق حاجات ومعرفتش احققها ؟

ممكن حد يقولى دلوقتى يا عم انت لسه صغير على الكلام ده

ماشى يا سيدى مقولناش حاجة بس يا جماعة اكتر من تلت العمر فات

طب الواحد لو كان اتولد وعاش بره مصر كان زمانه دلوقتى عامل ازاى ؟

يعنى كان زمانى عملت ايه زيادة عن اللى انا معملتوش وانا هنا

طبعا كل سن وله جماله مقولناش حاجة

بس الواحد فى الافلام الاجنبى بيشوف العيل عنده 17 سنة وعمل كل حاجة فى الدنيا نفسه فيها

وانت هنا تلت عمرك فات ولسة بتدور على الصفر عشان تبتدى منه

ولسة بتدور على النجار اللى هيعملك السلم اللى هتبدأ تطلع على اول درجة فيه

على فكرة ده مش يأس لكن رؤية مختلفة ليوم كان الواحد بيحتفل بيه زمان

سؤال تانى لو الواحد مات دلوقت هيدخل الجنة ولا النار ؟

ولو استمر على نفس الاعمال اللى بيعملها سواء خير ولا شر هتبقى النتيجة ايه ؟ وهيوصل لفين ؟

يا جماعة انا بتكلم فى تلت العمر اللى عدى من غير ما نحس بيه

انا عايز كل واحد يشوف هو عنده كام سنة ويعمل الحسبة اللى انا عملتها

ويشوف نفسه ماشى فى انهو طريق

لو فى حاجة غلط احنا بنعملها يا ريت نعرفها

ولو فى وقت بيضيع مننا نعرف مين اللى بيضيعه وبيضيع فى ايه

عشان حتى نخلى الجيل اللى بعدنا ميغلطش الغلط بتاعنا

وحتى لو مش هنقدر نرجع العمر اللى فات بس ممكن منضيعش العمراللى جاى

اللهم انت الحليم فلا تعجل , وانت الجواد فلا تبخل

وانت العزيز فلا تذل , وانت المنيع فلا ترام

وانت المجير فلا تضام

اليك مددت يدى فارحم ضعف قوتى واغفر خطيئتى واقبل معذرتى

اللهم لا تحرمنى وانا ادعوك , وتخيبنى وانا ارجوك

يا فارج الهم ويا كاشف الغم , يا مجيب دعوة المضطرين

يا ارحم الراحمين

ارحمنى برحمة تغنينى بها عن رحمة من سواك

هَذِي بـِلادٌ .. لمْ تـَعُـــدْ كـَبـِلادِي

فِي كـُلِّ رُكـْن ٍمِنْ رُبــُــوع بـِـــــلادِي تـَبْدُو أمَامِي صـُورَة ُالجــَــــلادِ

لـَمَحُوهُ مِنْ زَمَن ٍ يضَاجـِــعُ أرْضَهَـــا حَمَلـَتْ سِفـَاحًا فـَاسْتبَاحَ الـوَادِي

لـَمْ يبْقَ غَيرُ صـُـرَاخ ِ أمـْــس ٍ رَاحـِـل ٍ وَمَقـَابـِر ٍ سَئِمَتْ مـِــنَ الأجْـــدَادِ

وَعِصَابَةٍ سَرَقـَتْ نـَزيــفَ عُيـُـونِنـَــــا بـِالقـَهْر ِ والتـَّدْليـِس ِ.. والأحْقـَادِ

مَا عَادَ فِيهَا ضَوْءُ نـَجْــــم ٍ شـَــــــاردٍ مَا عَادَ فِيها صَوْتُ طـَير ٍشـَـــادِ

تـَمْضِي بـِنـَا الأحْزَانُ سَاخِــــرَة ًبـِنـَــا وَتـَزُورُنـَا دَوْمــًا بـِـلا مِيعــَـــادِ

شَيءُ تـَكـَسَّرَ فِي عُيونـِــــي بَعْدَمَـــــا ضَاقَ الزَّمَانُ بـِثـَوْرَتِي وَعِنَادِي

أحْبَبْتـُهَا حَتـَّي الثـُّمَالـَـــــة َ بَينـَمـَــــــا بَاعَتْ صِبَاهَا الغـَضَّ للأوْغـَــادِ

لـَمْ يبْقَ فِيها غَيـرُ صُبْــح ٍكـَـــــــاذِبٍ وَصُرَاخ ِأرْض ٍفي لـَظي اسْتِعْبَادِ

دى جزء من قصيدة للشاعر الكبير فاروق جويدة ..... جت فى بالى بعد الحكم اللى صدر على صاحب العبارة

قد ايه الواحد حس انه رخيص

اوى فى البلد دى وانه مالوش ثمن

بس ايه الحل ؟ حد فكر فينا هنعمل ايه !!! كل اللى بسمعهم اتفقوا على حاجة واحدة ........... الـــســفـــــــر

كله بيقول العيشة هنا بقت مستحيلة . احنا نسبلهم البلد باللى فيها وإنشا الله نشتغل برة زبالين برضو ارحم من هنا

بس يا جماعة مش هو ده الحل ومش هقولكم مصر هى امى والكلام ده

بس العالم كله دلوقتى داخل على ايام سوده !!!! من ازمة غذاء الى ازمة طاقة الى ازمة بطاله

فكل واحد بيظبط نفسه ومش عايز حد غريب يشاركه اى حاجة

ودول كتير اوى دلوقت بدأت تغير فى قوانين الهجرة وبدأت تطرد الهجرة غير الشرعية اللى عندها

يعنى محدش فاضى لحد ولا حد ممكن يساعد حد وكل واحد اولى بمشكلته

فالتفكير فى الهروب من البلد مش هو الحل ...... ومش هيوصلنا لحاجة

لازم نثق فى نفسنا وفى قدرتنا على الاستمرار ومهما كانت الصعوبات اللى قدامنا لازم منفقدش الامل

والله العظيم فى دول اكثر مننا فساد وديكتاتورية اتصلحت وبقت دول متقدمة

صحيح الحل هيحتاج وقت بس اليأس برضو بياكل فى عمرنا

لو تبص فى وش اى شاب دلوقتى تحس ان عنده 70 سنة طب مين بقه اللى هيبنى وهيعمر البلد

على فكرة انا من اكتر الناس تشائم بس ساعات الواحد بيحس بحاجات كده فبيمسك فيها قبل ما تضيع

يا الله .. يا صانع كل مصنوع , ويا جابر كل كسير , ويا شاهد كل نجوى ويا حاضر كل ملآ , ويا مفرج كل كربة , ويا صاحب كل غريب , ويا مؤنس كل وحيد آتنا بالفرج والرجاء , واقذف رجائك فى قلوبنا حتى لا نرجو احد سواك

الآخـــــــــــر

مين هو الآخر ؟ وايه علاقتنا بيه ؟ وايه مدى تقبلنا ليه ؟ كل دى اسئلة مهمة والمفروض نكون عارفين اجابتها كويس . الآخر ده ممكن يكون مختلف معاك فى الدين او الجنس او اللون او الجنسية او التفكير . وانت ممكن تعرف مدى تقدم او تخلف الانسان بمعرفت مدى تقبله للآخر !!!! كل ما يكون الانسان متقدم ومتفتح وواثق من نفسه بيكون اكثر تقبلاً للآخر . وعندنا فى مصر والحمد لله موضوع تقبل الآخر ده تقريبا مبقاش موجود وده مظهر من مظاهر التخلف اللى وصلناله والدليل على كده ان محدش بقه طايق حد !!!!! الستات بتقول الرجاله بتاكل حقها والرجاله بتقول العكس ... الفلاحين بيقولوا على الصعايدة مبيفكروش والصعايدة بيقولوا الفلاحين فيهم خبث ولؤم وسكان المدن بيتريقوا على الاتنين ... المسلمين بيقولوا ان الاقباط واخدين اكتر من حقهم والاقباط بيقولوا انهم مضطهدين !!!! وده اللى عايز اتكلم فيه . انا مش عايز اتكلم فى الموضوع ده الكلام التقليدى اللى بيتقال فى التليفزيون بتاع الوحدة الوطنية ويحيا الهلال مع الصليب والحوارات دى . احنا لازم نعرف ان نص حل المشكلة هو الاعتراف بيها . يعنى لازم نسأل نفسنا الاول هل فى مشكلة بين المسلمين والاقباط ؟ والاجابة ايوة . طيب هل الاقباط بيعانوا من مشاكل فى حياتهم داخل مصر ؟ والاجابة طبعاً . والسؤال الاهم هل الاقباط مضطهدين داخل مصر ؟ اعتقد ان الاجابة لأ . ناخد الموضوع بالراحة وواحدة واحدة . المشكلة بين المسلمين والاقباط موجوده وبتبان فى اى اختلاف بينهم مهما كان صغير او تافه حتى !!! والاقباط فعلا عندهم مشاكل بس لما نشوف المشاكل اللى عندهم فى اطار مشاكل المجتمع كله هنلاقيها مشاكل عادية !!! لكن محدش يقدر يقول ان المشاكل دى تصل الى حاله الاضطهاد والدليل على كده ان نسبة الاقباط الاثرياء فى المجتمع اكبر بكتير من نسبتهم كعدد السكان !!! وده طبعا سببه اجتهادهم فى عملهم بس برضو لازم نعترف ان لو فى اضطهاد منظم من المسلمين مكنش حد منهم اشتغل او وصل للى هو فيه !!!! احنا المفروض نتكلم بصراحة وكل واحد يعرف غلطه . بالنسبة للمسلمين فى ناس فعلا متشدده وعلى الفاضى كمان وتلاقيهم يقولوا احنا مبنكلش عند مسيحين ولو فى مطعم عرفوا ان صاحبه مسيحى ميرحوش عنده ولو اتكلمت معاهم يقولولك بناء الكنائس حرام !!! طب ياعم مين قالك ؟ ميعرفوش هو كده وخلاص !!! مع ان الواحد لو فكر بينه وبين نفسه لو كان اتولد لقه امه وابوه مسحيين كان عمل ايه !!!!!! طبعا الحمد الله الذى اعزنا بالاسلام وشرفنا به .... عشان محدش تخده الحماسه ويقولى انت وانت . انا بفرض فرض جدلى يعنى مثلا مثلا كان ايه اللى هيحصل !!! كنت هتشوف المسلمين ازاى وهل كنت هتقرأ فى الدين الاسلامى وتشوفه صح ولا لأ !!!!!!! كل دى حاجات لو فكرنا فيها حاجات كتير جوانا هتتغير . وبالنسبة للاقباط لازم عقدة الاضطهاد اللى عندهم تتحل . يعنى لو فى خلاف بين اتنين اقباط هيبقى الموضوع عادى بس لو نفس الخلاف بين واحد مسلم وواحد قبطى كان الموضوع هيبقى اضطهاد المسلم للقبطى !!!! وفى اقباط بيحبوا المشاكل ولو اتكلمت معاهم يقولولك يعنى انت توافق ان رئيس الجمهورية بتاعك يبقى واحد مسيحى ؟ طبعا سؤال مستفز ومحرض !!! والاجابة عليه سهلة اوى . لو اخدنا اكبر بلد ديمقراطية فى العالم ذى امريكا او انجلترا مثلا وشوفنا قد ايه نسبة ان يتولى الحكم هناك شخص مسلم !!!! هنعرف ساعتها ان الموضوع مبيتخدش كده وإن اللى بيدور على الاختلاف هيلاقى الف سبب يخلينا نختلف ونكره بعض واللى بيدور على الاتفاق هيلاقى الف سبب يخلينا متفقين

الارنب والسلحفاه من منظور آخر

من فترة حضرت كورس او ورشة عمل ذى ما بيقولوا اسمها اتخاذ القرار , الاول انا كنت رايح مع واحد صاحبى ومش فى دماغى !!! قالى دى دورة هتروح مرتين وتسمع كلمتين هناك وفى الاخر هتاخد شهادة وتبقى فى السى فى بتاعك . المهم رحت واللى كان بيشرح انا الصراحة مش فاكر اسمه بس هو كان مدير احدى البنوك وكان انسان رائع كلامه يشدك ويجبرك تسمعه بأنتباه . الكلام اللى سمعته فى المرتين دول غير حاجات كتير قوى انا كنت فاهمها , وانا فضلت مده طويلة بعد المحاضرة دى بفكر فى اللى اتقال فيها وقلت اشاركم معايا , اكتر حاجة شدتنى هى فكرة البطاله اللى فى البلد ودورنا فيها ونظرتنا لسوق العمل وان فى حاجات احنا اتربينا عليها ومن غير من نحس اثرت فينا . ذى ان اغلبنا شايف والده او والدته شغالين فى الحكومة او حتى فى القطاع الخاص من يوم ما اتولد لحد دلوقتى فى نفس المكان يمكن اترقى او بقى فى منصب اعلى بس فى نفس الوزارة او المصلحة او الشركة , وده خلى فى انطباع عندنا ان الواحد لازم يدور على شغل فى استقرار وانه هيكمل فيه طول عمره وهى دى المصيبة , والدليل على كده حلم اى حد دلوقتى يشتغل فى شركة ذى البترول او شركة الكهرباء وتلاقى حد يقولك انا ممكن ادخلك شركة من دول بس تدفع !!!! وبعدين تسمع ارقام كبيرة توصل لفوق الثلاثين الف ولما تستكتر المبلغ يقولك انت هترجعهم فى سنة ولا اتنين وبعدين انت هتأنتخ هناك لانك اساسا رايح ذيادة عن العدد اللى هناك !!!!!! ودى طبعا مشكلة كبيرة , احنا بقى لازم نفكر فى الموضوع بشكل اكبر ونشوف سوق العمل فى البلد محتاج ايه وايه القدرات اللى عندى واللى تخلينى متميز فى حاجة , طبعا الواسطة والفساد والحاجات دى كلها موجودة بس الواحد ميتلككش بيها , يعنى سيادتك متبقاش واخد كليتك السنة فى سنتين وجايب مقبول بالعافية ودور نوفمبر كمان وطبعا ملكش فى الانجليزى غير فى الشات ولا فى الكمبيوتر غير فى الالعاب وبعدين تقول انا مش لاقى شغل !!!!!!!! الاول شوف نفسك ولو حسيت انك مفيد لأى حد ساعتها بس هتشتغل يمكن المرتب هيكون ضعيف بس ساعتها هتكون شغال .الواحد لازم يعتبر حياته عبارة عن {سى فى} واول سطر فى الورقة دى هى شهادتك وبعدين المفروض انك تبقى مخلى الورقة دى قدامك علطول وكل يوم تحاول تذود سطر فى الورقة دى يا امه بكورسات يا امة بخبرة فى مكان المهم يبقى طموحك انك تفيد المكان اللى هتشتغل فيه وتخلى اى مدير مكان هو اللى عايزك عنده مش انت اللى رامى نفسك عليه , وكمان الواحد المفروض يعرف ان اسلوب السلحفاه اللى هو انك تفضل فى نفس المكان وتوصل للقمة بعد تلاتين سنة مبقاش ينفع دلوقتى لان الحياة اتغيرت كتير عن زمان , اللى ماشى دلوقتى اسلوب الارنب اللى هو انك وانت فى اول يوم ليك فى الشغل انت عامل حسابك انك مش هتكمل فيه وانك هتتعلم منه لحد ما تلاقى حاجة تانية تدخل فيها وتتعلم منها لحد ما تلاقى حاجة تالتة وهكذا !!!!!!! انا عارف يمكن الكلام ده ميعجبش ناس كتير , وان الاحباط واليأس اللى اتولد فى قلوب الشباب بقى كبير قوى , بس الواحد يعمل اللى عليه والباقى على ربنا , يا ريت تفكروا فى الكلام ده كويس وربنا يكرمنا جميعا

للكبار فقط

قبل ما حد يقرأ البوست ده انا لازم انبهكم انه للكبار فقط فأى حد سنه اقل من خمسين سنة ميقراش حاجة , واللى هيستعبط فيكم ويقرأ هعرف اجيبه ومحدش يسألنى اذاى . من كام يوم كنت قاعد بتكلم مع واحد يعتبر صاحب صاحبى . المهم فضلنا نتكلم والكلام جاب بعضه وقولتله والله الواحد المفروض يتجوز بقة كفاية اوى كده , قالى يا عم الجواز مسئولية ووجع قلب على الفاضى , قولتله بس برضو الواحد مننا شاب ومينفعش يفضل كده يعنى والعمليه بقت على الاخر . بص عليا بستغراب وسأنى بكل دهشة هو انت لسه.........!!!! هههههههههههه رجعت بضهرى على الكورسى وفضلت ساكت حوالى نص دقيقة بفكر هو بيستهبل ولا بيتريق . قولتله مع الاسف ايوة وخدت الموضوع بهزار عشان اعرف اخريته ايه . قالى انت عندك كام سنة ؟ قولتله 25 قالى وسايب نفسك كده ليه . قولت يادى الليلة اللى مش عايزة تعدى . انا ديما مبلى بناس بتزاولنى كده . قولتله لما ربنا يريد هتجوز وكل شىء بمعاد بس احنا نصبر !!! انا مش هكمل باقى الحوار اللى حصل بس انا اللى خلانى اتكلم فى الموضوع ده انى حسيت ان فى ناس بتفكر تفكير مختلف عن اللى فى دماغى . والواحد لما بيشوف طريقة تفكير مختلفة بيستفاد حتى لو كان مختلف معاها . يعنى مثلا عندنا فى مجتمعنا لو فى شاب كان ليه علاقات قبل الجواز بيتقال عليه ولد شقى اما لو بنت عملت كده هيتقال عليها كلام , اكتر كلمة محترمة ممكن استخدمها انها بنت صايعة . مع ان ربنا سبحانه وتعالى ساوى بين الرجل والمرأة فى العقاب على جريمة الزنا . بس الفكرة كلها ان الشاب لو عمل كده محدش ممكن يكتشف ده اما البنت فهتتعرف . مع ان دلوقتى عمليات الترقيع بقت ذى عملية اللوز ممكن تتعمل فى اى وقت واى مكان . يعنى الاخلاق مبتتجزأش وذى ما انت شايف ان من حقك انك تكون اول راجل فى حياة مراتك , لازم تعرف ان من حقها انها تكون اول ست فى حياتك . مش هو ده العدل !!! احنا عندنا ازمة ثقة انا سمعت جملة من اكتر من شخص وهى جملة خطيرة جدا . الشاب من دول يبقى ماشى مع طوب الارض بعدين يقولك انا هخلى امى تخطبلى واحدة معرفتها , اقوله طب ما تشوف واحدة محترمة من اللى تعرفهم ولا كلهم لامؤخذة !!! يقولى لا فيهم وفيهم بس انا من كتر اللى شوفته بقيت مش واثق فى اى بنت مهما كانت محترمة قدامى !!! انا هخلى امى تشوفلى واحدة لسة داخلة الكلية جديد لا لفت ولا دارت عشان ابقى متطمن . لو فكرنا فى الكلام ده بهدوء ومن غير عصبية هنلاقى ان الموضوع بجد خطير . فى شباب كتير من كتر ما شافت تصرفات البنات وقدرتهم على التمثيل والواحدة منهم تبقى واقفة معاك فى اى مصيبة وتقول لأمها على الموبيل انا فى الكورس ولا مع صحبيتى وتعمل حوار فى ثانية كل ده عمل انطباع عند الشباب ان البنات كلها بيمثلوا وانك مهما حاولت مش هتعرف حقيقة البنت اللى معاك . مش معنى كده ان كل البنات وحشين وإلا تبقى القيامة قامت خلاص !!! بس بجد الوحش بقى ظاهر ومنتشر لدرجة انه بيحسسك انه الاكتر والطبيعى . والظروف السودة اللى بتمر بالبلد واللى بتقتل اى حلم عند اغلب الشباب والبنات . بتخلى نسبة الغلط كبيرة يعنى فى ناس كتيرة بتحاول تتعايش مع الواقع !!!!! وبما ان المستقبل غامض . يبقى الواحد لازم يشوف نفسه عشان ميطقش ولا يموت من الحسرة !!! انا اسف انى طولت بس انا والله مش بقول خطب ومواعظ انا نفسى كل واحد يتقى ربنا فى نفسه وفى اللى معاه . ويارت الاهل تساعد بعضها ومتذودهاش عشان العجلة تمشى بدل ما تتقلب ونقع من عليها . يارب اكون قدرت اوصل انا عايز اقول ايه

مدونتى جميلة نظيفة متطورة

انا مش عارف اقولكم انا مبسوط قد ايه وانا بكتب البوست ده النهاردة يبقى عدى على حدوتة سنة بالظبط ........ كل سنة وكل المدونين والمدونات بخير ,انا قولت بما اننا بقينا اهل خلاص انا هقولكم حكايتى مع حدوتة , فى الاول انا مكنتش اعرف اى حاجة عن المدونات خالص !!!! والمدونة الوحيدة اللى كنت بدخلها هى مدونة الواعى المصرى عشان كانت بتعرض صور للتعذيب اللى بيحصل فى اقسام الشرطة , وفى يوم جالى صديقى العزيز عمرو وقالى انا عملت مدونة اسمها حدوتة !!! استغربت وقولتله ودى انت هتعمل بيها ايه , قالى انا عايز كل مرة واحد من اصحبنا يكتب موضوع بحيث المدونة تبقى بتتكلم عننا وعن اللى جوانا , المهم اخدته على قد عقله وقولتله الله ينور يا باشا , فى الوقت ده انا كنت لسه عارف انى داخل الجيش ودى طبعا ضريبة الوطن اللى احنا لازم ندفعها فانا مكنتش زعلان ولا حاجة !!!!! انا كنت قرفان من الدنيا كلها وكانت حالتى النفسية ذى الزفت ومش طايق الهدوم اللى عليا , فضل كل يوم يقولى خلى عندك دم وادخل على المدونه وقولى رأيك ايه , فى الاخر دخلت عشان استريح من الصداع اللى عاملهولى , واول ما دخلت عالم المدونات اتسحرت !!!!! ما المدونات دى يا امه تحبها من اول نظرة يا امه متحبهاش , انا عجبنى الموضوع انك تكتب اللى انت عايزه وتشوف رأى الناس فيه وتسمع افكار ناس تانيه , المهم كان اتكتب تلت اربع مواضيع فى المدونة وبعدين انا كتبت بوست اسمه انت مرتبط بعدها علطول رحت على مركز التدريب , فضلت هناك حوالى شهر ونص وكان عمرو بيزورنى هناك ويقولى اخبار المدونة ايه , خلصت ايام مركز التدريب ورجعت البيت فى اجازة وكتبت البوست التانى ومن ساعتها وانا بكتب فى المدونة , باقى اصحابنا اتخنقوا بسرعة ومحبوش الفكرة انا لقيت نفسى بكتب عن اللى جوايا وعمرو بقى ماسك الجزء التقنى فى المدونة لانى فى الاول كانت علاقتى بالنت محدودة جدا وبعدها بشويه عاملنا مدونة خواطر حدوتة ودى بكتب فيها الاغانى بتاعتى !!! اصل محسوبكم شاعرعلى قده وعمرو ملحن على قده برضة وانا وهو بنعمل اغانى ونطلع على البحر نغنيها مع اصحبنا , فقولت انزل الكلام بتاعى واشوف رأى الناس ايه يمكن يكون اصحابى بيجملونى والحمد لله بشوف تعليقات حلوة وبحس ان الكلام عاجب اغلب الناس وادى سنة كاملة عدت كتبت فيها مواضيع كتيرة وقولت كل اللى فى نفسى واى حاجة بتيجى على بالى بتكلم فيها !!! وخلاص فاضلى شهرين واخلص الجيش بتاعى !!!! حاجات كتيرة حصلت فى السنه دى المهم الواحد لازم يقول كام حاجة فى الاخر عشان العملية تكمل .... انا بشكر كل المدونين والمدونات اللى بتزور حدوتة وخواطر حدوتة واللى كتير منهم ضايفينا عندهم ومش عايز اقول اسامى عشان منساش حد !!! وبشكر كل اللى استحملنى واستحمل اللى كتبته ومذهقش وقال ايه العك ده !!! بس بجد والله انا حاسس ان من يوم ما بدأت اكتب فى المدونة واشوف تعليقات الناس وارد عليها بقى ليا اصحاب فى محافظات تانية يمكن ميعرفوش اسمى ولا اعرف اسمهم بس انا حاسس انى عارفهم كويس وهما عارفينى كويس , ويا رب ميكنش حد زعلان من اى حاجة كتبتها قبل كده ولو حد زعلان منى ياريت يسامحنى محدش ضامن عمره الواحد ممكن يخلع فى اى وقت !!!! بس انا عايز اتجوز الاول حرام يعنى كفايه اوى كده جوزونى الاول وبعدين اعملوا اللى انتوا عايزينه , المهم اظن بعد الكلمتين دول كل واحد يجيب هدية على ذوقه , انا مش طماع بس كل واحد بيجيب قيمته , المدونات اللى فى اسكندرية هنحدد المكان اللى هنستلم فيه الهدايا , اما المدونات اللى فى باقى المحافظات فمش عايز تلكيك عندكم البريد السريع او السوبر جيت سلالالالالالالالالالالالالالالالالالالالالالالالالالالالالالالالالالالالالالالالالالالالام

الإسلام وأسلوب الحياة

انا بقالى فترة حاسس إن البلد بقت مقسومة فريقين , الاول شايف ان الدين حاجة والحياة حاجة تانية , والفريق التانى متدين او مهتم بالدين , وهنا بتبدأ المشكلة أن كل فريق ماشى بدماغه , فالواحد بقى بيشوف متناقضات كتيرة قدامه وساعات مبيعرفش هو عايش فى دولة اسلامية ولا دولة ايه بالظبط , وكل فريق من الاتنين عنده دوافعه واسبابه , الفريق الاول او العلمانى اللى بيؤمن بفصل الدين عن الدوله واللى شايف ان الدين علاقة بين الواحد وربه وبس !!!! شايف الغرب هو الانجح والاقوى يبقى اكيد هو الصح وطريقته فى ادارة الحياة اصح من طريقتنا , عشان كده المفروض احنا نقلده , وده احنا بنلاحظه فى حاجات كتير ذى اللبس والكلام اللى بقى كله انجليزى وسماع الاغانى والافلام الغربية ومحاول التقليد الاعمى لاسلوب الحياة الغربى , وده فى شىء من الصحة يعنى فعلا الواحد لما يشوف حد معين سواء شخص او مجموعة اشخاص ناجحين المفروض يدور على اسباب النجاح ده ولو يقدر يعمل ذيهم يعمل , بس احنا لازم ناخد بالنا من حاجات تانية يعنى هل امريكا والغرب عموما ناجحين فى كل حاجة ؟ صحيح هما الاغنى والاقوى فى الاقتصاد والعلم , بس احنا لازم نعرف الجانب الاخر لأمريكا وهو الجانب الاجتماعى !!!!! وده شىء مهم جدا فى ناس كتير متعرفوش او مش مهتمه بيه , امريكا مثلا عندها حرية فى اقامة العلاقات واى حد ممكن يعمل اى حاجة مع اى حد فى اى وقت يعنى العملية هناك موز موز موز !!!!! فى الاول الواحد ممكن يقول فى نفسه يا سلام لو عندنا كده الواحد كان خرب الدنيا ولا حد يقوله شبكة ولا مهر ولا شقة ولا الكلام الفارغ ده !!! بس لما نفكر شوية ونسأل نفسنا هما استريحوا كده يعنى هل هما معندهمش مشاكل خالص ؟ الاحابة طبعا لأ !!!! لان المجتمع الامريكى بيعانى من مشاكل اجتماعية كبيرة بسبب اسلوب حياته , يعنى عندهم مثلا احصائية بتقول ان 35 % من الاطفال بدون اب !!! انتوا متخيلين يعنى تقريبا اكتر من تلت الاطفال مولودين من علاقات بدون جواز وده طبعا ليه اثار اجتماعية خطيرة , والراجل او الست هناك ممكن يفضل لحد فوق التلاتين سنة يدخل فى علاقات ويخرج منها من غير جواز ولا اولاد واغلب الناس هناك بيروحوا لدكاترة نفسيين !!! ده غير علاقة الابناء بالاباء اللى بيسودها الفتور وده بيبان حتى فى افلامهم للى متابع الافلام الغربية , كل دى مظاهر لفشلهم اجتماعيا ...... احنا بقى كمسلمين المفروض نعرف ايه اسباب الضعف اللى احنا فيه ؟ فى ناس كتير بتحاول تفهمنا ان الاسلام هو السبب فى التخلف اللى وصلناله !!!! وده طبعا مش صحيح لاننا لو حتى اتكلمنا من وجهة نظر غير اسلامية يعنى لو واحد ميعرفش حاجة عن الاسلام وبدأ يحلل المشكلة هيلاقى ان من اكتر من 1400 سنة جيه واحد اسمه محمد بن عبد الله وهو امى لا يقرأ ولا يكتب وقال انه رسول الله وقال ان معاه كتاب من عند الله اسمه القرأن بيتكلم عن اللى حصل واللى هيحصل وفيه تنظيم كامل لحياة الانسان , وقدر محمد (صلى) انه فى حوالى 20 سنه لحد ما توفاه الله انه يعمل دوله اسلامية سادت العالم لفترة ليست بالقليلة , ولم يضعف العالم الاسلامى وينهيار إلا لما بدأ فى البعد عن تعاليم الاسلام ....... الفكرة كلها من الموضوع ده هو ان الاسلام اسلوب حياة كامل مش صلاة وصوم بس , واننا مينفعش نبقى مسلمين وخلاص يعنى اتولدنا لاقينا نفسنا مسلمين بس منعرفش اى حاجة عن ديننا , احنا لازم نبقى عندنا يقين بالاسلام ويقين بأنه هو اللى يقدر يخرجنا من الحالة اللى احنا فيها دلوقتى

شــاعــر الحــــب

بصراحة انا زهقت من السياسة والحكومة والعلاوة والكلام ده كله , انا عايز اخد اجازة اريح دماغى واريحكم معايا , فى البوست ده احنا هنتكلم عن شاعرى المفضل نزار قبانى , اللى انا شخصيا بعتبره من اكثر الشعراء رقة ورومانسية , وده بغض النظر عن اختلاف الكثيرين معه لجرئته فى التعبير , او كلماته اللى يراها البعض جارحة او بزيئه , بس اللى منقدرش ننكره ان لكلام هذا الرجل سحر خاص

انا لما فكرت اكتب عنه قلت كتير من القصائد اللى كتابها معروفه لينا وكتير منها اتلحن واتغنى , عشان كده انا اخترت بعض الرسائل الخاصة اللى كتبها لنساء كانت فى حياته , تعالوا نشوف ونتعلم من شاعر الحب ..... ازاى نحب ؟ وازاى نعبر عن الحب ده ؟

1-

لم اكن يوما ملكا , ولم انحدر من سلالات الملوك , غير ان الاحساس بأنك لى يعطينى الشعور

بأنى ابسط سلطتى على القارات الخمس , واسيطر على نزوات المطر , وعربات الريح

وامتلك الاف الفدادين فوق الشمس , واحكم شعوبا لم يحكمها احد قبلى

والعب بكواكب المجموعة الشمسية , كما يلعب طفل بأصداف البحر

لم اكن يوما ملكا , غير ان مجرد احساسى بأنك تنامين فى جوف يدى

كلؤلؤة كبيرة فى جوف يدى , يجعلنى اتوهم

بأنى قيصر من قياصرة روسيا , او انى كسرى

2-

عندما تضعين رأسك على كتفى , وانا أسوق سيارتى

تترك النجوم مداراتها , وتنزل بالألوف

لتتزحلق على النوافذ الزجاجية

وينزل القمر , ليستوطن على كتفى

3-

كلما رأيتك , ايأس من قصائدى

إننى لا أيأس من قصائدى إلا حين أكون معك

جميلة انت , الى درجة أننى حين أفكر بروعتك , الهث

تلهث لغتى ....... وتلهث مفرداتى

4-

وعدتك ان ابقى محتفظا بوقارى

كلما ذكروا اسمك امامى

ارجوك . ان تحررينى من وعدى القديم

لأنى كلما سمعتهم , يتلفظون باسمك

أبذل جهد الانبياء , حتى لا اصرخ

5-

عندما اسمع الرجال , يتحدثون عنك بحماسة

واسمع النساء , يتحدثون عنك بعصبية

أعرف كم انت جميلة

6-

أرجوك أن تحترمى صمتى , إن اقوى أسلحتى هو الصمت

هل شعرت ببلاغتى عندما أسكت ؟

هل شعرت بروعة الاشياء التى أقولها ؟

عندما لا أقول شيئا

7-

عاد المطر , يا حبيبة المطر

كالمجنون أخرج الى الشرفة لأستقبله

وكالمجنون , أتركه يبلل وجهى , وثيابى

ويحولنى الى إسفنجة بحرية

المطر يعنى عودة الضباب , والقراميد المبللة

والمواعيد المبللة , يعنى عودتك ..... وعودة الشعر

أيلول .... يعنى عودة يدينا الى الالتصاق

فطوال أشهر الصيف .... كانت يدك مسافرة

8-

أمارس فى هذه الايام , هواية خطيرة

وهى ان اتحدث عنك الى النساء

لذة كبيرة .... ان أزرعك فى عيون النساء

فى فضولهن ... فى دهشتهن ... لذة ما بعدها لذة

ان أضرم النار فى ثياب الجميلات

واتفرج بفرح شيطانى ... على الحرائق المشتعلة فيهن

9-

لا انا استطيع ان افعل شيئا

ولا انت تستطعين ان تفعلى شيئا

ماذا يستطيع ان يفعل الجرح بالسكين المسافرة فيه ؟

10-

بعد دقائق سيرحل عام كنت سيدته ومليكته

فيا سيدتى ومليكتى

لا اريد من الله ذهبا ولا قصورا .... لا اريد ديباجا ولا حريرا

اريد منه فقط ......... ان يبقيك حبيبتى

11-

كلما مر صوتك البنفسجى , من اسلاك الهاتف

وصبح على ....... أتحول الى غابة

12-

تسألين : ماذا فعلت فى غيابك ؟

غيابك لم يحدث , ورحلتك لم تتم

ظللت انت وحقائبك قاعدة على رصيف فكرى

13-

لن يكون ذهابك مأساويا كما تتصورين

فأنا كأشجار الصفصاف

أموت دائما , وأنا واقف على قدمى

14-

لست نادما على اعوامى الضائعة معك , فأنا لا احترف الندامة

ولست آسفا , لأننى لعبت على حصان خاسر

إن المقامرة على النساء ... كالمقامرة على الخيول

غير مضمونة النتائج .... ولا تصدق فيها النبوءات

فكل رجل ينتقى فرسا ... وكل امرأة تنتقى جوادا

ولا يربح فى نهاية الشوط , سوى النساء

15-

هذه هى رسالتى الاخيرة , ولن يكون بعدها رسائل

هذه آخر غيمة رماديه تمطر عليك ولن تعرفى بعدها المطر

هذا آخر النبيذ فى إنائى ... وبعده ...لن يكون سكر ولا نبيذ

هذه آخر رسائل الجنون ... وآخر رسائل الطفولة

ولن تعرفى بعدى , نقاء الطفولة , وطرافة الجنون

لقد عشقتك .... كطفل هارب من المدرسة

يخبىء فى جيوبه العصافير .... ويخبىء القصائد

كنت معك ... طفل الهلوسة , والشرود , والتناقضات

كنت طفل الشعر , والعصبية

اما انت ... فكنت امرأة شرقية الشروس , تنتظر قدرها

فى خطوط فناجين القهوة .... وملاءات الخاطبات

ما اتعسك يا سيدتى , فلن تكونى فى الكتب الزرقاء بعد اليوم

ولن تكونى فى ورق الرسائل , وبكاء الشموع , وحقيبة موزع البريد

لن تكونى فى عرائس السكر , وطيارات الورق الملونة

لن تكونى فى وجع الحروف , أو فى وجع القصائد

فلقد نفيت نفسك خارج حدائق طفولتى

وأصبحت نثرا .........