كل سنة وانتوا طيبين ... مش عايزين نبدأ السنة الجديدة بحاجة تنكد عليكم !!! بس انا عايز اعرف رأيكم فى حاجة كده ... طبعا احنا عارفين ان الرئيس مبارك لسة المدة بتاعته مخلصتش انا بصراحة مش عارف هو حاجز كام مدة بس ما علينا مش هو ده الموضوع !!! الموضوع انا عايزكم تتخيلوا معايا ان الرئيس مبارك اطال الله فى عمره بعد الشر بعد الشر ويارب السبعين مليون مصرى يجعل يومهم قبل يومه حصله حاجة خلال السنة الجديدة ايه اللى ممكن يحصل لمصر بعده طبعا الاعمار بيد الله بس المفروض يكون عندنا تصور للموقف ... فى كذا حاجة ممكن تحصل اولا الدستور بيعين رئيس مجلس الشعب رئيس مؤقت للجمهورية لحين انتخاب رئيس جديد ... ثانيا الحزب الحاكم وهو الحزب الوطنى صاحب الشعبية الكبيرة والاغلبية العظمى فى البلاد سيرشح رئيس للدولة ومعظم السياسيين والمفكرين يتوقعون ترشيح جمال مبارك وده مش عشان انه ابن رئيس الجمهوريه لا سمح الله ولكن لخبرته السياسية الكبيرة والطويلة التى لا يعلمها إلا الله ورجال الحزب الوطنى !!! ماشى السيد جمال سيرشحه الحزب والمفروض تتم انتخابات وطبقا لسابق معرفتنا بنزاهة الانتخابات المصرية وخلوها من اى شوائب فى الثلاثين سنة اللى فاتوا المتوقع فوز جمال مبارك بتسعين فى المية من الاصوات على الاقل ويمكن يكون السيد جمال مبارك عايز يغير مسيرة الوالد ويبعد عنه الشبهات فيخلى الداخلية تقلل النتيجة لسبعين او ثمانين فى المية عشان مفيش اى كلب يفتح بقه وبرضه اهو عشان الحسد !!! هنا فى اسئلة كتيرة منها هل الناس هتقبل توريث الحكم من مبارك لابنه ؟ وهل الاخوان وحركة كفاية وبقيت الاحزاب هيخلوا الموضوع يعدى كده ببساطة ؟ وهل لو حصل مظاهرات خلال انتقال السلطة هتبقى فى حدود ولا الموضوع هيقلب بفوضى ؟ وهل الداخلية هتذود العيار حبة وتحاسب على القديم كلة ولا هتتصرف بعقل ؟ وايه هيبقى موقف الجيش ؟ ولو جمال مبارك قلب الموازين وقال مش عايز ارشح نفسى تفتكره ايه اللى هيتم ؟ ومين البدايل اللى شايفين تنفع لمنصب الرئيس ؟ اسئلة كتيرة بس ده برضة مستقبل البلد والمفروض نجهز نفسنا لأى حاجة ممكن تحصل ولو حد فى دماغه سيناريو تانى ياريت يكتبه وذى ما بيقوله اصبر على جار السو يا يرحل يا ..... كفاية كدة عشان الرقابة
الأحد، ٦ يناير ٢٠٠٨
سيناريو الفوضى
الاشتراك في:
تعليقات الرسالة (Atom)
.jpg)
هناك ٣٥ تعليقًا:
الموضوع جامد مووت انا سالت ناس زميلي الي قالي ربنا يستر هو الي حمينا والي قال هاتحصل مصيبة هو احسن من غيرة والي قال مش عارف خليها ماشية وكمان مين الي هاينفع يجي مكانة اغلب الاراء كانت بتقولك كدة ودة الي خلاني افكر في الموضوع من زاويا تانية وهي ان احنا طول عمرنا اعتمدنا علي شخصية وحدة في حياتنا مع اختلاف الشخصية بمعني يا احنا اعتمدنا علي ابوناهو الي بيصرف علينا ويخترنا كل حاجة حتي يحلملنا اغلب الناس ابوها هو الي اخترها الكلية قبل مكتب التنسيق واماكن الخروج وكل حاجة حتي الشغل لازم ابوك يشوفلك وسطة ولما تشتغل لازم هو الي يجوزك علي مزاجة وبفلوسة دي نموذج وتيجي في الكلية تلاقي مزاج الدكتور الي بيحط الامتحان ومزاجة وهو بيصححة يعني مستقبلك محطوط في ايد واحد في حتة ورقة من كذا صفحة والنبي دي كلام ولما تشتغل مستقبل في ايد رايسك لازم توطي وتقول بقين حلوين حتي لو كنت بتشتغل زي الحمار بس لازم تجندل عشان الي بيشتغل زي الي مش بيشتغل يعني طول عمرنا بنعتمد علي شخص واحد بس في حياتنا وياريت الي رسالة تكون وصلت وكل واحد يفهما علي حسب دماغة
هناك هدف لكل من يأتى الى السلطة الا يطفوا على السطح ابدا من ينافس او من تكون له مؤهلات لخوض تلك المعركة او من يجتمع جوله الناس لحب فى ذاتة او لفكرة
تحياتى
هههههههههه
صحيح طويل العمر يطول عمره ينصره على من يعاديه
للأسف الدنيا بعد رحيل بابا مبارك, ادام الله عزه هتكون ملخبطة دا لأن البلد أصلا ملخبطة ومنيلة على عينها
مافيش نظام ديموقراطي بالمعني العملى..لكن هو نظام أمير البلاد وغوث العباد
الى مالوش نايب ولا بديل..البلد بقت خالية من الكوادر للأسف
مع ان بلدنا كانت طول عمرها ولادة
بس هاقول لك ايه
ربنا يرحمنا ويعوض صبرنا خير
:)
h
اولا شكرا على المشاركة اما موضوع هو اللى حمينا ديه اعتقد انها وسعت شويه وموضوع مين غيره يعنى وسط السبعين مليون مفيش حد ينفع ده كلام برضه
الطائر الحزين
شكرا على متابعتك للبلوج وديما تعليقاتك متميزة
بس حتى لو اللى بيوصل للسلطة بيبقى كده احنا لازم نعمل حاجة تخلينا نقدر نشيله ونجيب حد تانى ولا ايه
dr.roufy
اعتقد ديه اول مرة تزورى البلوج عموما انتى شرفتينا ونتمنى نشوف تعليقاتك علطول
وانشاء الله فى حاجات كتيرة هتتغير لما الرئيس يتغير بس يا ريت احنا نتغير احنا كمان
بص يا حدوته
كل اللى انا اعرفه ان الشارع المصرى فى حاله غليان كبيرة قوى
ومحتاجيين بس شويه تنظيم وهتلاقيه يبنطلق فى الكلام ويطلع كل اللى جواه
واتمنى ان ده يحصل فى السنه الجديده
اما بالسنه لموضوع الريس فالاعمار بيد الله واحنا منعرفش جمال انسان كويس ولا لا
يحكمنا اى حد بس المهم ان يكون بموافقه الشعب مش بكسر عظمته
طيب ممكن انا اسأل سؤال يا حدوته انت شايف مين فى السبعين مليون ممكن يكون رئيس لو تعرف حد قولي انا عن نفسي مش شايفه غير الرئيس مبارك ومن بعده انا هأرشح ابنه جمال هو اه ممكن يكون فى حاجة غلط فى الحكومه والدولة بس مش فى الرئيس فى إلى حوالية وفى الشعب نفسه احنا المصرين اتعودنا ان احنا لازم حد يسوقنا يعني مينفعش نمشي لوحدنا ونعتمد على نفسنا ونرجع بعد كده نقول الرئيس وحش لا مش وحش احنا إلى وحشين اذا كان فى ناس لسه بتفكر بعقليه متأخره احنامنشتغلش فى الشغل ده علشان مرتبه صغير لا انا معايا بكالوريوس يعني ايه اشتغل واقبض 200 جنيه اخر الشهر لا انا اقعد على القهوه واخد مصروف من ابويا لحد ما تيجي الوظيفه إلى هأخد منها 1000 جنيه فى الشهر ودى بردك مش حاجة لا نها مش هتكفي وهنفضل فى الدوامه دى نلف حوالين بعض ونقول ما فيش شغل فى بطاله ما فيش فلوس فى البلد بصوا كده للصينين إلى ملوا البلد الواحده منهم أو الواحد شايل على ظهرة شنطه مليانه بضاعه وبيلف بيها يبيع احنا فى عندنا شاب ممكن يوافق انه ممكن يعمل كده لا مستني لما رئيس الدولة يشغله ويجيب له شقه ويجوزة ويدخل الولاد مدارس علشان هو الرئيس انا عاوزة كل واحد يحط نفسه مكان الرئيس ولو قدرت تعمل حاجة ابقي تعالي قابلني
انا مش معاكي يارحاب يعنى اية مفيش غيرة ومفيش غير جمال فى ناس فى مصر كتير تنفع بتحبها وتقدر تدي اكتر ومش عشلن احنا اتعودنا ان حد يسوقنا يبقي لازم نتساق لا غلط لازم نمشي لوحدنا ونقرر بنفسنا علشان لما نغلط منرميش المسؤلية علي حد وبعدسن بالنسبة للشغل انت عايزة الي بياخد 200 في الشهر يعمل بيهم اية موصلات واكل ولا لبس ولا يحوش علشان يتجوزك ويفتح بيت ولما يخطب ويخرج مع خاطبته المفروض هيصرف كام ولما يعوز يخرج مع اصحابة مرة واحدة في الشهر تكلفة كام ردي عليا ؟؟؟؟ انا مابقولش مايشتغلش 200 جنية بس هيعمل بيهم اية يشتغل هيكسب خبرة بس مش كفاية وعموما احنا لازم نختار رئسنا بنفسنا علشان لو طلع وحش نقدر نغيرة ونجيب احسن منه يبقى اخترنا بنفسنه حاجة واحدة فى حيتنا ونتحمل نتيجة هذا الاختيار
فى الحقيقة الموضوع هام والمفروض بل من الواجب ان تهتموا بيه وانا بالرغم من تحفظى بل وغضبى من الحال الذى اوصلونا اليه لكن لى بعض الملاحظات اولا : اشعر اننا نفتقر الى الديمقراطية فى سلوكنا كافراد وانا اسال كام اب ديمقراطى مع اولاده ؟ كام ناظر مدرسه ديمقراطى مع المدرسين والطلاب ؟ كام رئيس عمل ديمقراطى مع مرؤسيه ؟ وغيره وغيره....
ثانيا : اشعر ايضا ان اغلبنا يميل لموضوع التوريث وخد عندك كام استاذ جامعه عمل المستحيل علشان ابنه او بنته ياخذ مكانه حتى لو مايستهلوش ؟
كام طبيب وكام مهندس بيجهزوا اولادهم لنفس المصير ؟ حتى الصنايعيه بيعملوا نفس الحاجه وغيره وغيره ....
ثالثا : اشعر ايضا اننا نفعل نفس الشئ فى الانتخابات سواء فى الاحزاب او النقابات او حتى فى اتحاد طلاب المدارس او اتحاد ملاك العمارات بنحب كلنا السلطة ومن اجلها نكذب وننافق وغيره وغيره .... عندكم تفسير لكده ؟ !!!
انا شايفه ان التفسير لده ان فى خلل كمان فى اخلاقنا وتصرفاتنا وطريقة تفكيرنا يعنى البلد مش بايظة بس بسبب ان الطريقة اللى بيحكموا بيها البلد غير صحيحه ولكن احنا كمان كافراد بنتعامل مع بعض بطريقة خاطئه وده يخلينا نفكر شويه احنا دايما بننتقض حال الدوله وده مش فى المدونه ديه بس ده فى التليفزيون وفى جميع صحف المعارضه ده حتى الناس فى الشوارع بتتكلم وده مش غلط فعلا حال البلد ميسرش بس برضه لو فكرنا ان مثلا الظباط اللى بيعزبوا فى الناس دول مش مننا؟!! الظابط ده مش هو الابن او الاب او الاخ هو مصرى زينا بيخرج من بيت عادى اهله ناس طيبيين او الموظف اللى بياخد الرشوة ده مش مننا برده ولا هو كل اللى بيزودوا خراب البلد دول من عالم تانى فاحنا لازم نبدا بنفسنا يا جماعه لازم نلاقى سبب لكل اللى بنعمله ولازم نقر ونعترف ان الخلل مننا كماان وربنا قال ( لايغير الله ما بقوم حتى يغيروا ما بانفسهم )
الفراشة الصغيرة
كلامك مظبوط وانا متفائل وشايف ان التنظيم اللى قولتى علية ممكن
اما موضوع ان جمال كويس ولا لا هنعرف لما يحكم وربنا يستر
رحاب
يا اخت رحاب يا ريت تتكلمى عن نفسك انا عن نفس مبحبش حد يسوقنى عشان انا بعرف اسوق وانتى كفاية عليكى ناصر وانا عارف ان هو سواق جامد اوى
اى خدمة
الحاج
الله ينور ايوة كدة عايزك حمش علطول ويا ريت نشوف تعليقاتك ديما
هو اليورو بكام النهاردة
حدوتة شكرا علي تعليقك بس انت رضك علي رحاب كان غلط لان احنا اغلب الوقت بنساق وانت في الجيش وعارف انت داخل الجيش حب ولا خصب او تقلي ان طول عمرك فكرك من دماخك الكلام حلو اوي اوي بس لازم نفكر احنا عايزين اية واية الي نقدر نعملة عايزين حسني عازين جمال عايزين اي حد تاني اعتقد احنا عايزين انتخابات محترمة طب احنا عملنا اية عشان كدة اغلب الناس الموجودة الي بتكتب مايعرفوش اسماء الوزرا بتعانا او اسماء علماء او كتاب او سياسين هما عرفين كويس اهلي زمالك وممثلين يبقلي لازم نفكر لازم الناس تثقف تقرا تتابع عايزهم ازاي يرشحوا وهما مايعرفو حاجة النسبة الكبيرة اوي كدة واتقساش علي رحاب عشان هي صح وانت بتكلم كلام وبس
اليورو ب8 يا حدوته
الاستاذ الي بيقول ان رد حدوته غلط هو غلط في ايه كل واحد بيتكلم وجه نظرة ومعرفته يعني رحاب متعرفش غير الريس وجمال بس في ناس كتير موجودة غيهم مثل عمرو موسى الراجل ده من كتر خوف امريكا منه مسكته منصب اكبر (جامعة الدول العربية) علشان ميمسكش الحكم بعد مبارك ولو دخل الانتخابات كان كسب ده مثل من 100 مثل يعني انا قصدي ان رحاب مش غلط بس علي قد معرفتها مفيش غير مبارك لانها اتولدت وكبرت وهتجوز وهو رئيس مصر علشان كده هيه متعرفش غيره ذي ناس كتير********
حد يقولي الريس ماسك من 25 سنه حد حس ان فيه حاجة اتغيرت يعنى الاحوال بتتصلح والناس بتلاقي شغل ومستريحة والاسعار ممتازة وفي متناول الجميع ومفيش اطفال شوارع وبتتوزع علينا فلوس قناة السويس وكل واحد بيخش الكلية الي هو عيزها ومفيش وسطة علشان تشتغل ولا رشاوي في البلد ولا عمارات بتوقع ومن كتر الراحة الشباب كلة اتجوز ومفيش تحرش بالبنات ومفيش بلوعات في الشوارع كل سنة كان واحد يموت وبناخد حقنا فى بلدنا يعني اي حد من برة مصر اجنبي او عربى لما يموت او يصيب مصري بياخد جزائة ويدخل السجن ويحاسب يعني .........الدنيا بمبي وردي واشطا يامان
شكرا ياحج علي ردك بس انت مافهمتش انا عايز اقول اية بالظبط انا ماقلتش ان الحياة حلوة اي حد عايز يقدم نفسة في الانتخابات يقدم بس يعرض الفكر بتاعة ويعرض البرنامج بتاعة عشان العب يفهم عايز اية ودة دورة انت بقي دورك اية دة السوال الي لازم تسالة لانفسك تقعد علي القهوة وتتفرج وتقول لاوالله الراجل دة باين من كلامة كويس وتسحب في الشيشة دة مش دور الدور بتاعنا ان احنا نجتهد في الشغل وفي الثقافة ونحاول نفهم كل الظروف الي حاولينا ومانسمعش بقين حلوين ونقول الله الراجل دة بينة كويس الكلام دة غلط انت قلت ان البلد بايظة انت حاولت تعمل اية فكرت في اية عشان تصلح حالك وبعدين تصلح احوال البلد ابدا بنفسك وشغلك ومستقبلك ماتفكرش مين الي جي ومين الي رايح كلنا هانموت بس لازم\نفكر احنا هانموت ونسيب زكري كويسة ولا هانموت ومش هانسيب حاجة وعايز اعرف منك حاجة(انت بتحب تعيش جنب الحيط ولا عايز تكسر الحيط ) لو فهمت الجملة دي رد عليا
أيه السؤال الأخير ده هو بعد كلامك ده فيه سيناريو تانى؟
على فكرة التمبلت الى فاتت كانت احلى بكتير
كل سنة وانتى طيبة و ممكن تسمحيلى بالمساحة الأعلانية دى ؟
طب يا ستى ألف شكر :))))))
------------------
صاحب البوابة http://elbawaba.blogspot.com/ يدعوكم لحضور حفل أفتتاح دار النشر الخاص به ، حلم شاب تحقق بأمكانيات بسيطة - تجربة تستحق التشجيع - فى انتظاركم غدا الحميس 10 \ 1 \ 2008 الساعة السادسة مساءا فى مكتبة البلد 31 ش محمد محمود أمام الجامعة الأمريكية
بص ياحدوته انا عايز اكسر الحيط واعدي يعني لازم اتطور واجتهد في شغلي والحمد لله انا بنعمل كده ومع ذلك انا غير راضي على نفسي عايز ابقي افضل بس الحياة مش مسعده المهم ان لما فيى واحد يتقدم للانتخابات ويقدم برنامج جيد يعني يقدر ينفذة ميكونش شوية احلام علشان يضحك بيها علي الناس انا اول واحد انتخبه واسيب الشيشة من ايدى واكسر الحيطة وسعتها هفيد واستفيد ولو معفتش اكسر الحيط ايقي حولط علشان المرة الجاية اكسرة واقف فوقية
انا اسف مكنش قصدي لحدوته انا قصدى للاستاذ )من فضلك اكتب اسمك علشان اعرف انا بنتكلم مع مين(الحج
طول ما سيناريو الفوضي في البلد
مفيش مشكله هتتحل ابداًَ!
تحياتي للكلام الرائع
على فكره انا مش زعلانه من رد حدوته عليا علشان انا فاهمه هو عاوز يقول ايه وشكراً للردود إلي جت بعد التعليق بتاعي بس ف رد عجبني قوى رد الحاج الي قال اني انا مشفتش غير مبارك وبس وهو فعلاً صح انا مشفتش غيره كبرت واتجوزت وجبت بنت وانا معرفش غيره يمكن تقول تعود حب عشرة مش عارفه بس انا لما بأشوفه باحس انه اب عارفين ايه النقطه إلي ممكن تكون مخلياني احبه واحترمه هي الحرب اسألوا نفسكوا كده كل شاب واب وام انتوا عاوزين والدكوا يروحوا فى الحرب عايزينهم يموتوا ويستشهدوا فى الحرب اذا كان لما بيروحوا الجيش بنزعل وبنتضايق مابلكم لو راحوا الحرب يعين ايام حرب الخليج وحرب العراق وغيره وغيره كنتوا هتفرحوا لو بعت ولادنا للحروب ديه كلها معلش متخدكوش الحماسه قو وتقولوا اه لان ساعتها هتقولوا كنتي فين يالا لما جيت اقول انا اه بجد بجد ان باحبه جداً وبأحترمه والي شايف غير كده هو حر
الموضوع فعلا مهم وكبير
بس لازم نفكر فيه
لان هيجى يوم ومبارك عصرة هينتهى
سواء بقى انتخابات فترة تانيه او موت
فكده كده هو مش هيفضل على طول
واكيد زى مافى حاجات وحشه عملها فى حاجات حلوة
محدش يقدر ينكر دة او دة
بس لو فكرنا مين يمسك البلد بعدة
مع الافتراض يعنى ان مش جمال اللى هياخد الرياسه بعد مبارك
طيب مين؟؟؟؟؟
وفين ؟؟؟؟؟
يعنى اكيد مصر فيها ناس كتيير كويسه
بس هما فين؟؟؟؟؟؟؟
فى ناس كتير بتفكر صح
وممكن تصلح كتير فى احوال البلد
بس ياترى ممكن يوصلو لفوق قوى كده؟؟
مرة دكتور من حقوق قالنا كلمه فى محاضرة حقوق انسان فى اول سنه فى الجامعه
كنا بنجادل كتير قووووى فى موضوع اللى بيفكر واللى بيحاول يصلح البلد
وكلامه صدمنى شخصيا بطريقه كبيرة
قالنا لو عايزين تعرفو ناس بتعرف تفكر وممكن تصلح البلد هتلاقوهم فى معتقل تحت الارض فى الصحرا اللى ينا وبين ليبيا
طيب ليه؟؟؟؟؟؟
وازاى؟؟؟؟؟؟؟
لانهم حاولو يقولو رايهم ويصلحو البلد؟؟
ولا علشان اللى ماسكين البلد مش عايزين حد تانى يقولهم لا؟؟؟
اكيد فى يوم هيجى على البلد دى ويحصل تغيير
بس ياترى ساعتها التغيير دة هيودينا لفين؟؟
لفوق ولا لتحت؟؟؟؟؟؟
ياترى لو حد عندة حاجات تفيد البلد بجد
وتحل مشاكل الشعب بجد
هيقدر ينفذ دة ؟؟؟؟
ولا هيطلع حكومه وداخليه وامن دوله
ويبوظو كل حاجه زى كل مرة
كل دة محدش هيقدر يقررة
وهنفضل زى ماحنا لحد امر ربنا مايتم
وربنا يسترها بقى
بقولكم ايه انا شايف ان اللى نعرفه احسن من اللى منعرفوش. وعلى فكره ده مش يأس ولا حاجه لاسمح الله, لكن الفكره فى ان اى واحد جديد عايز ييجى نفسه يلحق يلم وياخد كل اللى يقدر عليه قبل مايمشى, طب ما احنا عندنا واحد اخد كتيييييييييير وشبع خلاص ومش محتاج تانى يبقى يفضل احسن من ان واحد تانى ييجى مكانه ويبدأ ياخد من اول وجديد.
وانا اعتقد انه خلاص مبقاش فى حاجه فى البلد ممكن تتاخد تانى. فتخيلوا بقى اللى حييجى جديد وميلاقيش اللى ياخده,
ساعتها بقى حياخد ايه؟؟؟؟
يبقى مش حنلاقى ناكل خالص بقى ساعتها.
على فكره يا جماعه انا نسيت اقولكم حاجه" الكرسى ده ليه سلطه للى بيقعد عليه وليه جبروت" يعنى اللى بيكون على كرسى الحكم بيلاقى نفسه غصب عنه مضطر انه يلم اللى يقدر عليه. فا متتوقعوش ان فى واحد حييجى يقول لا انا مش عايز فلوس واملاك وثروه.
على فكره قطز وصلاح الدين والناس ديه كانت زمان مفيش زيها دلوقتى
gost
والله انا مش عارف اقولك ايه
بس اكبر دليل على المصيبة اللى البلد وصلتلها هى ان فى ناس بتفكر ذى حضرتك
لما بلد توصل واحد انه يقول ان الحرامى القديم اللى شبع احسن من اللى هيجى جديد ويسرق من الاول
طب متقول احسن نحول مصر لمملكة بدل جمهورية ويبقى حسنى مبارك ملك ويسيب البلد بعده لسمو الامير جمال ولى العهد وكده محدش هيسرق نفسه لان البلد بلدة وخيرها كلة بتاعه
انا اسف بس لو البلد فيها ناس كتير رأيها ذيك يبقى احنا منستهلش غير اللى احنا فيه والله يعوض علينا
طب وهو انت بتقول فيها ما هو فعلاً ناس كتير رأيها كده فعلاً وبتقول نفس الكلام شباب وكبار لحسن تكون فاكر أن الناس إل زى ابويا وأمي هما بس إلي بيقولوا كده لا من جميع الفئات بيقولوا نفس الكلام لان مافيش واحد هيجي يمسك الحكم وها يكون حاسس بينا إلى بيجي مش واحد فقير من الشعب لا إلى بيجي واحد باشا محترم عايش وهو فى بقه دايماً معلقه دهب يعني مش هايجي واحد موظف بسيط ويرشح نفسه ,احنا هنوافق لا لازم يكون واحد كبييييييييييير باشا يعني ولا انت مش عايش فى الدنيا دى ولا ايه يا حدوته .
مابلاش السيرة دى أبوس إيدك أنتا عارف أن أعصابي ضعيفة
ممكن أناقش الموضوع ده معاك بعد 38 يوم أنشاء الله
(زميل أيام الشقاء)
حمد الله على السلامة يا حكمدارى وحشنى موت خلاص يا عم هانت وهتسبنى وتمشى بس برضة معرفتش رأيك
متبقاش خواف وقول كل اللى فى نفسك
والله يا جماعه انا شايفه انه الايام دى اهو مسلك اى حاجه
يعنى انتوا متاكدين ان هو اللى بيحكمنا
ليه ميكونش جيمى او الست هو الراجل صحته هتستحمل ايه ولا ايه
عموما تمتعوا بالسيئ فالأسوء قادم
علي فكرة انتوا مدونة اي كلام انا مش قصدي التجريح والله بس المفروض اني كاتب رأيي عشان الناس تقراه بس انا كتبته بأسلوب ساخر شويه مش أكتر , مش من حق اللي ماسك المدونه انه يمسح تعليقي الا لو اصدقاء المدونة قالوا كده لكن انا مش شايف حد معترض وبجد اما زعلت , وربنا يستر .
shakal
متشكرين يا سيدى
بس الغلط عندك مش عندنا
محدش مسح تعليقك ولا حاجة انت اللى علقت على موضوع الرئيس فى تعليقات الموضوع اللى قبلة ولو دخلت على تعليقات موضوع الحب هتلاقى تعليقك ذى ماهو متمسحش ولا حاجة
عموما ولا يهمك وانت نورت المدونة ويا ريت نشوف تعليقاتك ديما بس ركز وشوف انت بتعلق فين
وعلى فكرة احنا مبنمسحش اى تعليق الا لو فيه كلمة ميصحش حد يقراها بس الحمد لله كل الناس اللى بتعلق ناس محترمة ومحافظة على المدونة
طب انا راضية ذمتك
دى صورة تحطيها فى بوست فى اول السنة الجديدة
بلاش السنة الجديدة
دى صورة تحطيها فى مدونتك اساسا
ربنا يسامحك
على فكرة جارك السو محصن لا بيرحل ولا بتأثر فيه مصايب
الاميرة ويلز
يا سيتى ما الصورة متعلقة فى كل حتة ده مش ناقص غير نعلقها فى اوض النوم يعنى هى جت على المدونة بتاعتى
وعموما مفيش حد متحصن وكل واحد ليه يوم مهما طال الزمن بس انتى ادعى ربنا يسهل
ربنا يخلي الرئيس مبارك ويرجعلنا حكمه بتاع زمنا والحرس القديم وهقلكم ليه من حوالي 5 سنين قبل الحرس الجديد كانت البلد زي الفل طوابير العيش موجوده بس الدقيق بيكفي المواصلات رخيصه والاكل رخيص وكل حاجه زي الفل المواطن العادي ب500 ج بياكل ويشرب علي اقل تقدير
إرسال تعليق