الأحد، ٢٢ مارس ٢٠٠٩

البحث عن السعادة

تخيلوا ان فى ناس بتقضى عمرها كله بتحاول تلاقى السعادة وبتفشل , وكل النظريات والتوجهات اللى حصلت وبتحصل لحد دلوقتى هدفها الاساسى الوصول الى السعادة , والواحد لما بيفكر فى سبب ارسال الرسل والكتب السماوية ؟ بيلاقى الاجابة هى تنظيم حياة البشر اللى بيوصل فى النهاية الى الوصول للسعادة , احنا بما اننا مسلمين فعندنا من القرأن والسنة اللى ينظم حياتنا الى يوم القيامة مع اختلاف الزمان واختلاف اسلوب الحياة , لكن مع الاسف فى مسلمين كتير مش حاسيين بكده !!!!! مع انهم ممكن يكونوا بيصلوا وبيصوموا وبيعملوا كل الفرائض , بس انا بتكلم على الايمان اللى جوة القلب واللى محدش يقدر يعرفه غير الانسان نفسه وربنا سبحانه وتعالى . حد يقدر يقولى كام واحد مننا مؤمن بجد وحاسس انه صح وانه على حق وان الاسلام هو خاتم الاديان , انا بشوف ناس كتير مسلمين فى البطاقة وبس , محدش يعرف عن دينه حاجة واللى عارف مش بيتعب نفسه ويدور ويقرا ويقارن عشان يبقى عنده يقين انه صح , مع ان الاسلام بيخاطب العقول وبيخليك تقتنع بيه من غير ضغط من حد , وربنا سبحانه وتعالى كل فترة بيأكد لنا ده عشان الناس اللى ايمانها ضعيف تبقى متأكده انها على حق , ومن امثلة كده الازمة العالمية اللى احنا فيها دلوقت واللى اثبتت فشل النظام الرأسمالى , وانا هنا مش بتكلم بشماته بس انا بتكلم عن نظام اوهمونا انه النظام الوحيد القادر على استيعاب المتغيرات , وكان اى حد يتكلم عن الربا والحرام والحلال الف واحد يردوا عليه ويقولوا الدين حاجة والحياة حاجة تانية والكلام ده من 1400 سنة ومينفعش يتطبق دلوقتى !!! فتحصل الازمة ويفشل العالم فى المواجهة ويندهش علماء الاقتصاد عندما يجدوا ان المؤسسات الوحيدة التى لم تتأثر بالازمة هى المؤسسات التى تعمل بالنظام الاقتصادى الاسلامى !!!! وتكتب المقالات فى الغرب التى تدعوا الى العمل بالنظام الاقتصادى الاسلامى لانه الحل الوحيد للخروج من الازمة , واكبر بنوك العالم تنشأ فروع خاصة تعمل بالشريعة الاسلامية , ومن الامثله الاخرى انه وبالرغم من التقدم الهائل اللى حققه الغرب فى مجالات كثيرة إلا انه فشل فى المجال الاجتماعى يعنى المجتمع الغربى مجتمع مفكك , وانا ساعات مثلا لما اشوف الحال عندنا واقف وسن الجواز عدى الـ 30 وبدأت تكتر حوادث التحرش والاغتصاب ساعات اقول بينى وبين نفسى ياسلام لو احنا عندنا العلاقات زى برة وكل واحد يبقى مظبط مع اتنين تلاتة والحياه سهلة لا حد يقولك شبكة ولا مهر ولا انت عليك ايه واحنا علينا ايه والكلام الفارغ ده !!!!!! ويبقى مفيش مشكله انك تعمل اى حاجة مع اى حد فى اى وقت يعنى العملية تبقى ظيطة , بس لما الواحد يركز شوية ويشيل البلاوى اللى فى دماغه ويبص للموضوع كله من فوق هيلاقى ان الغرب بقاله فى الحاله دى اللى هما بيسموها الحرية واللى وصلت للدرجة انهم بيسمحوا بجواز رسمى للمثليين يعنى يبقى الوضوع موثق وقانونى وبيعملوا فرح وزفة كمان !!!!!! الحرية بتاعتهم دى وصلت بيهم لحد فين يعنى لو شيلنا الدين من الموضوع وبصينا على الحياة الغربية دى كتجربة , يا ترى نتيجة التجربة دى ايه ؟ هل هما وصلوا للسعاده ؟ هل هما استريحوا وكل مشاكلهم اتحلت ؟ اكيد الاجابة لأ !!! والدراسات اللى اتعملت عندهم بتأكد وجود مشاكل نفسية كبيرة فى المجتمع الغربى , وحتى الناس اللى متابعين السينيما الغربية هيلحظوا ان فى افلام كتيرة ابطال الفيلم بيروحوا لدكتور نفسى وان الشاب هناك بتلاقيه وصل لسن 40 سنة وهو لسة يعرف واحدة ويقعد معاها شوية ويسبها والست تفضل لسن كبير خايفة تجيب اولاد عشان مش مستقرة مع حد معين فتعمل عمليه وتخلف طفل متعرفش مين ابوه , وتكبر السلسلة لحد ما المجتمع يبقى زى الغابة , اما فى الاسلام فالطهارة والعفاف بيخلى المجتمع متماسك قادر على مواجهة اقسى الظروف , بس مع الاسف مظاهر غربية كتير بدأت تظهر وتنتشر فى مجتمعتنا بسبب الاعلام المغيب والقدوة المفقودة وخوف الحكام من كل ما هو اسلامى !!!! الغرض من الموضوع ده كله ان كل واحد فينا يبقى على يقين انه صح ويشعر بالسعاده انه مسلم

هناك ١٦ تعليقًا:

ماء تشرين يقول...

عودا أحمدو زاى مابيقولو

اما بالنسبه للموضوع ده عشان كده البيسلموا من الغرب او البيدخلوا في الاسلام جديد بتحس انهم هما دول المسلمين بجد والسعاده مليه قلوبهم وباينه على وشهم لانهم وجدو الراحه الحقيقيه اما احنا فااحنا مسلمين كده بالوراثه ياعنى

الاسلام مجرد وراثه
والعبادات مجرد عادات


اما بالنسبه للظيطه فهى مش سعاده والدليل ان هما بيدورو على السعاده
وبعدين عارف حتى الاسلام حط لشباب طريق لو لم يجدوا الزواج فهما كمان في عهد الرسول كان في ناس مش قادره تتجوز

"من استطاع منكم البأه فليتزوج ومن لم يستطع فعليه بالصيام فأنه له وجاء"
والموضوع ده كبير اوووى
يطول شرحه
موضوع جامد زاى ماعودتنا

تحياتى

خواطر رئيس شاب يقول...

حبيبى وابن حبيبى

عامل ايه

اكيد ارتباطك بالله هو الطريق للسعادة

والمثل على كدة ولله المثل الاعلى

الصانع عندما يقدم كتالوج للاستخدام الامثل -افرض انك خالفت تعليمات التشغيل دى ايه اللى ممكن يحصل ؟

بالضبط هو ده المفهوم اللى لازم يكون المسلم مقتنع بيه الا وهو

ما امرنا الاسلام بفعل شيئ ضار وكمان لم ينهانا الاسلام عن شيئ الا وهو بالتاكيد ضار مهما اختلف الزمن والتفكير والتقدم والكلام اللى بنسمعه ده كله

بمعنى اخر انك تسلم نفسك لربك وتفعل ما امرك به وتنتهى عما نهاك عنه حتى تفوز بدار السعادة التى اعدت للفائزين

موناليزا يقول...

نشعر بالسعادة فقط!! ده بالعزة والفخر وكل حاجة حلوة
تعرف كلامك ده جعل فكرة تانية خالص تيجى فى بالى وهى ان غالبية ابناء الغرب ابناء حرام فماذا تتوقع منهم

الفراشة الصغيرة يقول...

الف مبرووووووووووووووووك

اخيرا
نزلت بوست
والله فرحت

انا قولت الحق مكان هقرا واجى تانى

الفراشة الصغيرة يقول...

الحمد لله على نعمه الاسلام

والله يا واد يا حامد
كلامك كل حكم

بس السعاده شىء نسبى
ومن الصعب تلاقى حد سعيد فى الدنيا دى
حتى الغرب عملوا كده علشان يشعروا بها
لكن للاسف محسوش الا باحساس وهمى بالسعاده
الذى تحول بعد ذلك الى شذوذ
وبقوا يعانوا من مشاكل نفسيه اكتر

مجداوية يقول...

السلام عليكم

كلام يتوزن بميزان الدهب

الفتنة بالآخر موجودة منذ ظهور الاسلام
ربنا قال في سورة آل عمران:


لَا يَغُرَّنَّكَ تَقَلُّبُ الَّذِينَ كَفَرُوا فِي الْبِلَادِ (196)
مَتَاعٌ قَلِيلٌ ثُمَّ مَأْوَاهُمْ جَهَنَّمُ ۚ وَبِئْسَ الْمِهَادُ (197)
صدق الله العظيم

هم حيفضلوا فتنة لنا مع تقدمهم الحضاري وتحكمهم في العالم

اللي انت وصلت له هو هداية من الله ومنحة فاشكر الله عليها فكثير كما ذكرت لا يحس نعمة كونه مسلم بل يتأفف ويعتقد أن محافظة الاسلام على الانسان هي قيود ولهذا يسعى للتحرر منها وتقليد الغرب ,وهو فهم خاطىء تماما للاسلام لأن لنا حقوقا ليست لديهم وحرية لا تقارن بحريتهم المنفلتة لأن حرية الاسلام محمية بسياج الطاعة لله ولأن الله خلقنا وهو أدرى بخلقه وما ينفعهم وما يضرهملذا فالقوانين الوضعية ستثبت فشلها وستنهار كما انهارت الاشتراكيةوغيرها لأنها من وضع الانسان القاصر علمه فمن الغباء اتباع نظم انسانية تفصل الدين عن الحياة لأن الدين هو نظم متكاملة وكاملة لهذه الحياة

لو قرأت التوراة والانجيل المحرفين ستشكر الله على نعمة الاسلام فشتان بين القرآن وبين ما تقرأه في تلك الكتب ,والقرآن اذا قرأته بقلبك وبتفهم معانيه وبالتجويد الصحيح ستجد دموعك تغلبك ولن تستطيع لها دفعا من روعته وبيانه وحكمته وهو ما كان يحدث مع الصحابة لأنهم أهل لغة فدراسة اللغة العربية وعلم التجويد ينقلك من مكان مسلم عادي إلى مكان آخر تحس فيه بالتميز والرقي والسمو وأنصح كل مسلم أن يتعلم هذا ويسعى لتحسين لغته وسيرى الفرق الكبير وسيحس أيضا بحلاوة الايمان
كنت يوما ما ممن ذكرتهم أصلي وأصوم وأقوم بجميع الفرائض ولكن حلاوة الايمان لم تكن تحس الا في رمضان مثلا أو على فترات متباعدة لكن ولله الحمد القرآن غير هذه الحالة وأدخل حلاوة ما بعدها حلاوة وشكرا دائما مخلصا لله أن جعلني مسلمة فمن ذاق عرف ومن عرف غرف ,,جزاك الله خيرا على هذا الموضوع القيم ودعوتك الكريمة للتعلم والتفقه في الدين
والحمد لله رب العالمين أن جعلنا مسلمين

kochia يقول...

الحمد لله علي نعمة الاسلام
وكفي بها نعمة

عندك حق
السعادة في الايمان من داخلنا

تحياتي

غير معرف يقول...

firstly, im sorry for having to type in english, but the thing is , when i think- and that doesnt happen much-i believe that what ever makes anyone happy is a kind of sedation or a drug as with no real value as long as its not happening to someone who is near to God, i see our life as a very temporary period in a loooong looong journy, and i feel very stupid when i am far from God. i guess that anything you do and think pleasuerable cant be if not done while you feel God is content with it.

غير معرف يقول...

sorry ya Hamamad ana asef enny katabt belenglish, bassel keyboard mafeehoosh 3araby!!wenta 3aref akhook mee7 computer,akhook meen?Fazluka ,158, taba3an!

rovy يقول...

السلام عليكم
حقا انه لفخر لنا و نعمة كبيره من الرحمن علينا .. الحمد لله على نعمة الاسلام
لله كل الحمد و الشكر لأنى مسلمه

صدقت اخى الفاضل فى ما كتبت حقا
سلمت يداك

دمت بكل الخير

تحياتى

شاب كــ طخين ـــــا يقول...

الحمد لله على نعمة الأسلام وكفى بها نعمة

شكرا على البوست الجميل

حاجــ عيال ــات يقول...
أزال المؤلف هذا التعليق.
حاجــ عيال ــات يقول...

السلام عليكم
مقالك جميل فعلا
والايمان بالله والالتزام بالشريعه هو طريق السعادة

أحييكي وأشكرك
جهاد مشالي

ماء تشرين يقول...

ياسيدى عارفين انك مشغول بس مش كده ده النبى وصه على سابع جار وانا اقرب من كده

أم البنات يقول...

طيب انا مش لاقيه كلام ارد على مقالتك الرائعه
وتذكرت قول قالته لى إحدى حبيباتى فى الله قاله الشيخ عمر عبد الكافى
عندما كان بيشرح اسباب عنف الابناء مع آباؤهم
تفتكر قال إيه
بيقول ان الطلاق والرجوع والطلاق.زوالاستعباط من الراجل وانه مطلقهاش وانه
بيخليهم يخلفوا اولاد (ابناء زنا)
فماذا تتوقع من ابناء زنا غير العقوق

طبعا اتفزعت بس لما فكرت لقيت كلامه صح

ربنا يعافينا ويعافى كل المسلمين ويردنا للإسلام رد جميل


حضرتك فين؟؟

أم البنات يقول...

طيب انا مش لاقيه كلام ارد على مقالتك الرائعه
وتذكرت قول قالته لى إحدى حبيباتى فى الله قاله الشيخ عمر عبد الكافى
عندما كان بيشرح اسباب عنف الابناء مع آباؤهم
تفتكر قال إيه
بيقول ان الطلاق والرجوع والطلاق.زوالاستعباط من الراجل وانه مطلقهاش وانه
بيخليهم يخلفوا اولاد (ابناء زنا)
فماذا تتوقع من ابناء زنا غير العقوق

طبعا اتفزعت بس لما فكرت لقيت كلامه صح

ربنا يعافينا ويعافى كل المسلمين ويردنا للإسلام رد جميل


حضرتك فين؟؟