الاثنين، ٢٥ مايو ٢٠٠٩

احلام المصريين

مجلس الوزراء بتاعنا اطال الله فى عمره عمل بحث او استفتاء بيسأل فيه عن احلام المصريين , وبصراحة انا بقالى فترة بفكر فى الموضوع ده وشاغل دماغى . الجميل فى البحث انه اكتشف ان معظم احلام المصريين انحسرت على الصحة والستر ورغيف العيش وتحسين التعليم !!!!!! وطبعا ده مؤشر خطير للحاله اللى وصلنا ليها فى بلدنا , عشان المفروض الحاجات دى كلها حقوق مش احلام , واعتقد ان الفرق بينهم كبير !!! يعنى المفروض ان حق كل مواطن فينا انه يلاقى رغيف عيش ادمى ومسكن فى متناول الجميع وحد ادنى من التعليم والرعاية الصحية , لكن لما يوصل بينا الحال ان كل الحاجات دى تبقى احلام يبقى احنا قدام مشكله كبيرة . ولما شوفت صور عن مصر والمصريين من 100 سنة وركزت فى وجوه الناس سألت نفسى , المصريين فى الوقت ده كانوا بيحلموا بأيه ؟ يعنى اى حد فينا يشوف الصور دى يقول اكيد كانت الحياه ساعتها اصعب بكتير من دلوقتى , واحنا عايشين النهارده بناكل وبنشرب وبنلبس وبنتحرك بطريقة اكثر تطور من زمان , بس من ناحية تانية هما مدقوش اكل فيه كيماوى ولا سماد مسرطن ولا شربوا ميه ملوثة ولا اتنفسوا من السحابة السوده !!!! يعنى يمكن حياتهم كانت افضل بكتير من حياتنا . وده يرجعنا تانى لحلم كل واحد فينا , هل فعلا بقى الحلم صعب وبقى مجرد القدرة على الحلم شىء متعب , وهل بقينا بنخاف نحلم ولا عارفين ان احلامنا مش هتتحقق فبقينا بنكسل نحلم , ولا ايه اللى حصل بالظبط !!!! المهم لو حد لسه بيحلم بحاجة يبقى يقولى ومش عايز الكلام بتاع الجرايد , انا عايز الحلم بتاعك الحقيقى اللى قبل ما بتنام او لما بتسرح بتفكر فيه

هناك ٢٣ تعليقًا:

Sweet Violet يقول...

تخيل بطلت أحلم !!!!

انا كنت فاكرة ان لسه احلامى جوايا .. بس انت لما قولت قبل ماتنام او بتسرح فيه

فكرت هو انا قبل ما انام بفكر فى ايه ... لقيت انى بنام على طول و ده بسبب انى بطحن نفسى طول النهار علشان انام من غير احلام

فكرت لما بسرح ايه اللى بحلم بيه .. مالقتش حلم !!!

ممكن لانى بقيت اخاف أحلم لان الاحلام مش بتتحقق ..علشان كده بسرح و افكر فى الواقع مش فى الحلم

ماء تشرين يقول...

سؤال صعب

بتحلم بأيه

هو ياعنى اصلا حلم

دى كلمه متقلتش من زماااااااااان

الحلم ده مش بتاع المصرين

المصرين اغتيلت احلمهم عشان يعيشو عبيد طول عمرهم واليفكر يحلم يطلعلو البعبع في الحلم يقولو

انت مصري

يبقه حلمك باطل باطل باطل مع الموسيقى الشهيره

تقبل مرورى

موناليزا يقول...

معك حق فى ما وصل اليه حالنا
اما عن حلمى
بأن ينصرنى الله على من ظلمونى
دعواتك

Esraa Hamed يقول...

طيب انا هقول كومنت كده بس يارب متضربش
:D

يعني في رأيي المتواضع ان ربنا بيدي كل حد علي اد تعبه
و علي اد حلمه

كلامي طبعا ميتعممش بس بجد تلت اربع الناس اللي بتشتكي من الفقر او ان مرتبهم مش مكفيهم تعالي نشوفهم هما عملوا ايه

لو في شغلهم هتلاقيهم اللي قاعد يقرا الجرنان و اللي اعده تعمل بلوفر لابنها الصغير و اللي بترغي من تليفون الشغل مع خطيبها
اما بقا لو الشركة متطورة شوية هتلاقيهم سايبين شغلهم و اعدين ع الفيس بوك او بيلعبوا جيمز

علي فكرة انا مش بقول كلام من الهوا الناس دي شفتها بنفسي و في اكتر من مكان

اما بقا لو ناس عندها ضمير وبجد بتشتغل و بتتعب في شغلها
خلينا نشوف هما بيضيفوا اييييه للمكان اللي بيشتغلوا فيه و بالتالي هيضيفوا ايه لمصر كلها
لما واحد يكون متخرج من 25 سنة و لسة لحد دلوقتي بيشتغل و بيتعب في شغله بس بالمعلومات اللي خدها في الجامعة من ال25 سنة دول
تفتكروا ده هيفيد البلد بحاجة !!
اللي قفل دماغه و ملوش نفس ياخد كورسات و يفهم ايه الجديد في مجاله بحجه انه هو ايييييييه بعد ما شاب ودوه الكتّاب !!
الناس دي هتضيف ايه
دول بيطلق عليهم بطاله مقنعه

علي فكرة
مصر زي ما فيها فقرا كتيييير بس بردو فيها ناس مش عارفة تودي فلوسها فين
و شغلهم كله في السليم
بس ناس حبت تشغل مخها و تزود قدراتها فضافت للمكان اللي اشتغلت فيه
و عشان هما تعبوا بجد
و تعبوا في الاتجاه الصح
ربنا بيرزقهم و بيعرفوا يعيشوا صح

في ناس يمكن معندهاش الوعي انها تطور من نفسها و دول بجد معذورين
بس اللي بقصدهم من كلامي الطبقة المتوسطة
اللي عندهم كل حاجة و مع ذلك مش قادرين يعيشوا
يمكن سوء تخطيط !!!


عذرا للاطالة و لكن البوست فتح ابواب كتير للمناقشة
:)))

لبنــــــــــى يقول...

بتعرف انك فتحت باب الاسئلة
يعني صار المواطن العربي يحلم باقل حق من البديهي انو يحصل عليه
انا شخصيا بطلت احلم كتير ما في وقت صار حتى للحلم

تحية لك

Israa El-sakka يقول...

حدوتة
فعلا إحنا بطلنا نحلم عشان كده إكتئبنا لأن مبقاش في حاجة تصبرنا ولا حتى الأحلام
بجد جي مصيبة ...يعني زي ما سويت فيلوت قالت أنا بقبى نفسي محلمش بليل عشان لما بحلم بتبقى أحلام سودة و مهببة أجارك الله يعني
أنا بحلم بحاجة فضفاضة أوي بس هي بيت القصيد بالنسبة لي
بحلم إني أرتاح ...راحة البال أنام على المخدة زي ماكنت صغيرة مفيش هم
حتقولي إزاي ....حقلك معرفش بس بجد لو عرفت حقلك
مستنية جيددك ، مدونة أكتر من رائعة و أتمنى دوام التواصل

دعاء مواجهات يقول...

ايواااااا

الموضوع دا كان نازل عندنا ف الجورنال
انت اكيد قرأته فية صح ؟؟

وهو فعلا المصرى مش عاوز اكتر من كدة يمكن لانو مش لاقى كدة اصلا

تحياتى ومودتى

مجداوية يقول...

السلام عليكم

احلام الدنيا ليست احلاماً بل هي متطلبات لكي نحيا الدنيا بشكل كريم
اذا وجدت كان بها واذا لم توجد فلن تفقدني أحلامي

فمن ملك قوت يومه وأمن على نفسه في داره وعلى دينه فقد ملك الدنيا وما فيهاوده صدقا وليس كلام جرايدأو خطبة جمعة

أما أحلامي فهى أن يحسن الله خاتمتي وأن يغفر لي ولوالدي ولابنتي ولأخواتي ولكل من أحبهم
فهذا حلمي الذي أتضرع إلى الله أن يتحقق

akeed يقول...

لفتت نظرى الصور الجميلة بتاعة زمان


تحياتى

سمكه واحده يقول...

لا ده انا رغايه موت ومن ناحيه الاحلام فانا طماعه جدا
احلام للدنيا ولنفسي وللمجتمع والناس واحلام للاخره وخاتمتي
بص مش عاوزه اطول عليك اصلي لو فتحت مش هقفل انهارده
بس انا نفسي في حجات اقدر اعملها وبسعي ليها ادعيلي انت بس ولكلالناس ربنا يحقق احلمنا كلنا بما يرضي الله نفسي اوووي ان شاء الله املنا في ربنا كبير
برغم بيني وبينك الواحد بطل يحلم من زمان
حلوه اوي اوي الصوره بتاعه زمان كان نفسي اعيش عصور زمان دي وعصور كتير واخد بالك مش عصر واحد

بقي انا مدونتي بتعملك دماغ طب شوف كده مدونتي التانيه مش هتعملك دماغ خالص ههههههههههه هتغير رأيك
لا بجد انت اللي مدونتك تحفه وافكارك جميله
تحياتي

حبيبـــــــة القمـــــر يقول...

السلام عليكم ورحمة الله
دا او ل تعليق ليا بعد غياب طويل جدا عن عالم المدونين بس مش هطول عليك هما كلمتين

الاحلام الخاصه للفرد جزء من الاحلام العامة

المشكله ان الناس بقى بتخلط بين الرضا وبين الطموح
زي مابتخلط بين التوكل والتواكل
يعني هي ثقافه عامه واسلوب حياة الناس اختارته لأنها مش عايزة تتعب

اقولك شوف اسلوب حياتنا بغض النظر عن فقر اوغني وشوف اسلوب حياةغيرنا في اي دولة متقدمة

بحييك من جديد يا حدوته واتمنالك التوفيق

حـــــدوتـــــة يقول...

Sweet Violet

منورة المدونة فى اول زيارة

فعلا الواحد لما يفكر شوية ممكن يلاقى نفسة مبيحلمش بحاجة خالص

سلالالالالالالالالالالالالالالالالالالالالالالام

حـــــدوتـــــة يقول...

ماء تشرين

عندك حق المصريين دلوقتى مش فاضيين يحلموا
كل واحد يا دوب عايز يعيش

سلالالالالالالالالالالالالالالالالالالام

حـــــدوتـــــة يقول...

موناليزا

والله حلمك مشروع
وربنا يحققهولك

سلالالالالالالالالالالالالالالالالالالالالالام

حـــــدوتـــــة يقول...

Esraa Hamed

انا فاهم كل اللى قولتيه كويس قوى
واتكلمت عنه قبل كده فى بوست قديم
بس المشكلة ان اليأس اللى بقى مزروع فى الناس اكبر من اى طموح عندهم
وقليل قوى اللى بيبقى طموحه اكبر من اليأس اللى حوليه

سلالالالالالالالالالالالالالالالالالالالالالالالالالام

حـــــدوتـــــة يقول...

jafra

فعلا المشكله بقت فى الوطن العربى كله
برغم من الغنى والرفاهية اللى فى بعض الدول العربية إلا انه لا يزال المواطن العربى حاسس بنقص فى حاجات كتير

سلالالالالالالالالالالالالالالالالالالالالام

حـــــدوتـــــة يقول...

Israa El-sakka

منورة المدونة فى اول زيارة
وشكرا على كلامك الجميل

راحة البال دى اجمل حاجة ممكن تحصل للأنسان
ربنا يريح بالنا جميعا

سلالالالالالالالالالالالالالالالالالالالالالالالالام

حـــــدوتـــــة يقول...

دعاء مواجهات

انا معرفش انتى بتتكلمى عن انهو جورنال
بس مش مهم انتى منورانى برضو

سلالالالالالالالالالالالالالالالالالالالالالام

حـــــدوتـــــة يقول...

مجداوية

كلامك يا استاذة دايما بيجيب من الاخر
وربنا يحسن خاتمتنا جميعا
ويغفر لنا وللمسلمين

سلالالالالالالالالالالالالالالالالالالالالالالام

حـــــدوتـــــة يقول...

akeed

شرفتى على كل حال

سلالالالالالالالالالالالالالالالالالام

حـــــدوتـــــة يقول...

سمكه واحده

يا سيتى افتحى براحتك ولا يهمك
هو حد شريكنا
وكويس انك بتحلمى كل الاحلام دى
ويارب يحققهالك كلها

سلالالالالالالالالالالالالالالالالالالالالالالالالام

حـــــدوتـــــة يقول...

حبيبـــــــة القمـــــر

حمد الله على السلامة
منورة المدونة بعد الغيبة الطويلة
وياريت اشوفك ديما

سلالالالالالالالالالالالالالالالالالالالالالام

rovy يقول...

احلامنا الخاصه اكيد موجوده جوه قلب كل واحد فينا مهما حصل مش ممكن حيدفنوها و لا تموت الا لو احنا اللى قتلناها بايدينا ..
لكن مع الاسف الاحلام العامه يمكن تكون غطت على احلام كثير من الناس و نسيتهم حتى يعنى ايه حلم ..
لما يكون فيه انسان جوعان و مريض و فقير و و ....... تفتكر ازاى ممكن يكون له اى حلم اكثر من انه يكون انسان يعنى مستور و يلاقى الدوا لو مرض و يكون من حقه يأكل و لو رغيف عيش ادمى .. كثير ده !!!!
ربنا يرحمنا برحمته الواسعه ..
حلم الناس دلوقت كده هو انهم يقدروا يحلموا تانى .. تفتكر ممكن ؟؟ و امتى ؟؟

خالص تحياتى