الاثنين، ٣ أغسطس ٢٠٠٩

حـامـــد الـهـجـــان

بالرغم من انى شوفت مسلسل رأفت الهجان حوالى 100 مرة قبل كده , إلا انه لما يتعاد على اى قناه بشوفه تانى , ولحد دلوقتى بتابع حلقاته باهتمام بالغ , المهم كنت بتفرج على حلقة من كام يوم وجت فى دماغى فكرة غريبة جدا , قولت لنفسى تخيل لو المخابرات المصرية راحولى على القهوة وقالولى يا محمد احنا اخترناك من وسط الـ 80 مليون عشان تروح اسرائيل وتبقى زى رأفت الهجان , وده طبعا نظرا لمواهبك الخارقة وحسك الوطنى العالى , المهم لبسونى العمه ووهمونى انى انفع اشتغل جاسوس !!! بس لما قعدت مع نفسى وفكرت , لقيت العملية مش هتنفع لكذا سبب , اول سبب انا مش هستحمل المغريات اللى هناك يعنى مينفعش كل ما اقابل واحدة من هناك زى (ايستر بولنسكى ولا يهوديت موردخاى) ولسه هظبط معاها , وده طبعا عشان مصلحة البلد مش لأى غرض تانى , يقولولى ابعد عنها عشان سلامتك وامنك هناك !!! اما السبب التانى فهو ان لما كان رأفت بيضعف او بيحس بتعب من اللى بيشوفه هناك وكان بيسأل على مصر , كان السيد نديم قلب الاسد بيقوله , مصر بخير يا رأفت , بنبنى مصانع ومدارس ومشروعات قومية , وبنعمر الصحرا , وبنتقدم يوم بعد يوم , وكل ده انت سبب فيه , طبعا بعد الكلمتين دول رأفت عنيه بتدمع وبيقوله خد بالك من مصر يا سيد نديم , المهم انا تخيلت انى سفرت اسرائيل وعمال ابعت اخبار من هناك واقولهم اسرائيل بتخطط لتدمير الزراعة المصرية والاقى فى الاخر ان اغلب مستشارين وزارة الزراعة من هناك !!! اقولهم اسرائيل عايزة تنهى على مخزون الطاقة اللى عندنا والاقى فى الاخر ان مصر بتصدرلهم الغاز بأرخص سعر فى العالم !!! اقولهم اسرائيل عايزة تبعت رساله لأيران انها ممكن تضربها فى اى وقت وان العرب كلهم معاها الاقى فى الاخر مصر بتسمح بعبور غواصتهم النووية من قناة السويس !!! بس بالرغم من كل ده قولت لنفسى يا واد الكلام ده كبير عليك واكيد القياده السياسية الحكيمة بتاعتنا عارفة مصلحة البلد اكتر منك !!!!! المهم حطيت نفسى مكان رأفت الهجان وقولت انا هسأل السيد نديم اخبار مصر ايه من يوم ما سبتها , لقيته هيقولى متخفش على مصر يا محمد , احنا بنبيع القطاع العام , والفساد بقى للركب , والشعب بيشحت ومش لاقى ياكل , ومصر بتتأخر يوم بعد يوم , وجمال هيمسك بعد ابوه !!!!! ولما لقيت الرد فى الاخر هيبقى كده , قولتلهم انا اسف مش هقدر اسافر وانا ممكن اخدم البلد من موقعى هنا على القهوة اكتر بكتير من موقعى هناك , وحتى لو قالولى مصر دى امك , هقولهم سامحونى انا ابن عاق !!!!! شالووووووووم قصدى سلالالالالالالالالالالالام

هناك ١٨ تعليقًا:

موناليزا يقول...

عايز الوضع يفضل من 30 سنة زى ماهو!!
انت مش عارف ان الدنيا بتتغير ولا ايه:)

Empress appy يقول...

طيب وليه متحاولش تصلح وضع منيل
بس تصدق فعلا انك على القهوه انفع لان هتطلب شاى وشيشه وبتاع وتنشط البيع والشراء وهتفيد بتاع الشاى والعامل اللى فى القهوه وكل اللى فى المكان
انما اسرائيل انت صح فى النهايه هما هيعملوا كتير عاوزنا نرجع زى زمان قول للعمده يسيب العزبه
صباحه فل يا حدوته

سندس وأمل يقول...

ههههههههه

كن انت التغيير الذى تريد ان تراه فى

هذا العالم....

وقضى ربك الا تعبد الا اياه وبالوالدين

احسانا:):)

وعليكم الشلووووووووووووووووم:)

امل

لبنــــــــــى يقول...

الشالوم علينا غير اللي على العالم
لا خلينا في القهاوي احسن
الزمن غير الزمن لو رافت عايش لهلا كان انتحر لانو قضى عمرو على الفاضي و كلو بالنازل
فكرك لو شاف فتح و حماس كان شو عمل
ان كان رافت او ناجي العلي او غسان كنفاني و غيرهم الاف
يا ريت الدنيا وقفت على زمن رافت و ما تقدمنا ابدا

Dr. Ibrahim يقول...

كله عند العرب صابون يا بيه

الموساد شايف شغله كويس

لو مصر كلها راحت تتجسس فى إسرائيل !!!


تحياتى

محمد فوزي يقول...

لا يا حامد يا هجان
ماهي هي دي الخدعه
احنا قدرنا نوصل للعالم كله ولإسرائيل وليك انت شخصياً ياللي قاعد على القهوه والأخبار كلها بتمر عليك اننا تعبانين وصدمانين لا بننتج ولا بنصنع
والعالم كله شربها
لكن الحقيقه مش كده
مصر بخير يا سيد حامد

لا تنسى التخلص من هذه الرساله بعد الإنتهاء من قرائتها

نديم قلب الأسد

اقصوصه يقول...

خيالك واسع :)

engr. amr يقول...

مش عارف حتفتكرني ولا لأ انا حكمدارك السابق ايام خدمة الوطن؟!!!
أحب اقولك ان زي ما في رأفت الهجان في برضه الجنرال عزام وزيه كتيييييييييييير واكبر مأساه انك تحس انك انسان لما تخرج من بلدك ساعتها مش حتبقى عارف ترجع وتحاول تساعد في تطوير البلد ولا تقول انك مش حتصلح الكون وحدك وتفضل عايش حياة افضل بكتيييير من اللي كنت عايشها في بلدك

rovy يقول...

اه يا بلدى ..
ياااه يا حدوته ..
كلامك موجع جداا برغم السخريه اللى فيه لكن بيوجع قوى ..
بجد ربنا يرحمنا ..

تحياااتى

walaa tulip rose يقول...

انا جييييييييييييت
بجد بجد بوست هاااااااااااايل
انما انا مش معاك انك مش تروح اسرائيل علي الاقل هناك ممكن تلاقي فرصة تغير اي شيء ولو بسييييييييييييييييييط انما هنا احنا بنارب طواين الهوا ومش قادرين نغير اي شيء حتى جوا بيوتنا والله
انا باعتذر عن الغياب اللي خلاني مش تابعت كل مواضيعك اللي فاتت انما انا وراها والزمن طويل

ونصيحة اذا عرضوا عليك تسافر فكر في الموضوع تاني يمكن نغير شيء
ربنا سترها عليكي يا مصر
تحياتي

كريم بهي يقول...

انت ولد حقيقى بجد
عجبنى قدرتك على التقاط الفكرة وتحويرها حسب دماغك
تسلم
وماتخفش على مصر
كلها رجالة زيك


كريم بهي

آه من قلبي يقول...

ههههههههههههه
بجد حلو اوي
وبوست فكرته جديدة
وانت افكارك غريبة
بس مدونة ظريفة في الآخر
اتمنى تيجي تشرفني في مدونتي

شوية قهوة يقول...

الموضوع جميل جدا
ومدونتك حلوة
ده اول زيارة لمدونتك وفعلا عجبتني مستنية زيارتك ويارب المدونة تعجبك

شهرزاد يقول...

مقال رائع
أظن أنك صحفي أو ينفع تكون صحفي متميز فلكل مقالاتك طابع مميز

كل التحية

سمكه واحده يقول...

كل سنه وانت طيب
رمضان كريم

غير معرف يقول...

http://noureldens.maktoobblog.com/

ريمان يقول...

ههههههههههههههههههههههههه



حلوه ابن عاق دى



تحياتى

اسلوبك جميل فى عرض الموضوع

أحمد عاطف يقول...

حتى لو قالولي مصر دي امك

هاقولهم امي دي بالذات تغور ولا اني اخدمها بعد اللي بشوفه منها

تحياتي ليك