الأحد، ٢٣ أغسطس ٢٠٠٩

وقفة مع النفس

كل سنه وانتم طيبين , ورمضان كريم علينا وعلى الامه الاسلامية , الواحد مننا محتاج فى الايام دى لحاجات كتير , اعتقد ان اهمها الوقفة مع النفس , يعنى رمضان فرصة من ربنا لينا عشان كل واحد يقف مع نفسه , ويحاول يقيم حياته ويشوف هو كان ماشى صح ولا غلط , لان الواحد لو ركز شوية هيكتشف انه عايش وبيعمل حاجات كتير هو مش واخد باله منها , وده بسبب سرعة الحياه وانشغال معظمنا بالمعيشة اليومية , لكن رمضان هو وقت التأمل فى الكون والهدوء والطمأنينه الداخليه , استغل الفرصة واوعى تضيعها فى المسلسلات والنوم والاكل !!!! اقف مع نفسك وشوف لو ظلمت حد او دايقت حد او زعلت حد وكنت شايف انك مش غلطان , فكر فى الموضوع من زاويه تانية وحط نفسك مكانه وشوف كنت هتعمل ايه , امسك التليفون واسأل على قرايبك اللى بقالك زمان ناسى تكلمهم , بص على حياتك من فوق بنظره عامة وحاول تتخيل الناس اللى حواليك شايفينك ازاى , هتعرف كل واحد بيعاملك كده ليه , صلح علاقتك بربنا وقرب على قد ما تقدر وهو هيساعدك , اقرأ القرأن كأنك بتقرأه لاول مره وحاول تكتشف معانيه , ولو فى ايه لقيت نفسك عايز تفهمها كويس , روح لكتاب تفسير , ولو مش جمبك كتاب هات تفسير الايه من على النت , ومتكسلش وتحس ان الموضوع تقيل عليك , لو فى ايه واحده كنت بتقراها طول عمرك من غير ما تقف عندها , ودلوقتى قريتها بتمعن وبتركيز ودورت على تفسيرها , الايه دى ممكن تغير حياتك كلها !!!! مش هلاقى احسن من كلام ربنا انهى بيه كلامى واشوفكم بعد رمضان إنشاء الله ... ولو يؤاخذ الله الناس بما كسبوا ما ترك على ظهرها من دابة ولكن يؤخرهم إلى أجل مسمى فإذا جاء أجلهم فإن الله كان بعباده بصيرا ... صدق الله العظيم

هناك ٨ تعليقات:

dr.Roufy يقول...

كل سنة وانت طيب..وبقرب و رضا يارب

:)

ماء تشرين يقول...

كل عام وأنتم الى الله أقرب

Kiara يقول...

كل سنة وانت طيب ورمضان فعلا فيه راحه وحاله غريبه بتديك الفرصه لمراجعه كل مافات

وتصلح دا سواء اخطاء في حق ناس او صله رحم او اي شي

رندا يقول...

كل سنة وانت طيب وجميل وسعيد
رمضان كريم عليك وعلى الاسرة الكريمة
اززززززززيك ياحدوتة عامل اية يارب تكون بالف مليون خير وسعادهـ
:))

kochia يقول...

سبحان الله فعلا بتنسي كل الحاجات الوحشة وتحس انك عاوز تبدأ من جديد

ربنا يعيننا علي انفسنا

اقصوصه يقول...

رمضان كريم :)

غير معرف يقول...

السلام عليكم

أنا مروة أشرف من قناة أنا .. انا بصور تقارير مع المدونين اللي كاتبين حاجات عن رمضان وأنا ان شاء الله جاية أسكندرية بكرة علشان اصور مع مدونين وجمعيات خيرية ولاقيت مدونتك فيها بوست جميل عن رمضان

فياريت لو وقت حضرتك يسمح نتقابل بكرة علشان التصوير، تبعت ليه على الميل بتاعي رقم التليفون وأنا حتفق معاك على كل التفاصيل

شكرا جدا

الإيميل
rama_mass@yahoo.com
ويارب تشوف تعليقي قبل بكرة

romansy يقول...

اجمل التهاني وارق الاماني بحلول عيد الفطر المبارك
اعاده الله عليكم وعلينا بالخير واليمن والبركات
راجين من الله ان يديم علينا الاعياد والايام السعيدة
وان تستمر اعيادنا لابد

كل عام وانتم بخير