السبت، ٧ نوفمبر ٢٠٠٩

فـلـسـفــة الـحـجـــاب

من فترة كبيرة وانا شايف ان موضوع الحجاب واخد اكبر من حجمه , وإن المعارضين والمؤيدين للحجاب مكبرين الموضوع , ومن وقت ازمة النقاب الاخيرة والمفتعلة من شيخ الازهر حفظه الله !!! وانا بفكر فى الموضوع ده بشكل مستمر , واكتشفت انى كنت غلطان فى التقليل من مسألة الحجاب وان الموضوع اكبر من كده , وحبيت اعرض الحجاب من زاوية تانية غير اللى بيتقال عنه , وانا دلوقتى مش هتكلم من منطلق دينى , انا هتكلم بمنطق عقلى وكأنى بفكر بصوت عالى , الاول لازم نعرف ان الموضوع اصلا يتعلق بالمرأة , يعنى الغرض الاساسى من الحجاب هو اخفاء جسد المرأة , طب نخفى جسمها ليه ؟ هل لأن المرأة عورة !!! ودى الكلمة اللى بيزعلوا منها بتوع حقوق المراة , ببساطة الست ربنا خلقها بجسم اجمل بكتير من الرجل , ومجرد رؤية الرجل لجسد امرأة ده فى حد ذاته متعه , وده مش عندنا بس كمجتمع شرقى , عشان انا بسمع كلام كتير بيقول ان الرجاله الشرقيين عندهم كبت وتفكيرهم منحصر فى الجنس , ودليلى ان الكلام ده مش مظبوط , ان فى اوروبا والغرب عموما وبالرغم من التمتع الكامل بالحرية فى العلاقات وغيره , إلا ان فى اماكن مخصوصه لرقص التعرى !!! وده بنشوفه فى السينيما بتاعتهم , وده مكان الرجاله بتروحه وتدفع فلوس لمجرد رؤية بنات بترقص تقريبا عرايا , وده بيأكد ان الموضوع ملوش دعوة بطبيعة المجتمع او طريقة تفكيره , لكن بيتعلق بالرجل والمرأة والشهوة التى زرعها الخالق فى الانسان , طيب دلوقتى احنا عرفنا ان الرجل بيحس بمتعه بمجرد انه يشوف جسم الست , وطبعا الست عارفة ده كويس !!! هنا بقى لازم نقف ونتكلم بصراحة حتى مع نفسنا على الاقل , ياترى ايه اللى يخلى بنت او ست فى اى سن تلبس قصير او مكشوف او ضيق ؟ طبعا الوحشة مش عايزة تبين حاجة , لكن الست اللى شايفة انها حلوة عايزة تبين ده , وممكن نلاقى كذا اجابة عن السؤال ده , مثلا ممكن تكون البنت او الست ترغب فى الحصول على رجل , سواء بعلاقة شرعية كالزواج او علاقة غير شرعية , وممكن تكون البنت بتحس بمتعه او بسعاده لما بتشوف نظرات الاعجاب من الرجال المحيطين بيها , وممكن تكون البنت عايزة تكون احلى واحدة بالمقارنة بالبنات اللى حواليها , بعد ما عرفنا الاسباب اللى بتخلى الست تبين جسمها , لازم نقول ان فى ستات تانية بترفض الكلام ده وبتلبس هدوم بتغطى اغلب جسمها سواء باقتناع منها او كعاده , طيب ياترى رد فعل الرجل لده ايه ؟ الرجاله برضو انواع , يعنى فى رجل بمجرد ما يشوف الست بتبين جسمها فده بالنسبه ليه الضوء الاخضر , وده ممكن يوصله لعلاقة مباشرة معها بالاسلوب اللى هى عايزاه , وساعات غصب عنها زى حالات الاغتصاب !!! وفى رجل بيكتفى بالتعليق سواء بتحرش او بمعاكسة شفهية , وفى رجل تكفيه النظرة دون حتى التعليق , وفى رجل اخر بيمنع نفسه من النظر !!! ولو عملنا مقارنة بين مجتمع المرأة فيه جسمها مكشوف , تحت اى مسمى حرية او مساواة او اى حاجة , وبين مجتمع تغطى فية المرأة جسمها , ياترى المقارنة هتبقى فى صالح مين , طبعا المجتمع الغربى دلوقتى اغنى واقوى واكثر تقدم مننا فى شتى المجالات , لكن مشاكله الاجتماعية كبيرة جدا لدرجة تهدد ببقاءه , واللى بيقرأ فى التاريخ يعرف ان الحضارات العريقة على مر الزمن كانت فيها الست مصانه وعفيفة , وده هيوصلنا فى الاخر لأكتشاف عظمة الاسلام لما نشوف النظام اللى موجود فى تعاليمه واللى بأتباعها تنصلح احوال البشر , والمشكلة عندنا دلوقتى ان بالرغم من انتشار الحجاب إلا ان الاخلاق من سىء الى اسوء , وده بسبب الجهل اللى عندنا , يعنى الحجاب اللى منتشر حولينا فى كل حته ملوش لازمة لانه تحول الى زى طبيعى او عقد اجتماعى كما يطلق عليه علماء الاجتماع , يعنى ببساطة البنت بقى طبيعى انها تلبس ايشارب يغطى شعرها عشان تعرف تعيش بطريقة احسن وسط المجتمع وبدون انتقادات من احد , لكن ده ميمنعش انها تلبس ضيق شوية او تمشى بطريقة ملفتة المهم انها تظهر نفسها جميلة برضو وهى محجبة , وهنا بقى المشكلة , لانها كده مش بتفرق عن البنت الغير محجبة وده بيفقد الحجاب مفعوله , لان من اهم شروط الحجاب ان لا يكون زينه فى نفسه , ودى جملة كانت محيرانى ومكنتش عارف ايه المغزى منها , لكن الفكرة ان الموضوع كله هنا بيبقى فى نية البنت نفسها , يعنى لازم تكون وهى لابسه الحجاب عارفه ان الغرض منه انها لا تلفت الانتباه , ولا انها تبان الاجمل ولا الاحلى !!! وان لبسها ده بيدى رساله واضحة وصريحة لأى رجل انها مش مستنية منه نظرة اعجاب ولا معاكسة , وصدقونى مهما كانت اخلاق الراجل سيئة ومتدنية إلا انه بيفهم الرساله دى كويس جدا

هناك ١٥ تعليقًا:

☼♫♪ عمــاد الدين يــوسف ☼♫♪ يقول...

صديقي العزيز محمد
بحييك على حواديتك المتفلتره تمام والمهمه جدا ، فيك موهبة الصحفي اللي بيتقصى مواضيع في صميم الواقع بمشكلاته بسلطاته ببابا وماما (:

بالنسبه لبوست النهارده .
موضوع الحجاب ببساطه ، لزمه دينيه تشدديه من وجهة نظر الغرب وتلاميذه ابتداء ً بالمطالبين بمساواة النسوان ومروراً باليبراليين اللي عايشين بالشوكه والسكينه واخيرا النظام الحاكم فحته الله ، اللي بيتشدق بوسطية الاسلام في حين لا يعرف عن الاسلام سوى انه شئ بالوراثه لايد له فيه ..

والنظره التانيه للحجاب من وجهة نظر المسلم اللي بالضرورة متحضر ، انه قبل ما يكون طاعة لله هو سترة للأنثى وعفة لها بكل معنى الكلمه ... وطبعا مش قصدي ابدا الحجاب المستورد بتاع البنات المايصه بتوع اليومين دول وتيمو وحماقي وياي أمووور آخر حاجه _!_
لا طبعا قصدي الحجاب اللي ملبوس لان في قناعه بيه وبغرضه وفضيلته وبعد كده مرضاة الله ...

هتقولي لما الامور واضحه بالشكل ده طيب ليه اللخبطه اللي الناس فيها ديه ؟؟؟
هقولك ببساطه النظام عايز حاجه يلهي فيها الغلابه اللي مش لاقيين العيش

وسلملي على شيخ قصر العروبه

Dr. Ibrahim يقول...

يسلم فمك ...

romansy يقول...

كل عام والمسلمين فى مصر والعالم الاسلامى بكل خير ومحبة وسلام لكل الانام

عيد اضحى سعيد

اعاده الله على الجميع بالامن والاستقرار

والسرور والتسامح

أحمد عاطف يقول...

انا عندي ليك كلمتين

انت ابدعت

بجد والله العظيم بقالي زمن مقرتش حد بيكتب باسلوب منطقي جدا زيك كده

على راي اللي قبلي

يسلم فمك

كل سنة وانت طيب

حسن ارابيسك يقول...

كل عام وانت بخير
وعيد سعيد على الكل
الحقيقة جميلة المدونة من خلال تصفحي لتدويناتك القيمة
ولفت نظري توينة رائعة أعجبتني بشدة وهي
حامد الهجان
التدوينة مكتوبة بأسلوب ساخر وجديد وعالي جداً
تحياتي
حسن أرابيسك

الملكة هند يقول...

كل سنة وانتى طيبة

ادام الله عليكى العافية والصحة

تحياتى

علي حيدر النويسندي يقول...

فعلا يسلم فمك
وكل سنه وانت طيب
واصل هذا الطرح الجميل

حمامة سلام يقول...

رئيك مهم جدا نرجو التواصل اكتب تعليق على الموضوع قول رئيك بصراحة
http://ana-wa-nafsy.blogspot.com

محمد فوزي يقول...

محمد باشا

موضوعك جميل لكن أنا جاي بالأساس أشكرك على تهنئتك بالعيد كل سنه وانت طيب ربنا يعيده عليك بكل خير

وأعذرني على عدم الرد في حينه لأني مكنتش بدخل المدونه

شكرا يا أبو حميد

عابرة السبيل يقول...

انا كنت عايزة اقول كده برضه

بس ربنا هو الهادى

والحمد لله على نعمة العقل والتفكر

المتبهدلون في الأرض يقول...

جاامد

سمكه واحده يقول...

جايه اقول كل سنه وانت بخير
ويارب السنه دي تكون خير عليك وعلينا كلنا
عارفه اني مقصره اوي
بس ياسيدي كل سنه وانت طيب
لسه مقرتش علي فكره بس حبيت اسلم وليا عوده تاني بس اجري قبل ما حد يهبدني في بحاجه وريا حجات وارجع تاني
سلاااااااااام
علي راي حدوته
(:

المجاهد الصغير يقول...

السلام عليكم
جزاكم الله خيرا
وفقكم الله
ويبقى التواصل

غير معرف يقول...

انا مش عارفه اقول ايه بصراحه

بس

بس

الله الله الله الله الله الله


بوست رااااااائع

مجداوية يقول...

السلام عليكم

هي الناس الطيبة بتختفي ليه ؟

لعل المانع خيرا
نسأل الله لكم السلامة والتوفيق