ما علينا... و انا مالى ... فكك ... كبر دى كلمات ليها معنى واحد :
انا ماليش دعوة , تولع الدنيا كلها , حتى لو الموضوع يخصنا , احنا برضه ساعتها بنقول ما علينا .
تفتكرو ده ليه ؟ هل علشان احنا بنهرب من المشاكل ؟ ولا علشان احنا مش قد المشاكل ؟ ولا علشان احنا بقينا مع الوقت سلبيين ؟
الثلاثاء، ١٧ يوليو ٢٠٠٧
مــا عليــنــا
الاشتراك في:
تعليقات الرسالة (Atom)
هناك ١٩ تعليقًا:
ممكن الواحد بيقول ماعلينا علشان حاسس انه لو بدا يحل المشكلة حيقع في مشكلة تانية . أو يمكن ناس كتيير فعلا بقت مش قد المشاكل. أي انسان سلبي ميعتبرش ثابت في مكانه الانسان السلبي انسان بيرجع لورا في وقت كل اللي حواليه بيتقدموا.
الانسان السلبي ده ممكن يضيع حاجات بيحبها وناس بيحبهم لمجرد انه مأخدش موقف او محاولش يحل مشكلة.
ده
يأس
من المحاوله او من نتيجه المحاوله بمعنى اصح
بس انا مع نفسي
لما بيأس وبقول مفيش فايده
بقول على الاقل في فايده فيا
وعلشان كده بحاول دايما ابدأ بنفسي
- اول زياره للمدونه
والسبب الاول
اسم الاسكندريه الى بعشقهاا
ومعتقدش حتكون اخر زياره
السلبيه بقيت خلاص شبه طبع في كل واحد ومافيش حد بقي عنده صبر لحل المشاكل عشان كله محصل بعضه حل زي ماحلش
الحال هو الحال والمشاكل بقيت زي الهوا اللي بنتنفسه الشباب زهق نعمل ايه ولا ايه نخرج من مشكله نلاقي مصيبه خلاص بقينا سالبيين واتعودنا علي كده مابقنياش قادرين نحل حتي لو قادرين ولقيين الحل بنخاف من اللي بعد كده كل واحد بيقول يلا نفسي خلاص الحياه بقت ممله من كتر الهم والمشاكل والنهارده زي بكره مافيش تغيير
ياجماعه بجد عن تجربه انا ماكنتش سالبيه بس للاسف اكتسبتها نتيجه اني اتدخلت في موضوع واتفهمت غلط ومن ساعتها بقيت بقول ماعلينا وبكبر دماغي وماليش دعوه وكده اعتبروني الناس اني بقيت سالبيه بس بجد غصب عني اللي انا بقيت فيه مش مني من الناس اللي بتفهمني غلط
لازم ياجماعه نعترف اننا بقينا سالبين وده طبعا مودينا في دهيه وكل اللي بنعمله اننا نقول دع الخلق للخالق وكل واحد يقولك اشمعني انا اللي احل ماغيري يحل ولو مشكله تخصه يقولك عندي اللي يحلها وبقينا شاطريين اوي في الهروب من المشاكل وطبعا اوقات بضيع مننا احلي حاجات
السلبيه بقيت خلاص شبه طبع في كل واحد ومافيش حد بقي عنده صبر لحل المشاكل عشان كله محصل بعضه حل زي ماحلش
كان فيه زمان مثل بيقول من خاف سلم بس أنا شايفه ان الصح بتاعه من خاف ندم لان الخوف والضعف فى مواجهه المشاكل بيسبب السلبيه ولامبالاة والضعف لالالا لازم نواجهه المشاكل بكل قوة وحزم لازم نقول للغلط انت غلط فى وشه ونقف قدامه لان لواحنا اصبحنا سلبين فأولادنا بردك هيبقوا سلبين زينا يعني احنا هنطلع جيل كل سلبي كله يقول وانا مالي ما علينا فكك كبر دماغك مصطلحات موجوده فى حياتنا وملهاش معني غير أن احنا مش قدرين نواجه وبندفن راسنا فى الرمل زى النعام من رأى منكم منكراً فليغيرة بس لازم نبدأ بنفسنا نغير نفسنا من جوانا ونبدا بمواجهة مشاكلنا ونشرك نفسنا فى الاوضاع إلى حوالينا فى الدنيا إلى أحنا عيشنها يمكن نحس أن احنا قدرنا نعمل حاجة ولا ايه
ياجماعه مشكلت ماعلينا مش فى الشخص اللى بيقولها المشكله فى المجتمع اللى حولينا يعنى الواحد مننا لو حس انه لو اخد موقف ده حيغير حاجه فى الموضوع او المشكله حيعمل حاجه لكن المشكله انه الواحد مننا عارف ان اللى حيعمله مش حيفيد بحاجه بالعكس ده ممكن يضره علشان كده كل الناس بتقول "الباب اللى يجيلك منه الريح سده واستريح"
مفيش حاجة اسمها الباب إلى يجي لك منه الريح سده واستريح ده منطق الضعيف الذى لا يقوى على مواجهة المشاكل المحيطه به ومش عاوز يبقي له دور فى الحياه وبيستخبا ورا الحيط ويقول وانا مالي طب وبعدين فى حياتك بعد كده فى بيتك ومع ولادك لو واجهتكم مشكله هتقول بردك وأنا مالي وهتعلمهم السلبيه ايه لازم نفوق لازم نقف فى وش الظلم والاضطهاد والمحسوبيه والكذب والغش ونقول لالالا علشان نحس بقيمتنا فى الحياه احنا ربنا خلقنا لينا عقل نفكر فيه ونتخذ بيه قرارات لو كان عاوز ان احنا منفكرش كان خلقنا ناس بتفكر وناس لا ناس تقول اعمل كده واحنا نقول حاضر احنا ربنا خلقنا سواسية زى بعض حتى مع فروق المستويات احنا زى بعض يبقي لازم يكون لنارأى ولا ايه .............؟
عندك حق يا رحاب ,عارقيت المشكلة ان الريح مش جيالك من باب واحدالرياح محصراك من كل ناحية ما ينفعش نفضل مستسلمين ورا باب مسدود.
الناس 3 انواع:
أنسان بتكسره الظروف
و انسان بتقسيه الظروف
و انسان هو اللي بيغير الظروف
و كل واحد المفروض يعرف هو اي نوع من دول و هل هو مبسوط من نفسه ولا لأ.
ليه كل الناس بتعتبر ماعلينا سلبيه؟
لا ديه مش سلبيه فى كل الاحوال....
ماهو الواحد مش ينفع كل مره ياخد موقف ويقف فى وش الريح وهو عارف انه حينكسر ومش حييجى بفايده.
لازم الواحد يحسبها كويس وهو بياخد القرار هى مش شجاعه وخلاص زمن الابطاااال خلاص خلص من زمان
احنا مش بنتكلم على ابطال احنا بنتكلم على بني أّدمين عادييين .
المواقف هي اللي بتعمل البني ادم , مش معنا كده ان الانسان يتهور في قراراته,
لأ طبعا لازم يفكر كويس علشان بعد كده ميندمش.
و على فكرة حتلاقي ان فيه ناس يهمهم قوي تدخلك في أي موقف يخصهم بصرف النظراذا كان تدخلك ده حيكون له نتيجة ولا لأ, بس حيحسوا ان انت وقفت جنبهم في يوم من الايام.
مش كلنا كدة . فمتخديش في باليك
ولو كلنا كدة فدة العادي . وعديها
و لو نصنا كدة و نصنا كدة فدة وجع دماغ .و احسنلك تكبري
سوري يا عمورا بنسبا للموضوع ده انا هقولك كبر
اكيد كلنا سمعنا او شفنا ان فى ناس مش بتعرف تفكر او عن ناس مش بتحاول تفكر او ناس بتفكر على الأد وخلاص يعنى عند الشديد الأوى.بس الغريب ان يكون فى حد مشكلته فى الحياه انه بيشغل مخه ويفكر كتير.احب اعرفكو بنفسى:انا اكتر واحدة بتفكر فى النيا دى كلها,حتى وانا نايمة وعمرى ما عرفت انى اطنش او اكبر دماغى بس الصراحة بحس ان فى اوقات الواحد لازم يكبر فيها دماغه لأنها مش بتبقى مستاهله ان الواحد يشغل باله بيها والحياه فيها اولويات مينفعش ان الواحد يكبر دماغه منها
السلام عليكم
هما المصريين كده دايما السلبيه هى شعارنا فى الحياه ولو سيبناها يوم نموت
لازم نكبر دماغنا لازم نفكنا من الدنيا كلها لازم نقول مالناش دعوه
عشان ننسى واقعنا او انا باعتبرها مقاومه اللامبالاه
احنا البلد الوحيد اللى لما حد يستعمرنا لازم يقعد عندنا اكتر من سبعين سنه
لحد ما المستعمريين نفسهم يزهقوا ويسيبوا البلد ويمشوا
وخلال السبعين سنه ديه كنتى تلاقى شعب مصر كله مطفى دماغه
انا شايفة ان ده اسلوب تربية اتربينا عليه كلنا من وحنا صغيرين ملكش دعوة بحد خليك فى حالك امشى جنب الحيط احنا اتربينا على السلبية حتى الامثال المصرية بتقول كدة اصبر على جارك السو يا يرحل يا يجيلو مصيبة بس انت طبعا مش حيكونلك اى دور هو اللى يرحل من عنده او تجيلو مصيبة من عند ربنا يعنى اتربنا على الخضوع للامر الواقع مهما كان صعب بس طبعا بدون اى محاولة لتغييروه
may be because they afraid to hold the responsibility..they may be have alot of problems so they do not want more....
إرسال تعليق