الجمعة، ١٢ يونيو ٢٠٠٩

انا موظف إذا فانا جثة

بقالى فترة بتكلم مع ناس كتير فى موضوع الشغل والوظايف , ولفت نظرى ان فى شباب كتير لسه دماغهم متعلقة فى الشغل الحكومى , ولسه عايشين فى المثل بتاع إن فاتك الميرى اتمرمغ فى ترابه , وبغض النظر عن المرتبات التعبانة بتاعت الحكومة إلا ان حلم الوظيفة الحكومية الثابتة لا يزال يشغل الكثيرين , مع ان الحكومة خلاص بطلت تعين حد تقريبا إلا عدد قليل جدا بوسايط كبيرة , وده هيفتح قدامنا كذا موضوع المفروض نفكر فيه ونحلله كويس , اولا هل طريقة التفكير اللى احنا وصلنلها دى غلطة الحكومة ولا احنا اتربينا كده ولا ايه ؟ وبعدين مهما كانت غلطة مين فأحنا ايه دورنا بالظبط , يعنى مش المفروض الواحد يفكر ويعرف ايه الصح وايه الغلط !!!! ثانيا حتى الشباب اللى مش بيحلم بالشغل الحكومى وبيحاول فى القطاع الخاص , تخيلوا ان كتير منهم مش بيفكر يا ترى الجهة اللى بيشتغل فيها بتعمل ايه , بمعنى ان معظمنا بيهتم هو شغال ايه داخل الشركة وبياخد كام منها , لكن هل حد بيسأل هى الشركة دى اساسا بتعمل ايه ؟ وايه نشاطها ؟ وهل نشطها ده مفيد ولا لأ ؟ والاسئلة دى كلها هتوصلنا لنقطة تانيه , وهى اننا لما نسأل عن نشاط الشركة ومدى اهميته هنسأل عن دور الشركة فى انتاجية البلد كلها ؟ بمعنى ان الشركة او جهة العمل اللى انا شغال فيها هل بتفيد البلد ولا لأ ؟ يعنى بننتج حاجة ولا بنصنع حاجة ولا بنعمل ايه بالظبط ؟ انا عارف ان يمكن كتير يقوله ان الموضوع بايخ او محدش بيفكر كده !!!! بس اللى خلانى اتكلم فى الموضوع ده انى لاحظت ان ناس كتير جدا شغاله فى هيئات ومصالح وشركات كبيرة , لكن لو الواحد فكر شوية وبص على الشركات دى من فوق وسأل نفسه هى بتشتغل ايه اصلا هيلاقى الاجابه انها مبتعملش حاجة مفيده !!! وانا قصدى بالحاجة المفيدة الانتاج , ودى الكلمة اللى احنا تقريبا نسيناها من زمان . من مشكلتنا الكبيرة فى مصر ان شغلتنا الاساسية اننا بنشتغل بعض او بنشتغل على بعض !!!! يعنى تخيلوا معايا اننا عايشين فى مصر ومبنى حولينا سور ومنعزلين عن البلاد اللى جمبنا , هل هنعرف نعيش يعنى الاكل اللى بنزرعه هيكفينا واللبس اللى بنصنعه هيكفينا ولا هيبقى وضعنا ايه ؟ لان ربنا سبحانه وتعالى خلقنا ونزلنا فى الارض عشان نعمرها , لكن احنا بقينا كلنا موظفين فى ايه مش مهم عند مين مش مهم بنعمل ايه مش مهم !!!! المهم اننا موظفين بنروح الشغل الصبح وبنرجع بعد الظهر وبنقبض اخر الشهر , كلنا بقينا مندوبين مبيعات واداريين ومستخلصين وفهلويه !!! وحتى فى المصانع او الشركات المنتجة هتلاقى ان الاداريين او الموظفين اللى المفروض بيخدموا على الناس اللى بتنتج اكتر من الناس دى اصلا !!! وده من الاسباب الاساسية اللى وصلتنا للحاله السوده اللى البلد فيها , انا عايز كل واحد منكم يسأل نفسه انا شغال ايه والمكان اللى شغال فيه بيعمل ايه لاننا لو مش عاجبنا دور الحكومة وبنقول السياسة بتاعتها هى اللى غلط يبقى لازم على الاقل نعرف سياستنا احنا وعيشتنا صح ولا غلط, معلش الموضوع يمكن غريب او مش مهم بس هو شاغلنى من فترة وقولت اشغلكم معايا

هناك ٢٦ تعليقًا:

ماء تشرين يقول...

انا راى انو الشغل الحكومى بقه زاى الخاص بالعكس ياعنى اعتقد انو في الشغل الخاص ممكن توصل اسرع عشان مفيش كلكيع الشغل الحكومى وعموما في الاخر مبقش في حكومى وخاص لانه الحكومى دلوقتى بيتخصخص زاى الشركات الكتير البتتخصخص دلوقتى وكانت حكوميه زماااااااان وطبعا اتجاه الرأسمالى لدوله دلوقتى هيخصخص كل حاجه

اما بنسبه للانتاج فمالو الصينى
لو لم اكن مصريا لو دتت انا اكون صينى او ايرانى او اى حاجه بس مش مصري اكيد

عموما موضوع جميل تقبل مرورى

غير معرف يقول...

قراته

واعجبنى

طريقة التفكير

والرؤية

شيماء سمير

موناليزا يقول...

التفكير السائد دلؤتى انهم عايزين اى حاجة بتجيب فلوس وخلاص

لبنــــــــــى يقول...

اظن انو وصلنا لمرحلة اي وظيفة و خلاص و بعدين بنحلم
الوضع في الوطن العربي بشبه بعضوا
و مع الوضع الاقتصادي السيئ الان
اظن انو حلم العاطل عن العمل هو اي عمل
و حلم الموظف ان يبقى كما هو

سمكه واحده يقول...

الله ينور عليك
طريقه تفكيرك بتعجبني
بجد الواحد مجاش علي باله اللي انت بتكلم عنه ده يدل علي انك دماغك عالي
والله شوف
هو مساله الشغل الحكومي مهم ليه؟
يمكن موروث توارثناه او يقلك نضمن معرفش ايه حاجه للزمن متثبت كلام من ده
حتي تلاحظ لو اي شاب معرفش يشتغل حكومي بيفكر في السفر بره وميفكرش يرجع يقلك هشتغل ايه مهو لو كان في شغل ثابت كنت نزلت كمان لو جه لاي بنت شاب مش بيشتغل حكومي تبقي فيه وقفه شويه وقلق الا اذا كان هيسافر او مسافر بره ده الي سائد في بلدنا

والله عنك حق ان الواحد يفكر في اللي بتقدمه الشركات واللي بيعود علينا منه بنفع وعلي بلدنا
تحياتي

الفراشة الصغيرة يقول...

انا الحمد لله بشتغل مدرس قد الدنيا

اينعم طالع عينى بس عادى
اينعم بشتغل فى اخر الدنيا بس عادى
اينعم بقبض ملاليم بس عادى

كل حاجة بقت عادى فى حياتنا

Kiara يقول...

بصراحه موضوع مهم جدااااااااااااااااااااا


انا شيفه ان شغلي مهم ممكن موش انتاج لكن المكان ككل مسئول

عن توفير الدم للمرضي

مجداوية يقول...

السلام عليكم

الموضوع ده هااااااااااام جدا جدا

وقول جدا لحد السنة الجاية

وده اللي خلاني من سنتين أبدأ أغير الكارير بتاعي بس محتاج سنتين كمان أنا التحقت بمعهد الدعوة لما لقيت شغلتي كرئيسة قسم التربية الفنية لا تفيد أحد هو طبعا بأستفيد من الراتب لكن احساسي بعد فايدتها في الحياة وخصوصا ان وزارة التربية والتعليم كرهت الأولاد في الرسم والجمال أصلا

فلقيت إن أفضل شىء أدرس حاجة تفيد الاتسان فايدة فعليه حتى لو احتفظت بوظيفتي يبقى لازم أفيد غيري باللي حاتعلمه

الفايدة المعنوية مطلوبة برضه وكتير من شبابنا بيشتغلوا في أماكن حرام أصلا يشتغلوا فيها مثل الأماكن اللي واخدة توكيلات أمريكية أو يهودية اللي المفروض نقاطعها ,, أو أماكن بيع الخمور أو الأماكن اللي بتقدم الرقص وغيرها وعلى فكرة ده قطاع كبير والناس فعلا مش بتفكر في مصدر الفلوس
ياريت تركز على الجانب ده في موضوعك لأنه هااااااااام جدا لحد السنة الجاية برضه

بس انت كده حتخلي الناس لو فكرت بجد 90 % منهم حيقعدوا في بيوتهم عشان مش بيفيدوا البلد بجد
:)

موضوع راااائع وهاااااام جدا جدا جدا ,,أيواااا (لحد السنة الجاية )

:)

rovy يقول...

بوست واقعى جداا و طريقة تفكير متميزه اخى الكريم ..
انا معاك فى كل اللى قلته .. ياريت بجد شبابنا يفهموا و يفكروا زيك كده

دمت بخير

تحياتى

Unknown يقول...

تدوينة رائعة وتساؤلات أروع أهنئك على الإختيار وأعتقد أننا سنظل نتمرغ فى تراب الميرى لأننا كشعب مصرى يشعرنا العمل الحكومى بالإستقرار أكثر من الخاص كما نعشق الروتين والعمل الحكومى هو قمة الروتين ....ووجهة نظر أخرى قد نتطرق لها وهو المعاش الذى يوفره العمل الحكومى يشعرنا أكثر بالدوام ما دام ورائنا سلطة الحكومة أم سلطة الأفراد فى العمل الخاص فمشكوك فيها من قبل كثير من الناس
وأخيرا قد يكون العمل الحكومى أكثر فائدة من العمل الخاص لمعظم فئات المجتمع وخير مثال عمل الطبيب فى مستشفيات الحكومة ومستشفاه الخاص إذا راع ضميره فليس كل الناس تستطيع دخول المستشفيات الإستثمارى بل إن كثير من بسطاء قومى يهبون الأماكن الكبيرة خوفا على جيوبهم وفى النهاية أكرر إعجابى بمقالكم

مصطفى

kochia يقول...

العنوان عجبني اوي
وحقيقي جدا
فانا جثة من جثث الحكومة

لكن
اعتقد ان كل واحد يقدر يعمل من نفسه مفيد الي حد ما
ولا ايه
واتفق معاك في طرحك للموضوع

تحياتي

Unknown يقول...

للاسف الناس مش بتحاول تشتغل فى الحكومة بشكل يليق بكونها فعلا لها شغل واخدينها على انها روتين وشغل فى الفاضى وتلاقية يخرج من الحكومة على شغل تانى
يبذل فيه كل جهده

حـــــدوتـــــة يقول...

ماء تشرين

بس لسة فى ناس كتير بتحلم بالشغل الحكومى
وفى موضوع الخصخصة مش ناقص غير يخصخصوا النيل والاهرامات عشان تبقى كملت

سلالالالالالالالالالالالالالالالالالالالالالالالام

حـــــدوتـــــة يقول...

شيماء سمير

شكرا على المتابعة

سلالالالالالالالالالالالالالالالالالالالام

حـــــدوتـــــة يقول...

موناليزا

انا معاكى بس احنا بقى دورنا ايه

سلالالالالالالالالالالالالالالالالالالالالالام

حـــــدوتـــــة يقول...

jafra

فعلا بقى كل واحد مشغول بحلمه الشخصى وبس
ومبقاش فى حلم قومى يجمع الناس حواليه

سلالالالالالالالالالالالالالالالالالالالالالام

حـــــدوتـــــة يقول...

سمكه واحده

والله دى شهادة هعلقها على باب المدونة
وعموما احنا نيجى جمبك فين

عندك حق ده موروث قديم
بس احنا لازم نغيره

سلالالالالالالالالالالالالالالالالالالالالالالالالالالام

حـــــدوتـــــة يقول...

الفراشة الصغيرة

اينعم انتى مبتفكريش تغيرى شغلك بس عادى

سلالالالالالالالالالالالالالالالالالالام

حـــــدوتـــــة يقول...

كيــــــــــــارا

وهو ده المطلوب
ان كل واحد يقف ويفكر هو شغال ايه

سلالالالالالالالالالالالالالالالالالالالالالالام

حـــــدوتـــــة يقول...

مجداوية

ده كتير اوى عليا يا استاذة
انتى مش عارفة انا بفرح قد ايه لما بشوف تعليقك على اى موضوع انا بكتبه
شوفى بقى لما تشكرى فيه كمان انا هحس بأيه

شكرا على متابعتك وتشجيعك المستمر
سلالالالالالالالالالالالالالالالالالالالالالالام

حـــــدوتـــــة يقول...

rovy

شكرا على رأيك وكلامك ومتابعتك

سلالالالالالالالالالالالالالالالالالالالالام

حـــــدوتـــــة يقول...

egyboy

منور المدونة فى اول زيارة
وشكرا على رأيك ومجاملتك
وارجو التواصل دائما

سلالالالالالالالالالالالالالالالالالالالالالالالام

حـــــدوتـــــة يقول...

kochia

حمد الله على السلامة
وشكرا على شجاعتك واعترافك

سلالالالالالالالالالالالالالالالالالالالالالام

حـــــدوتـــــة يقول...

نهر الحب

بس كده الغلط على الجانبين
الجهة الحكومية من المفترض انها تراقب وتتابع
والموظف المفروض يراعى ربنا فى الشغل بتاعه مهما كان

سلالالالالالالالالالالالالالالالالالالالالالالالالالالام

غير معرف يقول...

لقمة العيش صعبة جدا بمصر

واعتقد الناس بقت كل همها تقدر تشتغل باي حاجة وتجيب لقمة العيش يعني كفاية عليهم انه يشتغلوا بحاجة شريفة

هتقولنا حاجة منتجة ولا لأ ربنا يعين كل واحد على حاله

انا اعرف شاب مصري زي الفل بيشتغل بوظيفتين بيقضي يومه كل بالشغل مش بيشوف اهل بيته حتى لقمة العيش صعب ياخويا

ربنا يعينكم

بس طبعا انت كلام صح الصح بس مين هيسمع ولا مين هيهتم للامور دي

تحياتي

سيف يقول...

انت عارف ان الحكومه دلواتى بقت اكتر من الى انت تقول عليه ده........
يعنى الى انت الته ده ولا حاجه خالص يا بنى دول بيعزبو المدرسين عشان الكادر بتاعهم ده وفى الاخر.....ولا حاجه.....
مفيش احسن من الشغل الخاص....
ول اديقت اوى فى وشك........
تعالى انا وانت نشتغل حرميه .. ايه رايك ميه ميه...... اشطه.
اتمنى تزور مدونتى