السبت، ١٩ سبتمبر ٢٠٠٩

الـنـفـــس الـبـشـريــــة

كل سنة وانتم طيبين وعيد سعيد علينا وعلى الامة الاسلامية كلها , رمضان خلص بسرعة كالعاده , والشياطين طلعوا من الحبس ورجعوا تانى يشوفوا شغلهم , بس رمضان ظهرلنا الحقيقة وكشفنا قدام نفسنا , عشان الشيطان كان الحجة بتاعتنا والمبرر الجاهز لكل المصايب اللى بنعملها , عشان كده ربنا خلى رمضان اختبار عشان الانسان يعرف حقيقة نفسه , يعنى رمضان اهو جيه شهر كامل وخلص , وكل واحد فينا ادرى باللى عمله , طبعا اغلبنا بيحاول يتغير فى رمضان ويقرب لربنا ويبعد عن كل الذنوب اللى بيعملها , لكن اكيد غلطنا خلال الشهر وعملنا ذنوب برضو , وطبعا الذنوب دى مش من عمل الشيطان ولا من تدبيره ولا من وسوسته لينا , امال كل المصايب اللى بنشوفها خلال رمضان دى من تدبير مين ؟ هى من تدبير النفس البشرية !!!!! والنفس دى ساعات كتير بتبقى اقوى من الشيطان نفسه وهى اللى بتحرضنا على كل الذنوب اللى بنعملها , وعشان نحاول نحل المشكلة دى لازم الاول نتعرف بيها , يعنى لازم الواحد يبقى عارف نقط ضعفه زى ما بيعرف نقط قوته , بمعنى ان الانسان لما يقعد مع نفسه ويفكر بصوت عالى ويقول انا مشكلتى مثلا فى الكذب , يعنى متعود انى اخرج من اى موقف بأنى اكذب , او ان مشكلتى النميمة وبحب اتكلم طول الوقت مع صحابى على فلان وعلان , وهكذا المهم نعرف مشكلتنا ايه ونحددها ونفكر فيها علطول , بعد كده اول ما نيجى نكذب هنفتكر وهنبقى فى حاله اختيار ما بين الكذب وبين اننا نقول الحقيقة حتى لو الكذب كان هيحل المشكلة , ومرحلة الاختيار دى هى اهم حاجة فى الموضوع , لان فى كتير مننا بيعمل الذنب من غير ما يحس او يحاول يفكر فى اذا كان اللى عمله ده صح ولا غلط , لانه بيتحول لعاده يومية !!!! لكن لما بتبقى عارف نقطة ضعفك فين ومشكلة نفسك الحقيقية , هتستفاد حاجتين , اولا ممكن تبعد عن المكان او الزمان او الاشخاص اللى هيتسببوا فى حدوث الذنب اصلا , بمعنى لو واحدة مشكلتها النميمة وكل كلامها مع صحبتها بتنم فى الناس , لو البنت دى عرفت ان مشكلتها النميمة هتلاقى انها بتنم مع بنات معينة وفى بنات تانية مش بتحب تتكلم على حد , او فى اماكن بيبقى سهل انها تتكلم فيها او اوقات معينة بتبقى فاضية ومش لاقيه حاجة تعملها غير الكلام , وده هيخليها تختار تتكلم مع مين او تقلل الكلام من البنات اللى بتنم معاهم على قد ما تقدر او تروح معادها معاهم فى اخر وقت عشان متخليش فى وقت للنميمة , ثانيا لو مش هنقدر نبعد عن المكان او الزمان او الاشخاص اللى بيساعدونا على الذنب , هنبقى عارفين اننا بنعمل حاجة غلط , وبنختار نكمل ولا نقف , والحكاية دى بتيجى بالتدريب يعنى مش كلنا هنقدر من اول مرة نسيطر على نفسنا , لكن مره مع مره هنقدر نروضها , وساعتها هنحس بأحساس رائع , ياريت كل واحد فينا يدعى ويقول اللهم اكفنى شر نفسى على نفسى واكفنى شر غيرى واكفى غيرى شر نفسى

هناك ١١ تعليقًا:

Empress appy يقول...

تعرف ان فعلا ساعات الشيطان بيكون حجه بس تعرف اننا بنقدر نتغلب عليه بكلمتين اما النفس البشريه هى اللى صعب علشان كده دايما بقول يا رب اكفينى شر نفسي
كل سنه وانت طيب وحدوته زي ما انت

لبنــــــــــى يقول...

كل عام و انت بخير
الشياطين اللي جوانا اصعب و اقدر من الشياطين الاخرى
و مع هيك تقبل الله منا و منكم و ينعاد عليك بالفرحة
تحية

موناليزا يقول...

اللهم اكفنى شر نفسى على نفسى واكفنى شر غيرى واكفى غيرى شر نفسى
صدقت اخى الكريم
وتقدر تقول ان الشيطان بيروض النفس لدرجة انها مش بتبقى محتاجة توجيه منه لانه بيبرمجها لصالحه
اللهم انك سلطت علينا عدواً عليما بعيوبنا يرانا هو وقبيله من حيث لا نراهم اللهم ايسه منا كما ايسته من رحمتك
وكل عام وانت بخير

Sweet Violet يقول...

معاك حق و فعلا اكتر حد عدو للانسان و ممكن يوقعه فى ذنوب كتير نفسه الامارة بالسوء

كل عام و انت بخير
عيد سعيد
^_^

الفراشة الصغيرة يقول...

كل سنه وانت طيب يا محمد

عندك حق وعلى فكرة الشيطان دايما بيديك البدايه
واللى ضعيف بيكمل لوحده
ويدورلك على حاجة تانيه تعملها وهكذا
علشان كده ربنا قلنا
{ يا أيها الذين آمنوا استعينوا بالصبر والصلاة إن الله مع الصابرين }
{ إن الصلاة تنهى عن الفحشاء والمنكر }

اكيد ربنا عارف ان جوه كل منا ضعف فحب يقوى ضعفنا بالصلاه

دومت بكل ود
وعيد سعيد

walaa tulip rose يقول...

ياريت كل واحد فينا يدعى ويقول اللهم اكفنى شر نفسى على نفسى واكفنى شر غيرى واكفى غيرى شر نفسى

كل سنة وانتم بخير وفي اسعد حال
عيد سعيد يارب

فعلا الموضوع محتاج تدريب وياااااااااااارب نقدر فعلا ونتغير

romansy يقول...

انا سايب ليكى عيديه على المدونه
كل سنه وانتى طيبه

وان شاء الله محد حوش

ميمى واحمد يقول...

اللي عيد ميلاده في شهر سبتمبر يقول :
أناااااااااااااااااا

أو يعرف حد مننا عيد ميلاده في سبتمبر


ويكتب يوم كام في شهر سبتمبر




هنا حفلة كبيرة جدااااااااااااااا

di el2mr يقول...

كل سنه وانت طيب

فعلا الشياطين على الارض بقت اكتر من شياطين ابليس
كل انسان جواه شيطان وملاك
بس المهم مين اقوى من التانى ومين بيتحكم فى تصرفات الانسان ده

الفقيرة إلى الله أم البنات يقول...

كل سنه وانت طيبه
ربنا يرزقنا خشيته وهى ستجعلنا ان شاء الله القدرة على الشيطان والنفس
ويرزقنا محبه خالص

كل سنه وانت بالف خير

الفراغ يقول...

بجد استفدت من كلامك
لان حصل حاجات كتير غلط فى رمضان وكنت بسئل نفسى ازاى دا يحصل والشياطين متسلسله
اتارى احنا اللى شياطين وعقولنا بتغلب الشيطان نفسه
او اننا فعلا متعودين على شيء وخدنا عليهومش قادرين نتخلص من هذه العادات
فعلا انت نبهتنى لشيء مهم
جزاك الله كل خير
فهم النفس البشريه دى صعب
بس انت نورت عندى بقعة ضوءكانت تخفيها نفسى عنى
لمجرد ان ابقى على مانا عليه
لكن خلاص هاخد بالى بعد كدا
شكرا