الأربعاء، ١٤ أكتوبر ٢٠٠٩

نــتــيــجــــة الــفــســـــاد

الفساد هو اكتر حاجة منتشرة الايام دى فى مصر , وبقي شىء عادى جدا وطبيعى !!! وموجود فى الجرايد والمجلات والبرامج الحوارية , بختصار بقى عايش معانا بشكل يومى , المشكلة اللى انا بحسها دلوقتى وانا شايف انها اخطر نتيجة للفساد , هى هز قناعات الشباب والسبب الرئيسى فى تلوث مفهومهم وادراكهم للحياه !!! بمعنى ان الشاب وهو لسه عقله بينمو ويتفتح , بيبدأ يستوعب ويدرك قيمه الاشياء , وبيبدأ يتعلم كيفية الحياه نفسها , ونظريا ده المفروض يتم فى البيت من الاب والام ثم فى المدرسة ثم ممارسة الحياه العملية الفعليه , اما فى الواقع اللى بيحصل ان اغلب الاباء والامهات اليومين دول فى صراع حقيقى ويومى لمحاولة الحفاظ على حياه شبه كريمة لأبنائهم , وده بيقلل كتير من القيم والمبادىء اللى المفروض يزرعوها فى اولادهم , اما المدرسة والتعليم عموما , فانا مش محتاج اتكلم عن المستوى المتدنى اللى وصلناله اكيد انتم عارفين !!! يبقى مش فاضل غير الممارسة الفعلية للحياه وهنا بقى المشكلة , لما الشاب يفكر بينه وبين نفسه ويحاول يعرف مثلا المعنى الحقيقى للنجاح , يا ترى الانسان الناجح هو اللى بيعمل مجهود اكبر ولا الفهلوى اللى بيعرف يمشى اموره , وعشان تنجح فى شغلك وتترقى , هل المفروض تشتغل بزمه اكبر ولا تنافق المدير بتاعك ولا تدور على واسطه , وياترى مين اللى يستاهل فينا يعيش عيشة كريمة ومحترمة فى البلد , هل هو المتعلم اللى معاه شهاده ولا الصنايعى اللى معاه حرفه ولا الصايع اللى بياخد كل حاجة بالعافية !!!! كل دى اسئلة الشباب بتكتشف اجابتها كل يوم من اللى بتشوفه قدامها , وفى ظل عدم وجود نماذج او قدوه الشباب تحبها وتحترمها وتقدر كلمتها وتحاول تقلدها , بتكون النتيجة ان القناعات اللى بتتكون عندهم بتبقى غلط وده بيخليها مع الوقت ثوابت صعب تغيرها , وهيعيشوا بيها بعد كده من غير ما يحسوا ولو للحظة انهم بيعملوا حاجة غلط , وده بينبأ بأجيال اكثر سوء !!! انا عارف ان كلامى ممكن يكون سودوى شوية , بس حقيقى الموضوع خطير وعواقبه اخطر

هناك ١٠ تعليقات:

Dr. Ibrahim يقول...

للأسف الفساد فعلا منتشر فى كل قطاعات الدولة الخاص منها والعام الا من رحم ربى وهذا نادر..وصعوبة الأمر أن الفساد لا يولد إلا الفساد فندخل فى حلقة مفرغة من الفساد فقد ذكرت انه يعيش معنا يومياَ بالفعل وتوليد الفساد عن طريق زرع الفساد فى العقول الناشئة قد يؤدى الى فساد أكبر وأخطر وأشد..ولكن أغلب الناس لا يدرون أن هناك فساد ومنهم من يدرك ولكن يجب وضع الحلول وتطبيقها .......

تحياتى لك

موناليزا يقول...

مع الاسف هذا واقع ملموس
"ان الله لا يغير ما بقوم حتى يغيروا ما بأنفسهم"

خواطر رئيس شاب يقول...

السلام عليكم ورحمة الله وبركاته
يا راجل انا قلت انك هاتقول عليا انى انا قدوتك فى الحياه بصراحة زعلتنى
نيجى للجد بقى موضوع مين يستاهل الحياة الكريمة ده المفروض للناس كلها سواء المتعلم او الصنايعى ما دام بيمارس دوره بما يرضى الله
اما بالنسبة لموضوع النجاح ده فدى حاجة انت ماتقدرش تتحكم فيها كل ما عليك عمله هو انك تجتهد وتحاول اتقان عملك وتضع امامك قول الله تعالى وما توفيقى الا بالله وايضا تذكر قول الله تعالى مَّا أَصَابَكَ مِنْ حَسَنَةٍ فَمِنَ اللهِ وَمَا أَصَابَكَ مِن سَيِّئَةٍ فَمِن نَّفْسِكَ
اما بخصوص النموذج القدوة فما لنا قدوة افضل من رسول الله صلى الله عليه وسلم
وعلى فكرة لو اى موقف قابلك فى حياتك ورجعت فيه للدين هاتلاقى رد وتوجيه ربانى على مشكلتك
دمت بالف خير

الفراشة الصغيرة يقول...

انت عارف ان المشكله الاكبر يا محمد

ان الانسان الكويس فى الدنيا دى ملهوش صوت مش مسموع بمعنى اصح
ويوم ما بيتكلم بيخرصوه
الاسؤء لما تلاقى الانسان الكويس ده غير مبادئة لانه شايفها مبقتش تأكل عيش
فيحس ساعتها انه تاه
لاعارف يرجع زى ما كان ولا عارف يكون زيهم لان ضميرة بيوجعه
هو فعلا موضوع شائك جدا
متداخل الاطراف
مينفعش تصلح فيه جبهه وتسيب التانية لان كله بيكمل بعضه

☼♫♪ عمــاد الدين يــوسف ☼♫♪ يقول...

للاسف انت مش سوداوي انت واقعي ، وبما ان الواقع اسود ومهبب ، يبقى انت واقعي منطقي سوداوي

يا عزيزي لو اهتم النظام بدماغ الفرد ، هيلاقي الفرد دماغه بتكبر فيها تساؤلات
عن حجات كتير غلط حواليه ، وده اخر حاجه النظام مستنيها ، لان ببساطه كلمة ليه ؟ هيندرج تحتيها ليهااات كتير ، زي ليه جمال مبارك ، وليه حزب وطني ، وليه قائمة عالميه مفيهاش جامعه مصريه ، وليه معتقلات ، وليه رشاوي ....الخ

وانت طبعا سيد العارفين ان حزب مقاومة ليه الديمقراطي بيدشن جيل جديد بمفهوم جيد لــ الــ ليه ؟
يعني ليه مفيش تطبيع ؟ وليه ميبقاش جمال مبارك ؟ وليه في مانع من تسليك الامور ؟ وليه محاربة الرأسماليه ؟ وليه استـئـصاد لجنة السياسات مع انها لجنه كميله مووت ؟

احييييييه

romansy يقول...

الموضوع دا الصراحه بيحصل معانا كتير وبشووفه كتير فى حياتنا
فى الشغل اكتر
الفهلوى هو اللى بياخد الجو ودايما بيكسب اللى قدامه
بس قليل قوى اللى بيقدر المجهود
والاكتريه بيحب الفهلوى

حسن ارابيسك يقول...

هو ده مفترق الطرق
وساعة الإختيار لك وحدك
ومسئولية إختيارك تتحملها أيضا وحدك أمام نفسك وأمام المجتمع وأولاً وأخيراً أمام رب العباد
وكانت ستي تقولي دايماً
عقلك في راسك تعرف خلاصك
تحياتي
حسن أرابيسك

رابطة هويتي اسلامية يقول...

فى إطار حملة مدونتى عنوانى تستضيف رابطة هويتى إسلامية المدون محمد غالية صاحب مدونة هل تبحث عن السعادة

فى نقاش عام وحوار مفتوح حول موضوع الحملة .

والدعوة مفتوحة للجميع للمشاركة معنا فى النقاش من أجل الإفادة والإستفادة

نتمني منكم مشاركتنا من أجل تدوين أفضل

تحياتنا

أسرة رابطة هويتي إسلامية

رابطة هويتي اسلامية يقول...

وكما وعدناكم بأن تستمر حملتنا وتأتي بكل جديد

ضيف حوارنا هذه الرسالة :::

الأستاذ معتز شاهين - باحث تربوي

صاحب مدونة إحنا وهما

وهي مدونة تهتم بالإستشارات التربوية

نتمني منكم المشاركة معنا في الحوار لمزيد من الإستفادة ولمزيد من الإفادة

مع تحياتنا

أسرة رابطة هويتي إسلامية

Unknown يقول...








شركة تنظيف فلل بالقطيف
شركة تنظيف شقق بالقطيف
شركة تنظيف مجالس بالقطيف
شركة تنظيف موكيت بالقطيف
شركة تنظيف سجاد بالقطيف
شركة عزل اسطح بالقطيف
شركة مكافحة حشرات بالقطيف
شركة تسليك مجاري بالقطيف