مـصـر بـلـد الامـن و لامـؤخـذة الامـان

قريت حكمه لسيدنا على رضى الله عنه بتقول"الغنى فى الغربة وطن والفقر فى الوطن غربة" فكرت كتير فى الجملة دى وحاسيت قد ايه الواحد ممكن يبقى غريب فى بلده !!!! كتير تسمع ناس وشباب بالذات يقعدوا يشتموا فى البلد ويقولوا انهم مستنيين اى فرصة عشان يمشوا ويشتغلوا فى اى حته تانية حتى لو زبالين بس يمشوا من هنا ..... طب لما تسمع حد بيشتم فى مصر بيبقى بيشتم ايه هل هو بيشتم الشوارع ولا الناس ولا الحكومة ولا بيشتم ايه بالظبط !!!! ولما يكون فى اى مناسبة وطنية وتلاقى الكل بينافق وبيغنى لمصر بيبقى بيغنى لمين او بمعنى اصح بيغنى على مين هل على الناس ولا للحاكم ولا بيركب الموجه وخلاص ..... كتير بيتكلموا عن الانتماء وده شعور بيتولد مع الانسان بس بيكبر وبينموا مع احساس المواطن بقيمته فى بلده وده اللى بيخليه ممكن يضحى بنفسه عشان البلد دى ..... بس هل ده بيحصل فى مصر الايام دى وللاجيال اللى طالعة دلوقتى احنا بقينا بنكره البلد واللى عايشين فيها واللى بيحكموها وبقينا حاسين بغربة ذى ما نكون ضيوف او ناس مجبرة تعيش فى مكان غصب عنها ومستنيه الفرصة اللى تخرجها من المكان ده !!!! والاحساس ده بيذيد كل يوم وكل جيل بيطلع بيحسوه اكتر وده لان الحياه من غير احلام ولا امل ولا امان بتبقى مستحيلة وده بالظبط اللى بيحصل معانا ..... الواحد وهو لسة طالب بتبقى احلامه كبيرة بيحلم يكون عنده عربية اخر موديل وفيلا بحمام سباحة ذى ما بيجى فى الافلام وبعدين بيحس ان العمليه وسعت منه فبيحلم بشقة واسعة وعربيه صغيرة فيلاقى العملية برضة لسة وسعة والاحلام تفضل تصغر و تصغر لحد ما يبقى الحلم الاساسى انك تكمل الشهر من غير ما تستلف او من غير ما حد يهينك ....... اما الامل فالكلمة دى الواحد مسمعهاش من زمان ولو اتكلمت مع اى حد بالصدفة هتلاقيه بيقول مفيش فايدة ولا امل فى ان اى حاجة تتغير والناس اللى قاعدين على قلبنا من اكتر من 25 سنة مش هيتغيروا إلا بمعجزة الاهية ........ وبالنسبة للامان فأنهو امان ده اللى هنتكلم عليه والناس مش لاقيه العيش الحاف اعتقد ان انا والناس اللى بتخش على المدونات عموما من الطبقة المتوسطة يعنى قادرين نعيش والحمد لله بس الطبقة المتوسطة دى قربت تنقرض ذى الديناصورات خلاص ..... الفقر بياكل فى الناس يا جماعة فى عائلات فى مصر بتعيش على مرتب 300 جنيه وفى اقل من كده طب الناس دى هتعيش ازاى بعد ما الحكومة سابت الحاجة تولع كده !!! احنا متوقعين ايه من شعب نصفه بقى تحت خط الفقر ....... الناس بتموت فى طوابير العيش وفى نفس الوقت ولى العهد السيد جمال مبارك بيتكلم على دخول مصر لمصاف الدول النووية !!!!! نووية مين وشوقية مين النظام مش عارف يحل المشاكل الاساسية لحياة البشر لا عارف يوفر اكل صحى ولا مياه نقية ولا هواء نظيف ولا حتى عيش حاف ....... انا كنت لسة بتكلم من كام يوم على تصورى لطريقة الحكم فى مصر انا شايف البلد بتتحكم يوم بيوم يعنى الريس بيصحى الصبح يفطر ويشرب الشاى ويقرا الاهرام وبعدين يسأل فى جديد النهارده ويقولوله لا يا ريس كله تمام والبلد على قديمه من ربع قرن !!!!! بس الوضع ده مش هيستمر كتير هو صحيح الشعب المصرى غلبان وصبور ومش بتاع مشاكل ولا انقلبات بس الفقر والجوع هيخلوا الناس تثور .... بس المصيبة ان لما تحصل الثورة دى مش هتصيب حد من اللى اتسببوا فيها لانهم هيكونوا هربوا وسابوا البلد تولع !!!!!! وربنا يستر على البلد وعلينا من ............ ثـــــورة الـجـيــــــاع

الضمير العربى ..... العجز العربى

اعتقد ان اغلبنا شاف اغنية الضمير العربى ... طبعا الاغنية حلوة ومأثرة وفيها مشاهد توجع اى حد يشوفها ... فى ناس لما شافت الاغنية بكت وفى ناس اتأثرت وفى ناس مقدرتش تكمل فرجة !!! لان الاغنية تجسيد للحاله اللى وصل ليها العرب مش هقول الفلسطينى او العراقى او اللبنانى لان احنا كعرب بيحصلنا كلنا كده بس بصور مختلفة !!! عشان كدة المفروض يسموا الاغنية العجز العربى بدل الضمير العربى لان اول احساس بيجيلك بعد ما تشوف الاغنية احساس بالعجز اطفال بيموتوا ... رجالة بتتعذب فى السجون ... ستات بتتبهدل وتترمل وبتغتصب قدام عنيك وانت مش عارف تعمل ايه !!! وفى نفس الوقت تلاقى اصحاب الجلالة والفخامة الحكام العرب بيجبروا الشعوب على التطبيع والتعايش السلمى !!! تخيلوا بقة لما تشوف الجيش الاسرائيلى داخل بدبابة على مدرسة ولا بيت فى ستات وعيال صغيرة والدبابة دى ماشية بغاز مصرى مدعم !!!!! اه والله مصر بتصدر الغاز لاسرائيل وبسعر اقل من سعره العالمى وبسعر ثابت لمده عشرين سنة شوفتم خيبة ذى خبيتنا !!!! تعرفوا ان امريكا بتضغط على الاعلام عندنا عشان ميقولش على الفلسطينى اللى بيموت او بيعمل عمليات فدائية جوة اسرائيل شهيد عايزين المذيع يقول سقط اليوم خمسين قتيل وليس شهيد حتى الشهادة مش عايزينا نخدها !!!!!! انتوا عارفين نسبة المخدرات ذادت قد ايه الكام سنه اللى فاتت ... الشباب بقة اليوم كله عايز يحشش ويشم عشان ميفكرش فى اللى بيحصل واللى مش قادر يعمل فيه حاجة..... انتوا عارفين انا بقول كدة ليه ؟ لانى يمكن من اكتر الناس يأس فى ان اى حاجة ممكن تتصلح بس حتى اليأس خلاص انا زهقت منه !!!! انا عايزكم تقولوا افكار نبدأ بيها يمكن متتنفذش ومحدش يعرف عنها حاجة بس كأننا بنفكر بصوت عالى يعنى احنا ممكن نعمل ايه او ايه اللى المفروض يحصل وانتوا لو فى اديكم القرار ايه اللى هتعملوه .... انا مبقولش ندخل فى حرب ونعادى العالم والغرب مع ان ده مش عيب لو دفاعا عن ارضنا وكرامتنا إلا لو حد معتبر اننا ملناش دعوة باللى بيحصل هناك !!!!انا مش عايز مظاهرات كفيانا كلام انا عايز فكرة او حلم ممكن يتحقق ... انا مثلا نفسى مصر تصرح بأنها مستعدة لتدريب عناصر من فلسطين على يد الصاعقة المصرية لتنفيذ عمليات جوة اسرائيل تخيلوا ده هيبقى رد فعله ايه احنا فاكرين الجيش الاسرائيلى لايقهر بس اديكم شفتوا حسن نصر الله عمل فيهم ايه مقدروش يعملوا معاه حاجة وهو كان لوحده وبعد الحرب الاعلام حاول يشوه صورته ويكرهنا فيه ويقولوا ده شيعى وخطره علينا ذى خطر اسرائيل !!!! انا عايز كل واحد بعد ما يخلص الموضوع يقولى فكرة ممكن تتنفذ يمكن نقدر نغير حاجة من اللى وصلناله

لو لم اكن مصرى لوددت ان اكون اسرائيلى

عنوان مستفذ ومقرف مش كده بس ايه المشكله يعنى ما كل حاجة حولينا بقت مقرفة ايه يعنى 100 ولا 150 فلسطينى يتقتلوا عادى ده بقه طبيعى واتعودنا عليه ...... وحتى الناس اللى بتتحمق وبتتكلم بيقولوا حماس هى اللى غلطانة وهى عارفة انها هتضرب صاروخ اسرائيل هترد بــ 50 يبقى ايه لازمته من الاول !!! و بيقولوا احنا مفيش حاجه فى ادينا شوفو قوتنا وشوفو قوتهم يعنى اى مواجهة مش هتبقى فى مصلحتنا وبعدين دى مش الحرب بتاعتنا وكل واحد اولى بأرضه !!! وفى ناس مستغربه وبتقول فى الغرب لو حد ضرب قطة ولا كلب ممكن يدخل السجن بس اسرائيل لو قتلت 500 واحد مش مهم ويقولولك دى ازدواجيه فى المعايير وفين الضمير العالمى وكلام كدة من اللى مبيتفهمش !!! انا بقه شايف الموضوع بطربقة تانيه خالص ..... العالم كله دلوقتى بقه مادى وكل حاجة فيه بقة ليها ثمن حتى الشعوب ليها ثمن وقيمه وعلى حسب قيمتك هتحدد اهتمام العالم بيك ..... وانا بقولها بكل شجاعة جزمة الاسرائيلى بــ 100 مواطن عربى وديه حقيقة حتى لو مش عايزين نصدقها !!! الجمله وجعتكم اوى صح ...... انتوا عارفين من حوالى اسبوعين ابن شارون كان بيتحاكم فى قضيه فساد من ايام ما كان ابوه رئيس وزراء اسرائيل واتحكم عليه بالسجن !!! شوفوا هما بيسجنوا ابن الرئيس واحنا بنورثه الحكم !!! هما لو الرئيس منفذش البرنامج الانتخابى اللى قاله يقدروا يغيروه ..... واحنا لو عايزين نغير رئيس الحى بتاعنا مش هنعرف !!! هما لو واحد مات فى حادثة يحققوا فى الحادثة ويعاقبوا الفاعل ..... واحنا مات عندنا 1000 واحد فى العبارة اللى غرقت وصاحبها عايش برة ومحدش عارف يكلمه !!! هما عندهم 3 جامعات من اهم 500 جامعة فى العالم ..... واحنا عندنا جامعة القاهرة ترتيبها رقم 14 على مستوى افريقيا !!! شوفتم بقه هما يسووا كام واحنا نسوا كام فى سوق الشعوب !!! ومحدش يقولى والنبى احنا مسلمين وهما كافرة لان ده حسابه عند ربنا يعنى احنا هندخل الجنه وهما هيدخلوا النار وحتى موضوع الجنه دة فى شك بعد البلاوى اللى بنعملها بس انا بتكلم فى الدنيا ..... ومحدش يقولى احنا فراعنه وعندنا حضارة والحوارات الفاشله دى عشان انا بحس ذى ما يكون واحد هدومه مقطعة ومش لاقى ياكل والنهار كله بيقول انا جدى كان باشا !!! احنا بقينا ملطشة العالم كله والكل بيشوط فينا من اول الرسوم المسيئة للرسول (صلى) وسب القرأن والحجاب لحد اللى بيحصل فى فلسطين والعراق ولبنان .....المفروض منستناش مساعده من حد ولا نستنى مين اللى هيكسب اوباما ولا هيلارى لان اى حد هييجى مش هيساعدنا لاننا منسواش !!! لازم الاول نغير من نفسنا وساعتها نقدر نواجه الدنيا كلها

استار اكاديمى

انا متدايق ومخنوق وقرفان وذى ما الشباب بتقول انا منفوخ من برنامج استار اكاديمى ساعات بفكر بينى وبين نفسى انى لو كنت شاب روش ذى الشباب دول كنت عملت اكتر من كده بس يلعن ابو الروشنه اللى تخلى الشباب كدة يا اخى مش عايز اكبر الموضوع واقول إن فى جهات غربية من مصلحتها ان الشباب دول يبقى نجوم وقدوه لان ده هيدخلنا فى نظرية المؤامرة والحوارات الكبيرة ديه بس الموضوع فعلا كبير انا شايف قدامى شباب الناس بتابع حياتهم اليومية دقيقة بدقيقة على مدار حوالى ثلاثة شهور وغصب عننا كلنا الشباب دول بيتأثر بيهم الاولاد الصغيرين اللى لسة تفكيرهم وشخصيتهم بتتكون واللى متابع هياخد باله من كذا حاجة ..... اولا ولا واحد فيهم بيصلى مع إن اغلبهم مسلمين !!! واغلبهم بيتكلموا يا انجليزى يا فرنساوى مع إن كلهم عرب !!! والنهار كله يبوسوا ويحضنوا فى بعض على الفاضى وعلى المليان !!! يمكن حد يقرا الكلام ده ويقولى انت بتغير منهم ونفسك تبقى مكانهم وتهيص ذى ما هم هايصين بس اللى بيحصل ده فعلا صعب ومش طبيعى انا نفسى اعرف ابهات البنات دى فين يعنى اذاى تبقى بنتى النهار كله بتتباس من اول بواب الاكاديمية لغاية الطلبة والاساتذة و النجوم اللى بيغنوا معاهم كل ده والناس كلها بتتفرج عليهم وانا قاعد قدام التليفزيون ومركب القرنين ويمكن كمان بلعب فى شنبى وفرحان أن بنتى مزة ومتظبطة على الشاشة قدام العالم كله فى ناس هتقول ان ديه حرية شخصية وان كل واحد حر فى تربيتة !!! وانت لو مش عاجبك ممكن تغير القناه وتشغل قناه اقرأ او المجد ..... كلامهم صح وعلى عينى وراسى بس الاعلام بيغير حياة وتفكير وشخصية الشعوب !!! فانت متجبليش مجموعة ولاد وبنات وانت مختارهم بيتكلموا انجليزى اكتر من العربى وبيقلعوا اكتر ما بيلبسوا وبيبوسوا اكتر ما بيتكلموا ومقدمهم على الشاشة 24 ساعة والناس بتتأثر بيهم غصب عنهم وتقولى فى الاخر ديه حرية !!! انا عايز اسأل سؤال الشباب دول طول قاعدتهم مع بعض متسمعش منهم حوار مفيد بس لو سألت اى حد فيهم عن رأيه فى التطبيع او رأيه فى امريكا مثلا تتوقع رده هيبقى ايه !!! ومحدش يقولى انت متعرفهمش فمتظلمهمش لان المظهر العام للانسان يعنى طريقة لبسه وكلامه بيوصلك لطريقة تفكيره وشخصيته يعنى بذمتكم دول هما اللى هيحرروا فلسطين !!! انا عارف ان الشباب العربى كله محبط وان فى جو عام بيحاولوا يوصلوه للناس بأن اللى احنا فيه ده وضع طبيعى وان القوى لازم قانونه هو اللى يمشى واحنا مفيش حاجه فى ادينا وان اسرائيل بقت امر واقع لابد انك تقبل بيه وتعيش معاه !!! بس الحل مش انك تقدم نسخة من انصاف الرجال وانصاف العاهرات وتقول للناس هم دول المشهورين والناجحين واللى الاعلام متابع اخبارهم اكتر من اخبار العراق ولبنان انا اسف على اللفظ بس هما بيحولوا يقلدوا الغرب فى الكلام والرقص وقلة الادب !!! بس حتى التقليد احنا فاشلين فيه فبقينا ذى المسخ لابقينا رجاله ولا بقينا خوجات

الحياة لامؤخذة الطبيعية

عايز اتجوز........اظن ده طلب طبيعى شاب وداخل فى الــ 25 من حقة الدستورى انه يتجوز !!!! طب الواحد مننا عايز يتجوز ليه ؟ فى شاب يقولك استقرار وشاب يقولك اهو تغيير وشاب يقولك عادى مهو المفروض انى اتجوز .... بس المعظم مبيقولش الحقيقة والحقيقة هى ان كل الشباب عايزين يتجوزوا عشان يمارسوا حياتهم الطبيعية وده مش عيب ديه غريزة وبما اننا مسلمين فمينفعش نمارس الغريزة دية إلا من خلال الجواز وده السبب الاساسى اللى مخلي الشباب عايز يتجوز ....... كده احنا قدام مشكلة ومشكلة كبيرة كمان احنا قدام شباب محتاج يمارس حياته وده طلب عادل الشاب فى امريكا والدول الغربية بيمارس حياته وهو عنده 14 15 سنه بالكتير اما الشاب عندنا ياعينى بيفضل لحد 30 سنة ويمكن اكتر لحد ما يقدر يتجوز وساعتها بيكون تقريبا صدّا يعنى قلته تكون احسن !!! الــ 10 15 سنة دول اللى بيبقى فيها الشاب عايز ومش قادر بتبقى الحياه صعبة حتى لو بنحاول منتكلمش فى الموضوع ده وحتى لو بندارى احنا لازم نعترف بالمشكلة ونتكلم عنها عشان نحاول نحلها الرسول ( صلى ) كان عارف المشكلة وقال فى حديث فيما معناه ( من استطاع منكم البائة فليتزوج ومن لم يستطع فعليه بالصوم ) وده معناه ان الانتظار صعب ومحتاج صبر وجهاد مع النفس لان فى ناس مبتصبرش وبتتعامل !!! ربنا يهدينا ويهديهم .... نرجع لموضوعنا طب اية اللى بيخلى الشاب يستنى لحد الــ 30 عشان يتجوز ؟ طبعا ده سؤال غبى لان كلنا عارفين مصاريف الجواز واول حاجة طبعا الشبكة وحيث ان الذهب وصل حاليا لاكثر من 130 جنية الكيلو قصدى الجرام وحيث ان كل بنت عايزة شبكة مش اقل من بنت خالها ( ملحوظة اى بنت وانت بتجبلها الشبكة لازم يطلعلها بنت خال جالها شبكة غالية ومينفعش تجيب شبكة اقل منها لاحسن البنت تتعقد ) تلاقى نفسك عايز تحوش سنتين تلاته عشان الشبكة بس !!! تخش على الشقة وحيث ان مصرنا الحبيبة تمر بأزمة سكن منذ حوالى 20 سنة والبلد عمالة تخرج من عنق زجاجة تدخل فى زجاجة اكبر فالشقق بقت مولعة يعنى لو عايز اوضة وصالة وحمام مشترك محتاج تحوش خمس عشر سنين ده لو انت شغال اساسا لان حيث ان البلد تمر ايضا بأزمة بطالة فأغلب الشباب اللى محتاجة تمارس حياتها الطبيعية مش لاقية شغل اساسا واللى بيشتغل يادوب بيجيب مصاريفة يبقى جواز اية اللى انت جاى تقول عليه !!!!!! طب وبعدين الوضع ايه دلوقتى ؟ والله دلوقتى بقى فية موجة وسط الشباب وهى الاضراب عن الجواز وده رأى بدأ يقتنع بيه شباب كتير وانا منهم يعنى بصراحة انا مش هتجوز إلا اما اكون قادر افتح بيت واصرف على مراتى وبيتى كويس ومبفكرش هتجوز وانا عندى كام سنة اما موضوع الحياة الطبيعية فربنا يلهمنا الصبر والسلوان واهو كله بثوابة الواحد بس بيفضفض عشان الكبت بعيد عنكم وحش ..... اسف لو طولت عليكم بس يمكن الكلام ده مينفعش تقوله لامك وابوك بس ينفع تقوله فى مدونتك !!!! وعجبى

سيناريو الفوضى

كل سنة وانتوا طيبين ... مش عايزين نبدأ السنة الجديدة بحاجة تنكد عليكم !!! بس انا عايز اعرف رأيكم فى حاجة كده ... طبعا احنا عارفين ان الرئيس مبارك لسة المدة بتاعته مخلصتش انا بصراحة مش عارف هو حاجز كام مدة بس ما علينا مش هو ده الموضوع !!! الموضوع انا عايزكم تتخيلوا معايا ان الرئيس مبارك اطال الله فى عمره بعد الشر بعد الشر ويارب السبعين مليون مصرى يجعل يومهم قبل يومه حصله حاجة خلال السنة الجديدة ايه اللى ممكن يحصل لمصر بعده طبعا الاعمار بيد الله بس المفروض يكون عندنا تصور للموقف ... فى كذا حاجة ممكن تحصل اولا الدستور بيعين رئيس مجلس الشعب رئيس مؤقت للجمهورية لحين انتخاب رئيس جديد ... ثانيا الحزب الحاكم وهو الحزب الوطنى صاحب الشعبية الكبيرة والاغلبية العظمى فى البلاد سيرشح رئيس للدولة ومعظم السياسيين والمفكرين يتوقعون ترشيح جمال مبارك وده مش عشان انه ابن رئيس الجمهوريه لا سمح الله ولكن لخبرته السياسية الكبيرة والطويلة التى لا يعلمها إلا الله ورجال الحزب الوطنى !!! ماشى السيد جمال سيرشحه الحزب والمفروض تتم انتخابات وطبقا لسابق معرفتنا بنزاهة الانتخابات المصرية وخلوها من اى شوائب فى الثلاثين سنة اللى فاتوا المتوقع فوز جمال مبارك بتسعين فى المية من الاصوات على الاقل ويمكن يكون السيد جمال مبارك عايز يغير مسيرة الوالد ويبعد عنه الشبهات فيخلى الداخلية تقلل النتيجة لسبعين او ثمانين فى المية عشان مفيش اى كلب يفتح بقه وبرضه اهو عشان الحسد !!! هنا فى اسئلة كتيرة منها هل الناس هتقبل توريث الحكم من مبارك لابنه ؟ وهل الاخوان وحركة كفاية وبقيت الاحزاب هيخلوا الموضوع يعدى كده ببساطة ؟ وهل لو حصل مظاهرات خلال انتقال السلطة هتبقى فى حدود ولا الموضوع هيقلب بفوضى ؟ وهل الداخلية هتذود العيار حبة وتحاسب على القديم كلة ولا هتتصرف بعقل ؟ وايه هيبقى موقف الجيش ؟ ولو جمال مبارك قلب الموازين وقال مش عايز ارشح نفسى تفتكره ايه اللى هيتم ؟ ومين البدايل اللى شايفين تنفع لمنصب الرئيس ؟ اسئلة كتيرة بس ده برضة مستقبل البلد والمفروض نجهز نفسنا لأى حاجة ممكن تحصل ولو حد فى دماغه سيناريو تانى ياريت يكتبه وذى ما بيقوله اصبر على جار السو يا يرحل يا ..... كفاية كدة عشان الرقابة

الـــحـــــــب

على قد ما الكلمة صغيرة على قد ماهى قالبة الدنيا ... ايه هو الحب ؟ كل واحد ممكن يفهمه من وجهة نظره !! هل الحب اللى احنا نعرفه صح ولا غلط ؟ وانا قصدى من اللى نعرفه يعنى اللى اتربينا واتعودنا عليه ... انتوا عارفين المشكلة ان احنا كل اللى نعرفة عن الحب هو القصص اللى فى الافلام والكلام اللى فى الاغانى والرويات اللى فى الكتب فتخيلوا ان فى اجيال كاملة عرفت الحب من الافلام والاغانى اللى مالية حياتنا يعنى لو الافلام والاغانى دى كدب أو غلط يبقى احنا كل اللى نعرفة عن الحب غلط !!! اوضحلكم انا عايز اقول اية ... لوسألت اى حد اشهر قصة حب نفسك تعيش ذيها هيكون الرد غالبا روميو وجوليت أو قيس وليلى مثلا !!! تصوروا بقى ان الاتنين منتهوش بالجواز واغلب قصص الحب المشهورة اللى نعرفها انتهت بالفشل وده المفروض يخلينا نفكر لو ابطال القصص ديه كملوا مع بعض كانوا هيستمروا !!! اعتقد انتوا بدأتوا تفهموا انا عايز اوصل لأيه ... عارفين فى احصائية ان فى حالة طلاق كل ست دقايق ومعظم الحالات من المتزوجين حديثا وكتير منهم متجوز عن حب !!! الحب اللى عارفينه من الافلام ... كل ده لو ربطناه ببعض هيوصلنا لنتايج مهمة وهى اولا ان الحب اللى فى الافلام والاغانى اغلبه مبيحصلش وإن حصل مبيستمرش ... تانى حاجة إن الارتباط السليم الناجح مبنى على حاجات مهمة ومش منها الحب بتاع الافلام ... تالت حاجة إن اختيار شريك الحياة لازم يبقى على اسس اهمها الدين والاخلاق وده الامل فى تكوين اسرة صحيحة ... اخر حاجة انا نفسى نفكر فى كل حاجة فى حياتنا من أول وجديد ونحاول نفهم كل حاجة حوالينا حتى لو قالولنا انها هى كده ونغير أى حاجة شايفين انها عايزة تتغير ومنقولش هى طول عمرها كده ... يمكن ساعتها الحياة تتغير للأحسن

شعـــب بـــلا أمـــل

انت عندك أمل فى الايام الجاية ؟ بلاش ...... تعرف حد عنده أمل ان الاحوال هتتغير او هتتبدل للاحسن ؟ طب اخر واحد شفته متفائل كان امتى ؟ اسئلة بايخة مش كدة ؟ بس لازم تتسأل يعنى لو اتكلمت مع اى شاب دلوقتى هتحس من كلامه انه عايش ذى ما الناس عايشة معندوش الروح اللى تخليه يحلم و يخطط لحياته ومستقبله وانا قلت شاب لان المفروض ان الشباب هما اللى يحلموا وينفذوا..... ده المفروض يعنى !!!!! ولو اتكلمت مع اى حد عادى هتحس بنفس الاحساس هتلاقى يأس فى وسط كلامه حتى لو بيحاول يخبى هتلاقى الكلام طالع من غير نفس ومن غير طعم !!!! احنا ايه اللى وصلنا لكدة ؟ هل الظروف ولا الحياه الصعبة ولا النظام اللى بيحكمنا ولا ضعفنا واستسلامنا للواقع ؟ هو اللى خلانا شعب بلا امل وبلا روح وبلا حلم !!!!! لازم نفكر فى حياتنا من جديد ونعمل اللى عالينا ونأمل فى ربنا خير وكل واحد يغير من نفسه عشان بلدنا تتغير

التهريج المنظم

اولا احنا أسفين على التأخير وعلى فكرة ده مش اهمال او كسل بس فعلا الايام اللى فاتت كنا كلنا مشغولين جدا وبجد البلوج وحشنا وان شاء الله مش هنتأخر تانى . ثانيا يمكن انا كنت بحاول وانا بكتب المواضيع اللى فاتت انها تكون مواضيع عامة بس اسمحولى اكتب المره دى عن تجربة شخصية انا عيشها بقالى فترة ولسة مكمل فيها. يمكن اللى متابع البلوج معايا من زمان يعرف انى دخلت مكان معين غصب عنى وهقضى فية سنة كاملة انا مش هقدر اكتبه بوضوح عشان المشاكل وعشان الموضوع ده حساس جدا بس انا واثق فى ذكاء اصدقاء حدوتة وعارف انهم هيفهمونى. انا لما عرفت انى داخل زعلت جدا بس قلت تجربة وأكيد هتعلم منها بس مكنتش متخيل اللى بيحصل جوة !!! انا مش هحكى تفاصيل بس الاجمالى ان المكان ده عبارة عن منظومة من (التهريج المنظم) الكلمة دية انا سمعتها اول ما دخلت . الاول مكنتش فاهمها بس بعد كده فهمت . عارفين انا حاسس انى عايش فى فيلم وكل اللى فية بيمثلوا على بعض وكلهم عارفين ان ده تمثيل وانه كدب بس مجبرين انهم يكملوا وبما انى اصغر واحد فى المنظومة ديه ذى الكومبرس يعنى مالوش اى قيمة فالكل ( بيحط عليه ) مهو الحيطة المايلة . يمكن لو بتعلم حاجة او بستفاد حاجة او هما بيستفادوا منى بحاجة مكنتش زعلت بس اهو وقت وبيضيع من العمر اكتر ما هو ضايع !!! بس الواحد لازم يقول اللى ليه واللى عليه انا برضه اتعلمت شوية حاجات ذى الكدب – الجبن – انك تعامل اللى قدامك بحترام مع انك مش بتحترمة وهو عارف كده بس عادى هو عارف انه مش محترم وعارف انك عارف كده بس مش قادر تتكلم والعملية ماشية وكل ما تكلم حد يقولك حاول تخلص السنة بتاعتك من غير مشاكل . انا سمعت كذا تفسير للى بيحصل هناك بس اكتر تفسير عجبنى ان الغرض من الموضوع كله احتواء طاقة الشباب يعنى الواحد بيبقى طالع من الكلية كله احلام وطاقة عامل ذى القنبلة يخش جوة يا باشا يادوب شهرين تلاتة يكون اتظبط هناك بيعملولك فسسسسسس فتطلع من جوة مالكش نفس تعمل اى حاجة . بس هنعمل اية اهى برضه تخليص ذنوب ملحوظة : لو سمحتوا وانتوا بتكتبوا التعليقات بلاش تقولوا احنا بنتكلم على اية وذى ما فهمتونى انا هفهمكم .

انا مش خروف

كل ما امشى فى حتة الاقى راجل ماسك عصاية كبيرة وقدامة يجي 100 خروف !!! واحد هيقولى عادى العيد الكبير قرب وكل سنة وانت طيب ........ وانت طيب يا سيدى ....... انا بقى لما بشوف المنظر دة بفكر فى الخرفان اللى ماشية لاعارفة هى رايحة فين ولا هيحصلها اية !!! هيرد عليا نفس الواحد ويقولى ماهى خرفان وكام يوم وتندبح عادى يعنى .......... ياسيدى اصبر عليا وانت هتفهم انا لما بشوف المنظر دة بفتكر حالى وحال الجيل كلة اقولكم انا قصدى اية .............. لو بصيتوا لحياة معظم الشباب من الطفولة لحد دلوقت هتلاقوا التسلسل الاتى:::::::::: من اول الولادة لحد ابتدائى بتبقى كلها عيال حتى الواحد ملوش ذكريات فى الفترة دية....................تروح الاعدادى تسأل اى حد عايز تطلع اية يبص لأمة وابوه الاول وبعدين يقولك يا مهندس يا دكتور يا ظابط وكأن مفيش مهن غير دول فى البلد............... اما الثانوى ده موضوع ثانى الواحد يا عينى يفضل يذاكر ويدح عشان يجيب مجموع يدخلوا كلية من كليات القمة ويا عالم بعد ما يجيب المجموع التنسيق هيودية انهو كلية فى انهو بلد.................................نخش الجامعة يا باشا تلاقى الموضوع اتغير خالص نسبة السقوط فى اول سنة فى مختلف الكليات رهيبة فتلاقى الطالب اللى كان لسة جايب فوق الــ %90 طالع بــ 3 ضعيف و 2 ضعيف جدا ولما يبدأ التخصص تلاقى الطلبة بتدخل القسم اللى فى عدد كبير عشان تبقى مع الزحمة وخلاص!!!!!!!!!!!!!!!!!! ويبدأ بقى الاختلاط ثم الارتباط ثم الفشل ثم محاولة الخروج من الفشل ثم استمرار الفشل وبدأ استيعاب الواقع وهنا بقى بيتقسم رد الفعل::::::::::::::::::::::::::::: - مجموعة بيجيلها احباط شديد وساعات بتوصل لدرجة المرض النفسى ------------مجموعة بتصلى و تقرب لربنا وساعات بتوصل لدرجة التطرف . مجموعة بتقلب معاها بلامبالاة يعنى بتبقى مش فارقة معاها حاجة خالص --------------- مجموعة بتضرب بانجو و بتحشش يمكن بتلاقى فى المخدرات حاجات احلى من الواقع ------------ -مجموعة اخيرة ودول عددهم قليل جدا دول اللى بيحاولو يفكروا فى المستقبل ويلاقوا لنفسهم مكان فية . بعد الكلية تبدأ رحلة البطالة وانتم عارفين الباقى طبعا!!!!!!!!!!!!!!!!!!!!! انا عارف ان اللى انا قلتة دة مبيطبقش عل كل الناس بس الاغلبية بيحصلهم كدة عشان كدة انا عايز كل واحد فيكو يفتكر كويس هو خد كام قرار فى حياتة بدون ضغوط ولا تاثير من حد وكام مرة مشى مع الخرفان من غير ما يفكر وبعد ما تفتكر هتعرف انا قصدى اية وانك لازم تبص لحياتك الفترة الجاية بطريقة مختلفة عشان كدة ليكن شعارنا فى الايام القادمة انا مش خروف