الـــحـــــــب

على قد ما الكلمة صغيرة على قد ماهى قالبة الدنيا ... ايه هو الحب ؟ كل واحد ممكن يفهمه من وجهة نظره !! هل الحب اللى احنا نعرفه صح ولا غلط ؟ وانا قصدى من اللى نعرفه يعنى اللى اتربينا واتعودنا عليه ... انتوا عارفين المشكلة ان احنا كل اللى نعرفة عن الحب هو القصص اللى فى الافلام والكلام اللى فى الاغانى والرويات اللى فى الكتب فتخيلوا ان فى اجيال كاملة عرفت الحب من الافلام والاغانى اللى مالية حياتنا يعنى لو الافلام والاغانى دى كدب أو غلط يبقى احنا كل اللى نعرفة عن الحب غلط !!! اوضحلكم انا عايز اقول اية ... لوسألت اى حد اشهر قصة حب نفسك تعيش ذيها هيكون الرد غالبا روميو وجوليت أو قيس وليلى مثلا !!! تصوروا بقى ان الاتنين منتهوش بالجواز واغلب قصص الحب المشهورة اللى نعرفها انتهت بالفشل وده المفروض يخلينا نفكر لو ابطال القصص ديه كملوا مع بعض كانوا هيستمروا !!! اعتقد انتوا بدأتوا تفهموا انا عايز اوصل لأيه ... عارفين فى احصائية ان فى حالة طلاق كل ست دقايق ومعظم الحالات من المتزوجين حديثا وكتير منهم متجوز عن حب !!! الحب اللى عارفينه من الافلام ... كل ده لو ربطناه ببعض هيوصلنا لنتايج مهمة وهى اولا ان الحب اللى فى الافلام والاغانى اغلبه مبيحصلش وإن حصل مبيستمرش ... تانى حاجة إن الارتباط السليم الناجح مبنى على حاجات مهمة ومش منها الحب بتاع الافلام ... تالت حاجة إن اختيار شريك الحياة لازم يبقى على اسس اهمها الدين والاخلاق وده الامل فى تكوين اسرة صحيحة ... اخر حاجة انا نفسى نفكر فى كل حاجة فى حياتنا من أول وجديد ونحاول نفهم كل حاجة حوالينا حتى لو قالولنا انها هى كده ونغير أى حاجة شايفين انها عايزة تتغير ومنقولش هى طول عمرها كده ... يمكن ساعتها الحياة تتغير للأحسن

شعـــب بـــلا أمـــل

انت عندك أمل فى الايام الجاية ؟ بلاش ...... تعرف حد عنده أمل ان الاحوال هتتغير او هتتبدل للاحسن ؟ طب اخر واحد شفته متفائل كان امتى ؟ اسئلة بايخة مش كدة ؟ بس لازم تتسأل يعنى لو اتكلمت مع اى شاب دلوقتى هتحس من كلامه انه عايش ذى ما الناس عايشة معندوش الروح اللى تخليه يحلم و يخطط لحياته ومستقبله وانا قلت شاب لان المفروض ان الشباب هما اللى يحلموا وينفذوا..... ده المفروض يعنى !!!!! ولو اتكلمت مع اى حد عادى هتحس بنفس الاحساس هتلاقى يأس فى وسط كلامه حتى لو بيحاول يخبى هتلاقى الكلام طالع من غير نفس ومن غير طعم !!!! احنا ايه اللى وصلنا لكدة ؟ هل الظروف ولا الحياه الصعبة ولا النظام اللى بيحكمنا ولا ضعفنا واستسلامنا للواقع ؟ هو اللى خلانا شعب بلا امل وبلا روح وبلا حلم !!!!! لازم نفكر فى حياتنا من جديد ونعمل اللى عالينا ونأمل فى ربنا خير وكل واحد يغير من نفسه عشان بلدنا تتغير

التهريج المنظم

اولا احنا أسفين على التأخير وعلى فكرة ده مش اهمال او كسل بس فعلا الايام اللى فاتت كنا كلنا مشغولين جدا وبجد البلوج وحشنا وان شاء الله مش هنتأخر تانى . ثانيا يمكن انا كنت بحاول وانا بكتب المواضيع اللى فاتت انها تكون مواضيع عامة بس اسمحولى اكتب المره دى عن تجربة شخصية انا عيشها بقالى فترة ولسة مكمل فيها. يمكن اللى متابع البلوج معايا من زمان يعرف انى دخلت مكان معين غصب عنى وهقضى فية سنة كاملة انا مش هقدر اكتبه بوضوح عشان المشاكل وعشان الموضوع ده حساس جدا بس انا واثق فى ذكاء اصدقاء حدوتة وعارف انهم هيفهمونى. انا لما عرفت انى داخل زعلت جدا بس قلت تجربة وأكيد هتعلم منها بس مكنتش متخيل اللى بيحصل جوة !!! انا مش هحكى تفاصيل بس الاجمالى ان المكان ده عبارة عن منظومة من (التهريج المنظم) الكلمة دية انا سمعتها اول ما دخلت . الاول مكنتش فاهمها بس بعد كده فهمت . عارفين انا حاسس انى عايش فى فيلم وكل اللى فية بيمثلوا على بعض وكلهم عارفين ان ده تمثيل وانه كدب بس مجبرين انهم يكملوا وبما انى اصغر واحد فى المنظومة ديه ذى الكومبرس يعنى مالوش اى قيمة فالكل ( بيحط عليه ) مهو الحيطة المايلة . يمكن لو بتعلم حاجة او بستفاد حاجة او هما بيستفادوا منى بحاجة مكنتش زعلت بس اهو وقت وبيضيع من العمر اكتر ما هو ضايع !!! بس الواحد لازم يقول اللى ليه واللى عليه انا برضه اتعلمت شوية حاجات ذى الكدب – الجبن – انك تعامل اللى قدامك بحترام مع انك مش بتحترمة وهو عارف كده بس عادى هو عارف انه مش محترم وعارف انك عارف كده بس مش قادر تتكلم والعملية ماشية وكل ما تكلم حد يقولك حاول تخلص السنة بتاعتك من غير مشاكل . انا سمعت كذا تفسير للى بيحصل هناك بس اكتر تفسير عجبنى ان الغرض من الموضوع كله احتواء طاقة الشباب يعنى الواحد بيبقى طالع من الكلية كله احلام وطاقة عامل ذى القنبلة يخش جوة يا باشا يادوب شهرين تلاتة يكون اتظبط هناك بيعملولك فسسسسسس فتطلع من جوة مالكش نفس تعمل اى حاجة . بس هنعمل اية اهى برضه تخليص ذنوب ملحوظة : لو سمحتوا وانتوا بتكتبوا التعليقات بلاش تقولوا احنا بنتكلم على اية وذى ما فهمتونى انا هفهمكم .

انا مش خروف

كل ما امشى فى حتة الاقى راجل ماسك عصاية كبيرة وقدامة يجي 100 خروف !!! واحد هيقولى عادى العيد الكبير قرب وكل سنة وانت طيب ........ وانت طيب يا سيدى ....... انا بقى لما بشوف المنظر دة بفكر فى الخرفان اللى ماشية لاعارفة هى رايحة فين ولا هيحصلها اية !!! هيرد عليا نفس الواحد ويقولى ماهى خرفان وكام يوم وتندبح عادى يعنى .......... ياسيدى اصبر عليا وانت هتفهم انا لما بشوف المنظر دة بفتكر حالى وحال الجيل كلة اقولكم انا قصدى اية .............. لو بصيتوا لحياة معظم الشباب من الطفولة لحد دلوقت هتلاقوا التسلسل الاتى:::::::::: من اول الولادة لحد ابتدائى بتبقى كلها عيال حتى الواحد ملوش ذكريات فى الفترة دية....................تروح الاعدادى تسأل اى حد عايز تطلع اية يبص لأمة وابوه الاول وبعدين يقولك يا مهندس يا دكتور يا ظابط وكأن مفيش مهن غير دول فى البلد............... اما الثانوى ده موضوع ثانى الواحد يا عينى يفضل يذاكر ويدح عشان يجيب مجموع يدخلوا كلية من كليات القمة ويا عالم بعد ما يجيب المجموع التنسيق هيودية انهو كلية فى انهو بلد.................................نخش الجامعة يا باشا تلاقى الموضوع اتغير خالص نسبة السقوط فى اول سنة فى مختلف الكليات رهيبة فتلاقى الطالب اللى كان لسة جايب فوق الــ %90 طالع بــ 3 ضعيف و 2 ضعيف جدا ولما يبدأ التخصص تلاقى الطلبة بتدخل القسم اللى فى عدد كبير عشان تبقى مع الزحمة وخلاص!!!!!!!!!!!!!!!!!! ويبدأ بقى الاختلاط ثم الارتباط ثم الفشل ثم محاولة الخروج من الفشل ثم استمرار الفشل وبدأ استيعاب الواقع وهنا بقى بيتقسم رد الفعل::::::::::::::::::::::::::::: - مجموعة بيجيلها احباط شديد وساعات بتوصل لدرجة المرض النفسى ------------مجموعة بتصلى و تقرب لربنا وساعات بتوصل لدرجة التطرف . مجموعة بتقلب معاها بلامبالاة يعنى بتبقى مش فارقة معاها حاجة خالص --------------- مجموعة بتضرب بانجو و بتحشش يمكن بتلاقى فى المخدرات حاجات احلى من الواقع ------------ -مجموعة اخيرة ودول عددهم قليل جدا دول اللى بيحاولو يفكروا فى المستقبل ويلاقوا لنفسهم مكان فية . بعد الكلية تبدأ رحلة البطالة وانتم عارفين الباقى طبعا!!!!!!!!!!!!!!!!!!!!! انا عارف ان اللى انا قلتة دة مبيطبقش عل كل الناس بس الاغلبية بيحصلهم كدة عشان كدة انا عايز كل واحد فيكو يفتكر كويس هو خد كام قرار فى حياتة بدون ضغوط ولا تاثير من حد وكام مرة مشى مع الخرفان من غير ما يفكر وبعد ما تفتكر هتعرف انا قصدى اية وانك لازم تبص لحياتك الفترة الجاية بطريقة مختلفة عشان كدة ليكن شعارنا فى الايام القادمة انا مش خروف

خمسة ايمان

كل سنة وانتم طيبين ورمضان كريم ...............وبمناسبة رمضان والجو الايمانى اللى بنعيشه قلت اتكلم فى موضوع يناسب الوقت ده ونريح شوية بقة من الاختلاط والارتباط والمشاكل اللى انتم عارفينها انا هتكلم عن القرءآن على فكرة انا مش هخطب بس هدردش شوية . قريت مرة ان كل دين ليه معجزة اتعملت والناس شافوها فى وقتها اما الاسلام فمعجزته باقية لحد يوم القيامة لان معجزته هى القرأن . طبعا احنا عارفين ان القرأن كلام ربنا وانة كتاب عظيم وكل يوم العلماء بيكتشفوا فيه حاجات جديدة بس هل احنا حاسيين بده بجد؟ يعنى مثلا اغلبنا فى رمضان بيختم القرءان مرة على الاقل بس كام واحد فينا بيقرا بتمعن وبيحاول يفهم ويحس بالكلام ؟ يعنى فى بداية الاسلام كانت الناس بتسلم عشان سمعت اية واحدة وحست ان الكلام دة قوى قد ايه وانه مستحيل يطلع كلام بشر عادى وكان الكفار بيحاولوا يقلدوه ومش عارفين ولحد دلوقتى ناس كتير فى الغرب بيدخلو الاسلام عشان سمعوا اية وحاسوا انه كلام عظيم !!!! احنا فين بقة من كل دة هقولكم حاجة ناس كتير مننا لو سمعوا كلام اغنية او قروا بيت شعر حلو يتأثروا اوى وممكن ناس تدمع من الكلام طب اشمعنة!!!!!!!!!!!! طبعا انا مبقارنش بس انا بدى مثال عشان اسهل الموضوع عارفين المشكلة فى اية ؟ فى اللغة العربية بتاعتنا احنا لغتنا رايحة فى داهية من العامية الى عامية العامية لحد مانسينا اللغة الاصلية اللى احنا المفروض نعيش بيها ودة سببه حاجات كتيرة ذى الاعلام والتعليم وتاثير الغرب المهم ان احنا وصلنا لدرجة ان اللغة العربية بقت تقيلة علينا اوى اوى......... فنيجى نقرأ منفهمش وتعودنا على كدة خلاص وبنقول لنفسنا دة كلام كبير واحنا بنقراه عشان الثواب وكل حرف بحسنة وكدة يعنى مع ان فهم الكلام ده مهم جدا عشان كدة عايزين نعمل حاجة سوى فى رمضان دة كل واحد بعد ما يخلص الموضوع دة ينوى على انه كل يوم على الاقل ربع ساعة يفتح المصحف ويحاول يفهم المعانى ويستطعم الكلام وصدقونى هتحسوا انكم بتشفوه لاول مرة وبقد ايه ان الكلام ده حلو وان لو جمعوا كل شعراء العالم مش هيعرفوا يكتبوا ولو اية بالجمال ده جربوا وقولولى النتيجة وادعولى............

أريد حــلاً

كنت قاعد مع اتنين صحابى من كام يوم حسيت انهم مش مبسوطين , اول واحد قالى انه لسة واخد بومبة محترمة من البنت اللى قعد يحبها 4 سنين !! قلتله هو انت مبتتعلمش يابنى احنا مش لسة متكلمين فى موضوع الارتباط ده فى الموقع عندنا من كام اسبوع ؟ والناس يا عيني فضلت تهاتي لحد ما صوتها اتنبح يعنى مفيش فايدة فيكوا خالص المهم فضلت اديلو كلام فى جنابة لحد ما صاحبي التاني قالى خف على الراجل شوية هو مش غلطان دة كان داخل فى الموضوع بجد بس هى اللى مصبرتش . وعلى فكرة حتى لو كانت صبرت وكانو كملو مع بعض كانت المشاكل هتذيد عن كدة ويمكن مكنوش قدروا يستحملوا بعض اساسا (ملحوظة: صاحبى التانى لسة متجوز من كام شهر) قلتلة تعلالى بقة وانت مالك انت كمان فى اية؟ قالى مفيش الجواز حلو بس الحياة صعبة والمصاريف عالية والعملية بقت على الاخر........ بصتلهم بقرف وقلت هو يوم نكد من اوله لا المرتبط مبسوط ولا المتجوز جديد مبسوط ولا اللى مكبر دماغه وعامل عبيط مبسوط !!!!!!!!!!!!!!!!! من ساعتها وانا بفكر هو اية اصل المشكلة؟ وفين دور الاهل؟ يعنى لو الواقع دلوقتى بيقول ان 95% من الشباب ميقدروش يفتحوا بيت قبل الـــ 30 ليه الاهل مينصحوش ولادهم . يعنى الاب يقعد مع ابنه وهو داخل الكلية ويقوله يا حبيبى اديك شايف البلد ظروفها ايه وحال الشباب فيها ايه حاول تركز فى مستقبلك ومتدخلش نفسك فى اى علاقة لانك مش هتقدر تكمل فيها وكل ام تقعد مع بنتها وتفهمها ان الشاب الجاهز للجواز دلوقتى غالبا هيكون اكبر منها بـــ 10 سنين وان زمايلها اللى هتقابلهم فى الكلية متحولش تفكر فى اى حد منهم لانهم بالبلدى خارج نطاق الخدمة!!!!!!!! والسؤال التانى لو حد لقى اللى تصبر عليه وبدأ يعافر ولقى نفسه ممكن يتجوز بدرى شوية بس الجوازة اللى هى حتة لقمة تشبعنا وعش العصفورة يكفينا يتجوز وخلاص ولا يستنى لحد ما يبقى جاهز تمام ويدخل مستريح ومش مهم ساعتها هو عنده كام سنة. وبالنسبة للبنت لما تتخطب لشاب اكبر منها بــــ 8 , 9 سنين ده يدايقها فى حاجة ولا عادى السن مبيفرقش؟ اسئلة كتيرة...........................بس معلش ادينا بنفضفض

يلا نحلم

فاكرين لما كنا صغيرين , كانت أحلامنا دى ملهاش حدود . كان سهل جدا مثلا انك تطير او تتكلم مع الحيوانات او تطلع على اى كوكب يعجبك او حتى تكون ظابط و دكتور فى نفس الوقت ... عادى بس احلامنا دى بقت بتقل كل ما نكبر و بقت ليها حدود او يمكن مابقتش موجودة اصلا .ليه؟ انا شايف ان احنا بقينا خايفين من الواقع , تفتكرو انه بقى خلاص مالوش لازمة نحلم؟

بتحــب الكوســة ؟؟

لأ دى مش عزومة على الغدا ... انا قصدى الكوسة التانية اللى مش بتتبلع . يعنى مثلاً حضرتك واحد محترم عنده 10 كيلو شهادات , رحت تقدم فى شغل و اذ لقيت واحد (محترم برضه) استلم الوظيفة علشان معاه 10 كيلو كوسة. هيكون احساسك ايه ؟ هتكون الدنيا سودا فى عنيك على طول ولا هتقول اكيد الحال هينصلح ؟

كان طيب

على فكرة انا طيب , بس اوعو تقولو لحد , اصل تقريبا كدة الطيبة لها معنى تانى ....ايوة صح .. الهبل قولتلهم ان انا طيب بس مش اهبل قالولى ما ده هو ده , هو صحيح ده هو ده ؟ ولا لسة فيه فى الدنيا دى مكان للطيبة و لسة فيه ناس بتحب و تحترم الناس الطيبين

مــا عليــنــا

ما علينا... و انا مالى ... فكك ... كبر دى كلمات ليها معنى واحد : انا ماليش دعوة , تولع الدنيا كلها , حتى لو الموضوع يخصنا , احنا برضه ساعتها بنقول ما علينا . تفتكرو ده ليه ؟ هل علشان احنا بنهرب من المشاكل ؟ ولا علشان احنا مش قد المشاكل ؟ ولا علشان احنا بقينا مع الوقت سلبيين ؟

اليوم المفـتــوح

عايزكو تركزوا قوى قوى قوى فى الموضوع ده .... خلينا نتخيل مع بعض ....افرض مثلا .... مثلا يعنى .... انك مهما عملت من ذنوب مش هتتحسب بس ليوم واحد... خلى بالك ... ليوم واحد بس , عايزك بقى تقولى هتعمل ايه؟؟؟ و خلينا نسأل نفسنا : هو احنا مش بنعمل الغلط عشان خايفين ولا عشان مقتنعين ولا ايه بالظبط؟

انت مرتبط؟

سؤال بيتسئل فى الجامعة عادى ... الارتباط بقى حاجة عادية مين فينا مرتبطش او مشفش واحد صاحبه ارتبط مع ان 99% من حالات الارتباط بتفشل (وهنا يكمن السؤال) انت لية بترتبط اساسا ؟ يا ترى كبت ؟ مهو مفيش اختلاط قبل الجامعة يعنى الشباب محرومة ويا ترى الشعور اللى الواحد بيحس بية ده حقيقي ولا احلام مراهقة وبعد الموضوع مايفشل كالعادة الواحد بيعرف ينسى بسهولة ولا الحكاية بتعلق معاه شوية؟ ولا بتفضل معاه على طول , ومين اللى بيتعب اكتر الولد ولا البنت؟ ....... نيجى بقى للسؤال البايخ : طب لما الواحد عارف ان كدة كدة الموضوع مش هيكمل كان لزمته ايه من الاول وجع القلب والبهدلة , ولا الحكاية تستاهل ولو كان الواحد بيحب بجد , الاحساس اللى هيحس بيه اجمل شىء ممكن يحسه.....!!!!!

طاطى

معظمنا كان بيلعب وهو صغير لعبة اسمها اولها جاني , واللى مش عارف اللعبه هي فكرتها ان واحد بيقف وقفة الركوع والباقي بينطو من فوقيه وتستمر اللعبه , ولكن من غير ما ندخل في تفاصيل اللعبه كان فيه كلمة بيقولها اللى بينط من فوق صحبه وهي البصله بتاكل مش , يعنى اذا رفعت راسك واللى فوقك بينط من حقه انه يضربك علي قفاك……ولكن هل ده في اللعبة بس ولا في الحياة بشكل عام , يعنى تفتكرو انه لازم دايما اللى فوق يدوس ع اللى تحت ؟

على ما تــــُــفرج

انا هدخل فى الموضوع على طول لانه زاد عن حده و بدأ يبقى شئ اساسى فى حياة الشباب , انا هكلمكو عن القهاوى , فيه ناس هتقول ان الراجل ده هيسمعنا الكلام اياه( ولابد ان نستغل الوقت فيما يفيد و استصلاح الصحراء و بناء مستقبل افضل ) و الكلام الممل ده , انا واحد من الناس بيموت فى قعدة القهوة و كييف طاولة , بس الغريب بقى ان القهوة ما بقتش لمة صحاب و طاولة و واحد شاى و خلاص , الشباب بدأت تطور قعدة القهوة عشان تبقى مسلية اكتر , بقو دلوقتى بيتابعو كل الماتشات اللى فى العالم مش فى مصر بس , و بقت القهوة مكان مالوش حل للعب ستيميشن , ده انتو ممكن تلاقو 3 شباب زى الورد قاعدين بيدورو على رابع عشان يبدأو اللعب , و بدأو كمان فى القهاوى النضيفة يعملو باند شرقى و غربى و بدل الكراسى كنب سفنج عشان الواحد يقعد هو و "اللى معاه" على راحتهم و طبعا ممكن تفرد الكنبة و تاخد راحتك اكتر "على ما تفرج" , على فكرة كلامى ده مش هزار ده جد اوى , يظهر كدة ان الشباب هيفضلو على القهاوى و ع الكنب ابو سفنج كتير "على ما تفرج" ده معنى كلمة على ما تفرج بالنسبة لمجموعة من الشباب يا ريت تقولولى معناها ايه بالنسبالكو

و بعدين

الحال هو هو , مافيش جديد مين فينا سأل نفسه السؤال ده؟ حاولت! حاول و اسأل نفسك و اخرج من مكانك و بص للبلد من برة. سؤال بسأله لنفسى على طول و له عدد لا نهائى من الاجابات عشان كل واحد مننا بيرسم سكة لنفسه و حلم نِفسه يحققه, بس نقدر نقول ان كلنا مشكلتنا واحدة يعنى اجابة السؤال واحدة !!!!!!!! مستنيين تعليقاتكو

عالم خنيقة

فيه ناس بتفرح اوى لما تلاقى انك فاهمهم بس فيه ناس تانية بتتخنق من ده و بيبعدو عنك , ايه رأيكو فى الموضوع ده مستنيين تعليقاتكو