شــاعــر الحــــب

بصراحة انا زهقت من السياسة والحكومة والعلاوة والكلام ده كله , انا عايز اخد اجازة اريح دماغى واريحكم معايا , فى البوست ده احنا هنتكلم عن شاعرى المفضل نزار قبانى , اللى انا شخصيا بعتبره من اكثر الشعراء رقة ورومانسية , وده بغض النظر عن اختلاف الكثيرين معه لجرئته فى التعبير , او كلماته اللى يراها البعض جارحة او بزيئه , بس اللى منقدرش ننكره ان لكلام هذا الرجل سحر خاص

انا لما فكرت اكتب عنه قلت كتير من القصائد اللى كتابها معروفه لينا وكتير منها اتلحن واتغنى , عشان كده انا اخترت بعض الرسائل الخاصة اللى كتبها لنساء كانت فى حياته , تعالوا نشوف ونتعلم من شاعر الحب ..... ازاى نحب ؟ وازاى نعبر عن الحب ده ؟

1-

لم اكن يوما ملكا , ولم انحدر من سلالات الملوك , غير ان الاحساس بأنك لى يعطينى الشعور

بأنى ابسط سلطتى على القارات الخمس , واسيطر على نزوات المطر , وعربات الريح

وامتلك الاف الفدادين فوق الشمس , واحكم شعوبا لم يحكمها احد قبلى

والعب بكواكب المجموعة الشمسية , كما يلعب طفل بأصداف البحر

لم اكن يوما ملكا , غير ان مجرد احساسى بأنك تنامين فى جوف يدى

كلؤلؤة كبيرة فى جوف يدى , يجعلنى اتوهم

بأنى قيصر من قياصرة روسيا , او انى كسرى

2-

عندما تضعين رأسك على كتفى , وانا أسوق سيارتى

تترك النجوم مداراتها , وتنزل بالألوف

لتتزحلق على النوافذ الزجاجية

وينزل القمر , ليستوطن على كتفى

3-

كلما رأيتك , ايأس من قصائدى

إننى لا أيأس من قصائدى إلا حين أكون معك

جميلة انت , الى درجة أننى حين أفكر بروعتك , الهث

تلهث لغتى ....... وتلهث مفرداتى

4-

وعدتك ان ابقى محتفظا بوقارى

كلما ذكروا اسمك امامى

ارجوك . ان تحررينى من وعدى القديم

لأنى كلما سمعتهم , يتلفظون باسمك

أبذل جهد الانبياء , حتى لا اصرخ

5-

عندما اسمع الرجال , يتحدثون عنك بحماسة

واسمع النساء , يتحدثون عنك بعصبية

أعرف كم انت جميلة

6-

أرجوك أن تحترمى صمتى , إن اقوى أسلحتى هو الصمت

هل شعرت ببلاغتى عندما أسكت ؟

هل شعرت بروعة الاشياء التى أقولها ؟

عندما لا أقول شيئا

7-

عاد المطر , يا حبيبة المطر

كالمجنون أخرج الى الشرفة لأستقبله

وكالمجنون , أتركه يبلل وجهى , وثيابى

ويحولنى الى إسفنجة بحرية

المطر يعنى عودة الضباب , والقراميد المبللة

والمواعيد المبللة , يعنى عودتك ..... وعودة الشعر

أيلول .... يعنى عودة يدينا الى الالتصاق

فطوال أشهر الصيف .... كانت يدك مسافرة

8-

أمارس فى هذه الايام , هواية خطيرة

وهى ان اتحدث عنك الى النساء

لذة كبيرة .... ان أزرعك فى عيون النساء

فى فضولهن ... فى دهشتهن ... لذة ما بعدها لذة

ان أضرم النار فى ثياب الجميلات

واتفرج بفرح شيطانى ... على الحرائق المشتعلة فيهن

9-

لا انا استطيع ان افعل شيئا

ولا انت تستطعين ان تفعلى شيئا

ماذا يستطيع ان يفعل الجرح بالسكين المسافرة فيه ؟

10-

بعد دقائق سيرحل عام كنت سيدته ومليكته

فيا سيدتى ومليكتى

لا اريد من الله ذهبا ولا قصورا .... لا اريد ديباجا ولا حريرا

اريد منه فقط ......... ان يبقيك حبيبتى

11-

كلما مر صوتك البنفسجى , من اسلاك الهاتف

وصبح على ....... أتحول الى غابة

12-

تسألين : ماذا فعلت فى غيابك ؟

غيابك لم يحدث , ورحلتك لم تتم

ظللت انت وحقائبك قاعدة على رصيف فكرى

13-

لن يكون ذهابك مأساويا كما تتصورين

فأنا كأشجار الصفصاف

أموت دائما , وأنا واقف على قدمى

14-

لست نادما على اعوامى الضائعة معك , فأنا لا احترف الندامة

ولست آسفا , لأننى لعبت على حصان خاسر

إن المقامرة على النساء ... كالمقامرة على الخيول

غير مضمونة النتائج .... ولا تصدق فيها النبوءات

فكل رجل ينتقى فرسا ... وكل امرأة تنتقى جوادا

ولا يربح فى نهاية الشوط , سوى النساء

15-

هذه هى رسالتى الاخيرة , ولن يكون بعدها رسائل

هذه آخر غيمة رماديه تمطر عليك ولن تعرفى بعدها المطر

هذا آخر النبيذ فى إنائى ... وبعده ...لن يكون سكر ولا نبيذ

هذه آخر رسائل الجنون ... وآخر رسائل الطفولة

ولن تعرفى بعدى , نقاء الطفولة , وطرافة الجنون

لقد عشقتك .... كطفل هارب من المدرسة

يخبىء فى جيوبه العصافير .... ويخبىء القصائد

كنت معك ... طفل الهلوسة , والشرود , والتناقضات

كنت طفل الشعر , والعصبية

اما انت ... فكنت امرأة شرقية الشروس , تنتظر قدرها

فى خطوط فناجين القهوة .... وملاءات الخاطبات

ما اتعسك يا سيدتى , فلن تكونى فى الكتب الزرقاء بعد اليوم

ولن تكونى فى ورق الرسائل , وبكاء الشموع , وحقيبة موزع البريد

لن تكونى فى عرائس السكر , وطيارات الورق الملونة

لن تكونى فى وجع الحروف , أو فى وجع القصائد

فلقد نفيت نفسك خارج حدائق طفولتى

وأصبحت نثرا .........

شلوت سيادتك دفعة للأمام

الى كل الاخوة والاخوات المدونون والمدونات , بما اننا كمدونين بنعتبر صحافة المستقبل من وجهة نظر الكثير من رجال الاعلام , وده طبعا مش نفس رأى رجال الحزب والحكومة اللى بيشوفونا رجس من عمل الشيطان !!! وده طبعا بسبب الازعاج والدوشة اللى بنعملها فى البلد تقريبا كل يوم , انا بسمع كلام كتير اليومين دول عن المدونات واغلبه بيصب فى جهة واحدة وهى الرقابة على المدونات وده طبعا بحجة ان فى الكثير من المدونات بتتجاوز الخطوط الحمراء !!! وانا بصراحة مش فاهم ايه هى الخطوط دى ؟ ومين اللى رسمها ؟ وعلى اساس ايه ؟ ومين عطاه الوصاية عشان يحدد الخطوط اللى نتكلم فيها ؟ وبعدين هما مش واخدين بالهم ان الحرية اللى بتتمتع بيها المدونات هى السبب فى نجاحها وانتشارها فى الفترة الاخيرة , اكيد فى بعض التجاوزات ايه المشكلة , عادى مش معنى كدة انك تقفل الباب على كل المدونات التانية وإلا تبقى حضرتك بتتلكك بقة !!! ثم ان الحكومة عندها اكتر من 20 صحيفة ومجلة وقناة تليفزيونية تقدر من خلالهم تقول اللى هى عايزاه وتحاول تقنع الناس بأفكارها ده لو عندها افكار , لية بقة خايفة من شباب عندهم صفحة على النت بيكتبوا فيها افكارهم !!! وعشان كل واحد مننا يعتبر رئيس تحرير مدونته , انا بقى هقولكم الطريقة اللى توصلك لرئاسة تحرير احدى الجرائد القومية !!! انا بتكلم بجد الموضوع مش صعب ولا حاجة انت بس لازم تركز وتسمع كلامى كويس , اول حاجة ميبقاش دمك حامى اوى وكل حاجة تاخدها على صدرك , لازم تبقى هادى وريلاكس عشان تقابل المصايب بصدر رحب , وبعدين لازم تعرف ان الكلام اللى هتكتبه هيكون دائما موجهه وهيكون من دماغ غير دماغك , يعنى انت هتكون من الاخر كيس جوافة واللى مطلوب منك اعملة بدون تفكير , لان التفكير فى بلدنا اليومين دول بقى خطر , وخد بالك لما تبقى مبتفكرش ده مش عيب انت كدة بتحافظ على نسيج الامة من التطرف والفتنة اللى الناس اللى بتفكر عايزة تعملها !!! تانى حاجة يا سيدى لازم تطنش على حاجات كتير بتحصل فى البلد , يعنى مثلا وزير اتقبض عليه فى تهم فساد , عادى ولا كأنك سمعت حاجة , مسئول فى الحزب طلع بياخد رشوة , اعمل عبيط ولا يهمك , كل دى حاجات صغيرة متفرقش معانا خالص !!! نيجى برضة لحاجة مهمة , لو واحد من المعارضة او من اى مصيبة مش عاجب الحكومة فى حاجة , لازم تبقى انت مصحصح وفايق للحاجات دى , فمن غير ما حد يطلب منك ابدأ اشتغل عليه وطلع الدفاتر القديمة بتاعت الراجل ده ولو طلع شريف ومعندوش دفاتر اتبلى عليه وسوء سمعته عادى كل ده فى مصلحة البلد العليا !!! تالت حاجة فى اى مناسبة ذى اللى احنا فيها دى مثلا , خليك مجامل الى درجة النفاق , خليك ذوق الى درجة الكذب , خليك لطيف الى درجة الضعف , من الاخر خليك لامؤخذة قُــرنــى !!! انا مش عايزك تزعل لان كل اللى انت بتعمله ده بيصب فى مصلحة البلد العليا , انا طبعا مش هقولك تكتب ايه اكيد انت عارف احسن منى , بس برضة عشان اللى ميعرفش انا هقول بعض العينات , مثلا تقول يا سيدى شلوت سيادتك دفعة للأمام , شخبطة سيادتك تخطيط لحياتنا , صوابع سيادتك اشارة لمستقبلنا , قفا سيادتك ماضينا السعيد , كل ده كلام عادى ولا يتعدى حدود المجاملة الصادقة اللى من شأنها التعبير عن مكنون ما بداخلك من مشاعر واحاسيس مكبوتة , ايه رأيك فى الكلمتين دول اظن حاجة اخر حلاوة , انت بقى كل كام يوم لازم تفقعلك كام جملة من الجامدين دول عشان تعرف تاكل عيش فى البلد دى !!! كل واحد فيكوا يفكر فى الكلام ده ويستعد لرئاسة تحرير جريدة قومية , بس يا رب محدش ينسانى بعد ما يتظبط , معلومة اخيرة انا مش مسئول عن ضميرك لو صحى فى اى وقت وحاولت تغير اى حاجة من الحاجات اللى انا قولتها لانك ساعتها هتروح غالبا تمسك رئاسة تحرير سجن ابو غريب , وانت حر هههههههههههههههههههههه

من النهاردة مفيش ريس ..... انا الريس

اول حاجة انا اسف على التأخير ... بس فعلا مليش نفس اكتب حاجة اليومين دول كل حاجة فى البلد بقت تسد النفس !!! وكنت ناوى اريح نفسى من الكتابة والتفكير شوية لحد من كام يوم كنت بتكلم مع واحد صاحبى والكلام خدنا وطبعا اتكلمنا على اللى بيحصل فى البلد وكالعادة انا كنت بتكلم بقرف بسبب الحكومة والحزب الوطنى والطوابير والعشوائيات , المهم جبت القديم والجديد وقلت كل اللى فى نفسى , بصيت على صحبى لقيته بكل هدوء بيقولى انا مش عارف انت عايز ايه , الريس عامل اللى عاليه احنا اللى كل يوم عددنا بيذيد ومبنشتغلش بزمة والفساد ده من الوزراء والناس اللى تحت الريس وهما دول اللى بيبلغوه ان كل حاجة تمام وإن الشعب عال العال وإن جمال مبارك هو انسب واحد يحكم البلد بعد الرئيس مبارك لانه والكلام هنا لصاحبى شبع خلاص وده احسن ما حد جعان يمسك البلد !!!!! انا كنت فاكره بيتريق لكن لقيته بيتكلم بجد , قلتله انت مستوعب اللى بتقوله ومقتنع بيه ؟! قالى اه !!!! الكلام بتاعه تقريبا ذى الكلام اللى بقه بيتقال فى بعض الجرائد والبرامج لما بيجيبوا حد يتكلم عن اى مشكله يفضل يشتم فى الحكومه بعدين فى الاخر يقول انا ببعت رساله للسيد الرئيس وبطلب منه يتدخل فى حل المشكله !!!!! وبعدين الكلام ده سمعته من واحد تانى صاحبى برضة , تقريبا انا كل صحابى منضمين للحزب الوطنى من ورايا !!! فضلت افكر يمكن اكون انا الغلط ومش شايف الموضوع صح ويكون كل البلاوى اللى بتحصل فى البلد دى بسبب الشعب , على اساس إن هما بيحكموا صح بس احنا اللى مش عارفين نتحكم !!! بس يا جماعه الفساد بيبدأ من فوق ولو اتحل من اعلى مستوى كل المستويات اللى تحت هتنضف , طبعا احنا كشعب عندنا عيوب بس ده ميعفيش القيادة من المسؤلية , وبعدين نقطة ان الناس اللى حوالين الرئيس هما اللى بيوصلوا الصورة غلط مش داخلة دماغى لان انا كرئيس الناس مخترانى بحرية ومصدقية وشفافية وفوزية والحاجات دى !!! المفروض ابقى متلاحم مع الناس ولو حتى اخدنا فى اعتبارنا المسائل الامنية اكون بشوف الجرايد المعارضة , بتفرج على البرامج الحوارية اللى بتجيب مشاكل الناس , مش نايم فى القصر بتاعى وسايبها تخرب !!!! وبعدين الوزراء دول انا اللى معينهم والمفروض اتابع كل وزير ماشى اذاى , وفكرة اننا المفروض نصبر شويه وفات الكتير اللى هو 28 سنة وما بقى إلا القليل ده ضحك على الدقون وكذب رسمى , سيدنا عمر بن عبد العزيز اللى خلى الامة الاسلامية فى عصرة من اعظم الامم وده بالعدل والحق اللى انتشر على اديه وكان بيت المال مبيتقفلش من كتر الفلوس اللى فيه , انتوا عارفين هو حكم كام سنة وخلى الامة الاسلامية بالشكل ده , حكم سنتين ومات !!! وبالنسبة للناس اللى مبتحبش الامثلة دى لو خدنا بلاد ذى ماليزيا وايرلندا والارجنتين وقسنا اللى حصلها فى ربع قرن هنعرف الحقيقة , وانا مقلتش امريكا ولا اوروبا انا بقول بلاد كانت نامية وبدأت النمو الاقتصادى تقريبا معانا شوفوا هما بقوا فين واحنا فين !!! وموضوع جمال مبارك انا مش هتكلم فيه عشان انا ضغطى عالى وصحتى على قدى , المهم كل الكلام ده مدخلش دماغ صاحبى وقالى لو انت دلوقتى بقيت رئيس الجمهورية ورينى هتعمل ايه ؟!! السؤال دخل دماغى ومن ساعتها وانا عايش دور الرئيس وعمال اشيل وزراء وافتح مشاريع واعمل قوانين واقفل اقسام شرطة , يعنى من الاخر مبهدل الدنيا !!! انا عايز كل واحد فيكوا ياخد نفس عميق ويعتبر نفسه رئيس الجمهورية ويقولى ايه القرارات اللى هيخدها , على فكره انا بتكلم بجد مبهزرش حط نفسك مكان الريس وقولى هتعمل ايه

المحلة ..... ثورة العشوائيات

كتير مننا تابع اللى حصل فى المحلة يوم 6 ابريل واللى مستمر لحد وقت كتابة هذة الكلمات , محللين كتير بيحاولوا يفسروا اللى حصل وكل البرامج تناولت الموضوع من وجهة نظرها .... واغلب اللى اتقال ان شوية بلطجية خرجوا وسط العمال وعملوا التخريب ده , وان ده مش من سمات الشعب المصرى ولا من اخلاقه ودول شويه عيال , وفى يد خفية بتلعب من ورا الستار وبتحرك العيال دول , وهدفهم تخريب البلد والاضرار بالمصالح العليا والاقتصاد القومى والكلام الكبير ده , ماشى انا مع كل ده بس ما نيجى نشوف اللى حصل من زاوية تانية !!! احنا نمسك الموضوع واحدة واحدة ونفكر بالراحة .... طبعا اللى حصل ده ميرضيش حد وحرق المدارس والمحلات والعربيات ميعتبرش وسيلة للتعبير او احتجاج على الاوضاع مهما كانت صعبة , طب ممكن يكون فى يد خفية صحيح وهى اللى حركت العيال دى ؟!! انا شخصيا معتقدش لان الاخوان مظهروش اليوم ده خالص مع انى قلت انهم هيستغلوا الفرصة ويركبوا الموجة عشان يبانوا هما اللى واقفين ضد الفساد والظلم !!! بس ده محصلش والاخوان عملوا بيان وقالوا ان الاضراب حرية شخصية بس دة مش موقف الجماعة حاليا .... وانا مش شايف اى جماعة غير الاخوان على الاقل دلوقتى تقدر تحرك الشباب وتخليهم يتظاهروا او يخربوا , طب العيال دول لو فعلا محدش حركهم اليوم ده هما عملوا كدة لية ؟!! واذاى يوصلوا للمرحلة دى من العشوائية والتخريب والاستهتار بكل شىء !!!! انا شايف ان العيال دول مثال على الحالة اللى وصل ليها جيل كامل من الاهمال وعدم الاهتمام بمشاكلهم ومحاولة احتوائهم , احنا عارفين ان سن المراهقة ده من اخطر المراحل اللى بيمر بيها الانسان , وفى اوروبا وامريكا فى دكاترة نفسيين وظيفتهم الاهتمام بالشباب فى المرحلة دى ومحاولة توجيهم , احنا هنا عاملنا اية !!! سبناهم فى مواجهه مع البلد بكل مشاكلها , يعنى الواحد من دول طلع ملقاش اب عنده وقت يعلمه ويربيه صح ... لان الاباء دلوقتى شغالين اليوم كله عشان يدوب يعيشوا , ملقاش مدرسة محترمة ادمية يتعلم فيها , ملقاش مدرس يحترمه ويخده قدوه , ملقاش نادى يمارس فى رياضة ويطلع الطاقة اللى جواه , ملقاش بيت او حى او شارع نظيف يعود عنيه على المناظر الجميلة , ملقاش برامج اعلامية محترمة توعيه وتثقفه وتاخد بأيده , ملقاش حاجة خالص غير فقر وقهر وفساد وعشوائيات !!!!! احنا بقة مستنيين من واحد ذى ده ايه , تكوين الشخصية ذى زراعة النباتات بتحتاج عدة عوامل , مينفعش نسيب الارض بدون اى رعاية او اهتمام وبعدين لما يجى وقت الحصاد ونلاقى الارض كلها شوك ونباتات شيطانية نستغرب ونقول ازاى ده حصل !!!! والدليل على كلامى ده ان العيال دول او الجيل ده بمعنى اصح ردود فعله عنيفة حتى فى وقت الفرح , يعنى لما مصر كسبت كأس افريقيا الدنيا اتقلبت وفى حوادث حصلت وناس ماتت وانا شفت بعينى بعد فوز مصر فى احد المباريات , لقيت عيال طالعة من القهاوى وسده الشارع وموقفة العربيات وخاربة الدنيا , انا خفت وقلت لما دول بيعملوا كدة وهما فرحانين , هيعملوا ايه لو حد زعلهم او استفزهم , وده فعلا اللى حصل بمجرد ما شافوا الامن المركزى اللى بيعتبر رمز للسلطة وسمعوا ان فى اضراب ومشاكل فى البلد هاجوا وكسروا كل شىء يقابلهم بدون تفكير !!!! وانا مش متفائل بالايام الجاية لان كل جيل بيطلع اسوء من الجيل اللى قابله يعنى المشكلة بتكبر وطبعا الحكومة مش فاضية للحاجات التافهه دى , انا مبديش مبرر للى حصل انا بس بوضح صورة شايفها يمكن اكون شايفها غلط بس نا فعلا خايف من اللى جاى

مـصـر بـلـد الامـن و لامـؤخـذة الامـان

قريت حكمه لسيدنا على رضى الله عنه بتقول"الغنى فى الغربة وطن والفقر فى الوطن غربة" فكرت كتير فى الجملة دى وحاسيت قد ايه الواحد ممكن يبقى غريب فى بلده !!!! كتير تسمع ناس وشباب بالذات يقعدوا يشتموا فى البلد ويقولوا انهم مستنيين اى فرصة عشان يمشوا ويشتغلوا فى اى حته تانية حتى لو زبالين بس يمشوا من هنا ..... طب لما تسمع حد بيشتم فى مصر بيبقى بيشتم ايه هل هو بيشتم الشوارع ولا الناس ولا الحكومة ولا بيشتم ايه بالظبط !!!! ولما يكون فى اى مناسبة وطنية وتلاقى الكل بينافق وبيغنى لمصر بيبقى بيغنى لمين او بمعنى اصح بيغنى على مين هل على الناس ولا للحاكم ولا بيركب الموجه وخلاص ..... كتير بيتكلموا عن الانتماء وده شعور بيتولد مع الانسان بس بيكبر وبينموا مع احساس المواطن بقيمته فى بلده وده اللى بيخليه ممكن يضحى بنفسه عشان البلد دى ..... بس هل ده بيحصل فى مصر الايام دى وللاجيال اللى طالعة دلوقتى احنا بقينا بنكره البلد واللى عايشين فيها واللى بيحكموها وبقينا حاسين بغربة ذى ما نكون ضيوف او ناس مجبرة تعيش فى مكان غصب عنها ومستنيه الفرصة اللى تخرجها من المكان ده !!!! والاحساس ده بيذيد كل يوم وكل جيل بيطلع بيحسوه اكتر وده لان الحياه من غير احلام ولا امل ولا امان بتبقى مستحيلة وده بالظبط اللى بيحصل معانا ..... الواحد وهو لسة طالب بتبقى احلامه كبيرة بيحلم يكون عنده عربية اخر موديل وفيلا بحمام سباحة ذى ما بيجى فى الافلام وبعدين بيحس ان العمليه وسعت منه فبيحلم بشقة واسعة وعربيه صغيرة فيلاقى العملية برضة لسة وسعة والاحلام تفضل تصغر و تصغر لحد ما يبقى الحلم الاساسى انك تكمل الشهر من غير ما تستلف او من غير ما حد يهينك ....... اما الامل فالكلمة دى الواحد مسمعهاش من زمان ولو اتكلمت مع اى حد بالصدفة هتلاقيه بيقول مفيش فايدة ولا امل فى ان اى حاجة تتغير والناس اللى قاعدين على قلبنا من اكتر من 25 سنة مش هيتغيروا إلا بمعجزة الاهية ........ وبالنسبة للامان فأنهو امان ده اللى هنتكلم عليه والناس مش لاقيه العيش الحاف اعتقد ان انا والناس اللى بتخش على المدونات عموما من الطبقة المتوسطة يعنى قادرين نعيش والحمد لله بس الطبقة المتوسطة دى قربت تنقرض ذى الديناصورات خلاص ..... الفقر بياكل فى الناس يا جماعة فى عائلات فى مصر بتعيش على مرتب 300 جنيه وفى اقل من كده طب الناس دى هتعيش ازاى بعد ما الحكومة سابت الحاجة تولع كده !!! احنا متوقعين ايه من شعب نصفه بقى تحت خط الفقر ....... الناس بتموت فى طوابير العيش وفى نفس الوقت ولى العهد السيد جمال مبارك بيتكلم على دخول مصر لمصاف الدول النووية !!!!! نووية مين وشوقية مين النظام مش عارف يحل المشاكل الاساسية لحياة البشر لا عارف يوفر اكل صحى ولا مياه نقية ولا هواء نظيف ولا حتى عيش حاف ....... انا كنت لسة بتكلم من كام يوم على تصورى لطريقة الحكم فى مصر انا شايف البلد بتتحكم يوم بيوم يعنى الريس بيصحى الصبح يفطر ويشرب الشاى ويقرا الاهرام وبعدين يسأل فى جديد النهارده ويقولوله لا يا ريس كله تمام والبلد على قديمه من ربع قرن !!!!! بس الوضع ده مش هيستمر كتير هو صحيح الشعب المصرى غلبان وصبور ومش بتاع مشاكل ولا انقلبات بس الفقر والجوع هيخلوا الناس تثور .... بس المصيبة ان لما تحصل الثورة دى مش هتصيب حد من اللى اتسببوا فيها لانهم هيكونوا هربوا وسابوا البلد تولع !!!!!! وربنا يستر على البلد وعلينا من ............ ثـــــورة الـجـيــــــاع

الضمير العربى ..... العجز العربى

اعتقد ان اغلبنا شاف اغنية الضمير العربى ... طبعا الاغنية حلوة ومأثرة وفيها مشاهد توجع اى حد يشوفها ... فى ناس لما شافت الاغنية بكت وفى ناس اتأثرت وفى ناس مقدرتش تكمل فرجة !!! لان الاغنية تجسيد للحاله اللى وصل ليها العرب مش هقول الفلسطينى او العراقى او اللبنانى لان احنا كعرب بيحصلنا كلنا كده بس بصور مختلفة !!! عشان كدة المفروض يسموا الاغنية العجز العربى بدل الضمير العربى لان اول احساس بيجيلك بعد ما تشوف الاغنية احساس بالعجز اطفال بيموتوا ... رجالة بتتعذب فى السجون ... ستات بتتبهدل وتترمل وبتغتصب قدام عنيك وانت مش عارف تعمل ايه !!! وفى نفس الوقت تلاقى اصحاب الجلالة والفخامة الحكام العرب بيجبروا الشعوب على التطبيع والتعايش السلمى !!! تخيلوا بقة لما تشوف الجيش الاسرائيلى داخل بدبابة على مدرسة ولا بيت فى ستات وعيال صغيرة والدبابة دى ماشية بغاز مصرى مدعم !!!!! اه والله مصر بتصدر الغاز لاسرائيل وبسعر اقل من سعره العالمى وبسعر ثابت لمده عشرين سنة شوفتم خيبة ذى خبيتنا !!!! تعرفوا ان امريكا بتضغط على الاعلام عندنا عشان ميقولش على الفلسطينى اللى بيموت او بيعمل عمليات فدائية جوة اسرائيل شهيد عايزين المذيع يقول سقط اليوم خمسين قتيل وليس شهيد حتى الشهادة مش عايزينا نخدها !!!!!! انتوا عارفين نسبة المخدرات ذادت قد ايه الكام سنه اللى فاتت ... الشباب بقة اليوم كله عايز يحشش ويشم عشان ميفكرش فى اللى بيحصل واللى مش قادر يعمل فيه حاجة..... انتوا عارفين انا بقول كدة ليه ؟ لانى يمكن من اكتر الناس يأس فى ان اى حاجة ممكن تتصلح بس حتى اليأس خلاص انا زهقت منه !!!! انا عايزكم تقولوا افكار نبدأ بيها يمكن متتنفذش ومحدش يعرف عنها حاجة بس كأننا بنفكر بصوت عالى يعنى احنا ممكن نعمل ايه او ايه اللى المفروض يحصل وانتوا لو فى اديكم القرار ايه اللى هتعملوه .... انا مبقولش ندخل فى حرب ونعادى العالم والغرب مع ان ده مش عيب لو دفاعا عن ارضنا وكرامتنا إلا لو حد معتبر اننا ملناش دعوة باللى بيحصل هناك !!!!انا مش عايز مظاهرات كفيانا كلام انا عايز فكرة او حلم ممكن يتحقق ... انا مثلا نفسى مصر تصرح بأنها مستعدة لتدريب عناصر من فلسطين على يد الصاعقة المصرية لتنفيذ عمليات جوة اسرائيل تخيلوا ده هيبقى رد فعله ايه احنا فاكرين الجيش الاسرائيلى لايقهر بس اديكم شفتوا حسن نصر الله عمل فيهم ايه مقدروش يعملوا معاه حاجة وهو كان لوحده وبعد الحرب الاعلام حاول يشوه صورته ويكرهنا فيه ويقولوا ده شيعى وخطره علينا ذى خطر اسرائيل !!!! انا عايز كل واحد بعد ما يخلص الموضوع يقولى فكرة ممكن تتنفذ يمكن نقدر نغير حاجة من اللى وصلناله

لو لم اكن مصرى لوددت ان اكون اسرائيلى

عنوان مستفذ ومقرف مش كده بس ايه المشكله يعنى ما كل حاجة حولينا بقت مقرفة ايه يعنى 100 ولا 150 فلسطينى يتقتلوا عادى ده بقه طبيعى واتعودنا عليه ...... وحتى الناس اللى بتتحمق وبتتكلم بيقولوا حماس هى اللى غلطانة وهى عارفة انها هتضرب صاروخ اسرائيل هترد بــ 50 يبقى ايه لازمته من الاول !!! و بيقولوا احنا مفيش حاجه فى ادينا شوفو قوتنا وشوفو قوتهم يعنى اى مواجهة مش هتبقى فى مصلحتنا وبعدين دى مش الحرب بتاعتنا وكل واحد اولى بأرضه !!! وفى ناس مستغربه وبتقول فى الغرب لو حد ضرب قطة ولا كلب ممكن يدخل السجن بس اسرائيل لو قتلت 500 واحد مش مهم ويقولولك دى ازدواجيه فى المعايير وفين الضمير العالمى وكلام كدة من اللى مبيتفهمش !!! انا بقه شايف الموضوع بطربقة تانيه خالص ..... العالم كله دلوقتى بقه مادى وكل حاجة فيه بقة ليها ثمن حتى الشعوب ليها ثمن وقيمه وعلى حسب قيمتك هتحدد اهتمام العالم بيك ..... وانا بقولها بكل شجاعة جزمة الاسرائيلى بــ 100 مواطن عربى وديه حقيقة حتى لو مش عايزين نصدقها !!! الجمله وجعتكم اوى صح ...... انتوا عارفين من حوالى اسبوعين ابن شارون كان بيتحاكم فى قضيه فساد من ايام ما كان ابوه رئيس وزراء اسرائيل واتحكم عليه بالسجن !!! شوفوا هما بيسجنوا ابن الرئيس واحنا بنورثه الحكم !!! هما لو الرئيس منفذش البرنامج الانتخابى اللى قاله يقدروا يغيروه ..... واحنا لو عايزين نغير رئيس الحى بتاعنا مش هنعرف !!! هما لو واحد مات فى حادثة يحققوا فى الحادثة ويعاقبوا الفاعل ..... واحنا مات عندنا 1000 واحد فى العبارة اللى غرقت وصاحبها عايش برة ومحدش عارف يكلمه !!! هما عندهم 3 جامعات من اهم 500 جامعة فى العالم ..... واحنا عندنا جامعة القاهرة ترتيبها رقم 14 على مستوى افريقيا !!! شوفتم بقه هما يسووا كام واحنا نسوا كام فى سوق الشعوب !!! ومحدش يقولى والنبى احنا مسلمين وهما كافرة لان ده حسابه عند ربنا يعنى احنا هندخل الجنه وهما هيدخلوا النار وحتى موضوع الجنه دة فى شك بعد البلاوى اللى بنعملها بس انا بتكلم فى الدنيا ..... ومحدش يقولى احنا فراعنه وعندنا حضارة والحوارات الفاشله دى عشان انا بحس ذى ما يكون واحد هدومه مقطعة ومش لاقى ياكل والنهار كله بيقول انا جدى كان باشا !!! احنا بقينا ملطشة العالم كله والكل بيشوط فينا من اول الرسوم المسيئة للرسول (صلى) وسب القرأن والحجاب لحد اللى بيحصل فى فلسطين والعراق ولبنان .....المفروض منستناش مساعده من حد ولا نستنى مين اللى هيكسب اوباما ولا هيلارى لان اى حد هييجى مش هيساعدنا لاننا منسواش !!! لازم الاول نغير من نفسنا وساعتها نقدر نواجه الدنيا كلها

استار اكاديمى

انا متدايق ومخنوق وقرفان وذى ما الشباب بتقول انا منفوخ من برنامج استار اكاديمى ساعات بفكر بينى وبين نفسى انى لو كنت شاب روش ذى الشباب دول كنت عملت اكتر من كده بس يلعن ابو الروشنه اللى تخلى الشباب كدة يا اخى مش عايز اكبر الموضوع واقول إن فى جهات غربية من مصلحتها ان الشباب دول يبقى نجوم وقدوه لان ده هيدخلنا فى نظرية المؤامرة والحوارات الكبيرة ديه بس الموضوع فعلا كبير انا شايف قدامى شباب الناس بتابع حياتهم اليومية دقيقة بدقيقة على مدار حوالى ثلاثة شهور وغصب عننا كلنا الشباب دول بيتأثر بيهم الاولاد الصغيرين اللى لسة تفكيرهم وشخصيتهم بتتكون واللى متابع هياخد باله من كذا حاجة ..... اولا ولا واحد فيهم بيصلى مع إن اغلبهم مسلمين !!! واغلبهم بيتكلموا يا انجليزى يا فرنساوى مع إن كلهم عرب !!! والنهار كله يبوسوا ويحضنوا فى بعض على الفاضى وعلى المليان !!! يمكن حد يقرا الكلام ده ويقولى انت بتغير منهم ونفسك تبقى مكانهم وتهيص ذى ما هم هايصين بس اللى بيحصل ده فعلا صعب ومش طبيعى انا نفسى اعرف ابهات البنات دى فين يعنى اذاى تبقى بنتى النهار كله بتتباس من اول بواب الاكاديمية لغاية الطلبة والاساتذة و النجوم اللى بيغنوا معاهم كل ده والناس كلها بتتفرج عليهم وانا قاعد قدام التليفزيون ومركب القرنين ويمكن كمان بلعب فى شنبى وفرحان أن بنتى مزة ومتظبطة على الشاشة قدام العالم كله فى ناس هتقول ان ديه حرية شخصية وان كل واحد حر فى تربيتة !!! وانت لو مش عاجبك ممكن تغير القناه وتشغل قناه اقرأ او المجد ..... كلامهم صح وعلى عينى وراسى بس الاعلام بيغير حياة وتفكير وشخصية الشعوب !!! فانت متجبليش مجموعة ولاد وبنات وانت مختارهم بيتكلموا انجليزى اكتر من العربى وبيقلعوا اكتر ما بيلبسوا وبيبوسوا اكتر ما بيتكلموا ومقدمهم على الشاشة 24 ساعة والناس بتتأثر بيهم غصب عنهم وتقولى فى الاخر ديه حرية !!! انا عايز اسأل سؤال الشباب دول طول قاعدتهم مع بعض متسمعش منهم حوار مفيد بس لو سألت اى حد فيهم عن رأيه فى التطبيع او رأيه فى امريكا مثلا تتوقع رده هيبقى ايه !!! ومحدش يقولى انت متعرفهمش فمتظلمهمش لان المظهر العام للانسان يعنى طريقة لبسه وكلامه بيوصلك لطريقة تفكيره وشخصيته يعنى بذمتكم دول هما اللى هيحرروا فلسطين !!! انا عارف ان الشباب العربى كله محبط وان فى جو عام بيحاولوا يوصلوه للناس بأن اللى احنا فيه ده وضع طبيعى وان القوى لازم قانونه هو اللى يمشى واحنا مفيش حاجه فى ادينا وان اسرائيل بقت امر واقع لابد انك تقبل بيه وتعيش معاه !!! بس الحل مش انك تقدم نسخة من انصاف الرجال وانصاف العاهرات وتقول للناس هم دول المشهورين والناجحين واللى الاعلام متابع اخبارهم اكتر من اخبار العراق ولبنان انا اسف على اللفظ بس هما بيحولوا يقلدوا الغرب فى الكلام والرقص وقلة الادب !!! بس حتى التقليد احنا فاشلين فيه فبقينا ذى المسخ لابقينا رجاله ولا بقينا خوجات

الحياة لامؤخذة الطبيعية

عايز اتجوز........اظن ده طلب طبيعى شاب وداخل فى الــ 25 من حقة الدستورى انه يتجوز !!!! طب الواحد مننا عايز يتجوز ليه ؟ فى شاب يقولك استقرار وشاب يقولك اهو تغيير وشاب يقولك عادى مهو المفروض انى اتجوز .... بس المعظم مبيقولش الحقيقة والحقيقة هى ان كل الشباب عايزين يتجوزوا عشان يمارسوا حياتهم الطبيعية وده مش عيب ديه غريزة وبما اننا مسلمين فمينفعش نمارس الغريزة دية إلا من خلال الجواز وده السبب الاساسى اللى مخلي الشباب عايز يتجوز ....... كده احنا قدام مشكلة ومشكلة كبيرة كمان احنا قدام شباب محتاج يمارس حياته وده طلب عادل الشاب فى امريكا والدول الغربية بيمارس حياته وهو عنده 14 15 سنه بالكتير اما الشاب عندنا ياعينى بيفضل لحد 30 سنة ويمكن اكتر لحد ما يقدر يتجوز وساعتها بيكون تقريبا صدّا يعنى قلته تكون احسن !!! الــ 10 15 سنة دول اللى بيبقى فيها الشاب عايز ومش قادر بتبقى الحياه صعبة حتى لو بنحاول منتكلمش فى الموضوع ده وحتى لو بندارى احنا لازم نعترف بالمشكلة ونتكلم عنها عشان نحاول نحلها الرسول ( صلى ) كان عارف المشكلة وقال فى حديث فيما معناه ( من استطاع منكم البائة فليتزوج ومن لم يستطع فعليه بالصوم ) وده معناه ان الانتظار صعب ومحتاج صبر وجهاد مع النفس لان فى ناس مبتصبرش وبتتعامل !!! ربنا يهدينا ويهديهم .... نرجع لموضوعنا طب اية اللى بيخلى الشاب يستنى لحد الــ 30 عشان يتجوز ؟ طبعا ده سؤال غبى لان كلنا عارفين مصاريف الجواز واول حاجة طبعا الشبكة وحيث ان الذهب وصل حاليا لاكثر من 130 جنية الكيلو قصدى الجرام وحيث ان كل بنت عايزة شبكة مش اقل من بنت خالها ( ملحوظة اى بنت وانت بتجبلها الشبكة لازم يطلعلها بنت خال جالها شبكة غالية ومينفعش تجيب شبكة اقل منها لاحسن البنت تتعقد ) تلاقى نفسك عايز تحوش سنتين تلاته عشان الشبكة بس !!! تخش على الشقة وحيث ان مصرنا الحبيبة تمر بأزمة سكن منذ حوالى 20 سنة والبلد عمالة تخرج من عنق زجاجة تدخل فى زجاجة اكبر فالشقق بقت مولعة يعنى لو عايز اوضة وصالة وحمام مشترك محتاج تحوش خمس عشر سنين ده لو انت شغال اساسا لان حيث ان البلد تمر ايضا بأزمة بطالة فأغلب الشباب اللى محتاجة تمارس حياتها الطبيعية مش لاقية شغل اساسا واللى بيشتغل يادوب بيجيب مصاريفة يبقى جواز اية اللى انت جاى تقول عليه !!!!!! طب وبعدين الوضع ايه دلوقتى ؟ والله دلوقتى بقى فية موجة وسط الشباب وهى الاضراب عن الجواز وده رأى بدأ يقتنع بيه شباب كتير وانا منهم يعنى بصراحة انا مش هتجوز إلا اما اكون قادر افتح بيت واصرف على مراتى وبيتى كويس ومبفكرش هتجوز وانا عندى كام سنة اما موضوع الحياة الطبيعية فربنا يلهمنا الصبر والسلوان واهو كله بثوابة الواحد بس بيفضفض عشان الكبت بعيد عنكم وحش ..... اسف لو طولت عليكم بس يمكن الكلام ده مينفعش تقوله لامك وابوك بس ينفع تقوله فى مدونتك !!!! وعجبى

سيناريو الفوضى

كل سنة وانتوا طيبين ... مش عايزين نبدأ السنة الجديدة بحاجة تنكد عليكم !!! بس انا عايز اعرف رأيكم فى حاجة كده ... طبعا احنا عارفين ان الرئيس مبارك لسة المدة بتاعته مخلصتش انا بصراحة مش عارف هو حاجز كام مدة بس ما علينا مش هو ده الموضوع !!! الموضوع انا عايزكم تتخيلوا معايا ان الرئيس مبارك اطال الله فى عمره بعد الشر بعد الشر ويارب السبعين مليون مصرى يجعل يومهم قبل يومه حصله حاجة خلال السنة الجديدة ايه اللى ممكن يحصل لمصر بعده طبعا الاعمار بيد الله بس المفروض يكون عندنا تصور للموقف ... فى كذا حاجة ممكن تحصل اولا الدستور بيعين رئيس مجلس الشعب رئيس مؤقت للجمهورية لحين انتخاب رئيس جديد ... ثانيا الحزب الحاكم وهو الحزب الوطنى صاحب الشعبية الكبيرة والاغلبية العظمى فى البلاد سيرشح رئيس للدولة ومعظم السياسيين والمفكرين يتوقعون ترشيح جمال مبارك وده مش عشان انه ابن رئيس الجمهوريه لا سمح الله ولكن لخبرته السياسية الكبيرة والطويلة التى لا يعلمها إلا الله ورجال الحزب الوطنى !!! ماشى السيد جمال سيرشحه الحزب والمفروض تتم انتخابات وطبقا لسابق معرفتنا بنزاهة الانتخابات المصرية وخلوها من اى شوائب فى الثلاثين سنة اللى فاتوا المتوقع فوز جمال مبارك بتسعين فى المية من الاصوات على الاقل ويمكن يكون السيد جمال مبارك عايز يغير مسيرة الوالد ويبعد عنه الشبهات فيخلى الداخلية تقلل النتيجة لسبعين او ثمانين فى المية عشان مفيش اى كلب يفتح بقه وبرضه اهو عشان الحسد !!! هنا فى اسئلة كتيرة منها هل الناس هتقبل توريث الحكم من مبارك لابنه ؟ وهل الاخوان وحركة كفاية وبقيت الاحزاب هيخلوا الموضوع يعدى كده ببساطة ؟ وهل لو حصل مظاهرات خلال انتقال السلطة هتبقى فى حدود ولا الموضوع هيقلب بفوضى ؟ وهل الداخلية هتذود العيار حبة وتحاسب على القديم كلة ولا هتتصرف بعقل ؟ وايه هيبقى موقف الجيش ؟ ولو جمال مبارك قلب الموازين وقال مش عايز ارشح نفسى تفتكره ايه اللى هيتم ؟ ومين البدايل اللى شايفين تنفع لمنصب الرئيس ؟ اسئلة كتيرة بس ده برضة مستقبل البلد والمفروض نجهز نفسنا لأى حاجة ممكن تحصل ولو حد فى دماغه سيناريو تانى ياريت يكتبه وذى ما بيقوله اصبر على جار السو يا يرحل يا ..... كفاية كدة عشان الرقابة